நீடிக்கிறது பாஜக-ஐக்கிய ஜனதா தளம் மோதல்

பாஜக-ஐக்கிய ஜனதா தளம் இடையேயான கூட்டணியில் மேலும் விரிசல் ஏற்பட்டுள்ளது.

கோசி வெள்ளத்தால் பாதிக்கப்பட்ட மக்களுக்கு நிவாரணம் வழங்கியது தொடர்பாக குஜராத் அரசு விளம்பரப்படுத்தியதால் பிகார் முதல்வர் நிதீஷ் குமாருக்கும், குஜராத் முதல்வர் நரேந்திர மோடிக்கும் இடையே உரசல் ஏற்பட்டது. இது பாஜக-ஐக்கிய ஜனதா தளக் கூட்டணியில் பிளவு ஏற்படும் அளவுக்கு சென்றுள்ளது.

எனினும், இந்தப் பிரச்னையால் இரு கட்சியிடையேயான உறவில் எவ்விதப் பாதிப்பும் இருக்காது; கூட்டணி தொடரும் என்று ஐக்கிய ஜனதா தளம் தலைவர் சரத் யாதவ் உறுதிபட கூறியுள்ளார்.

குஜராத் அரசு சார்பில் அளிக்கப்பட்ட ரூ.5 கோடி நிவாரண நிதியை நிதீஷ் குமார் திருப்பி அளித்துள்ளார். இது பிகார் பாஜக தலைவர்களை அதிருப்தியில் ஆழ்த்தியுள்ளது. இதனால் நிதீஷ் குமாருடன் தொடர்ந்து மோதல் போக்கை கடைப்பிடித்து வருகின்றனர்.

குஜராத் அரசிடம் நிதியை திருப்பி அளித்த நிதீஷ் குமாரின் நடவடிக்கையால் பிகார் துணை முதல்வரும், பாஜக மூத்த தலைவருமான சுஷில் குமார் மோடி அதிருப்தி அடைந்துள்ளார்.

பாட்னா மாவட்டத்தில் ஞாயிற்றுக்கிழமை பேரணி ஒன்றில் நிதீஷ் குமாரும், சுஷில் குமார் மோடியும் கலந்து கொள்ளவிருந்தனர். ஆனால் கடைசி நேரத்தில் இந்த பேரணியில் கலந்து கொள்வதை சுஷில் குமார் மோடி தவிர்த்து தனது எதிர்ப்பை வெளிப்படுத்தினார்.

கூட்டணி கட்சிக்கு எப்படி மதிப்பளித்து நடக்க வேண்டும் என்று நிதீஷ் குமாருக்கு சிறிதும் தெரியவில்லை. அவர் சர்வாதிகாரப் போக்கில் நடந்து கொள்கிறார். இதனால் அவர் பங்கேற்ற பேரணியை நான் புறக்கணித்துவிட்டேன் என்று சுஷில் குமார் மோடி கூறினார்.

நிதீஷ் குமாரின் செயலுக்கு அந்த மாநில சுகாதாரத் துறை அமைச்சரும், பாஜக தலைவருமான என்.கே.யாதவும் கடும் எதிர்ப்பு தெரிவித்துள்ளார்.

இவரும், நிதீஷ் குமார் கலந்து கொண்ட பேரணியில் பங்கேற்பதை தவிர்த்து தனது எதிர்ப்பை வெளிப்படுத்தினார்.

பாஜக உயர்நிலைத் தலைவர்கள் ஆலோசனை: இதனிடையே, பிகாரில் நிதீஷ் குமாருடனான மோதலால் ஏற்பட்டுள்ள அரசியல் சிக்கல் குறித்து பாஜக உயர்நிலைத் தலைவர்கள் தில்லியில் திங்கள்கிழமை கூடி ஆலோசனை நடத்த உள்ளனர்.

""எங்களது கட்சித் தலைவர் நிதின் கட்கரியும், கட்சியின் மூத்த தலைவர்களும் தற்போது தில்லியில் இல்லை. அவர்கள் திங்கள்கிழமை தில்லிக்கு வந்துவிடுவார்கள். இதையடுத்து பிகாரில் நிலவும் அரசியல் சிக்கல் குறித்து கூடி விவாதிப்பார்கள்'' என்று கட்சியின் செய்தித் தொடர்பாளர் ஷாநவாஸ் ஹுசைன் தெரிவித்தார்.

கூட்டணியை பாஜக முறிக்க வேண்டும்-பாஸ்வான்: இதனிடையே, பாரதிய ஜனதா கட்சிக்கு சுயமரியாதை இருக்கிறது என்றால் ஐக்கிய ஜனதா தளத்துடனான உறவை உடனே முறித்துக் கொள்ள வேண்டும் என்று லோக் ஜன சக்தி தலைவர் ராம்விலாஸ் பாஸ்வான் தெரிவித்துள்ளார்.

கோசி வெள்ளத்தால் பாதிக்கப்பட்ட மக்களுக்கு குஜராத் அரசு சார்பில் வழங்கப்பட்ட நிதியை மையமாக வைத்து உருவான பிரச்னையை அடுத்து பாஜகவை எந்த அளவுக்கு அவமானப்படுத்த முடியுமோ, அந்த அளவுக்கு நிதீஷ் குமார் அவமானப்படுத்திவிட்டார்.

இது தான் அரசியலா ?