அதிமுகவில் இருந்து அடுத்து வருபவர் யார்? - மு.க.ஸ்டாலின்

by ரபீக் Sun Jun 20, 2010 10:20 am

அ.தி.மு.க.விலிருந்து அடுத்து தி.மு.க.வுக்கு வருபவர் யார் என்பதை பொறுத்திருந்து பாருங்கள் என்று துணை முதல்வர் மு.க.ஸ்டாலின் பேசினார்.
தியாகரா£ய நகர் பகுதி தி.மு.க. சார்பில் பழக்கடை ஜெயராமன் 26ம் ஆண்டு நினைவு மற்றும் தமிழக அரசு சாதனை விளக்க பொதுக் கூட்டம் தியாகராய நகரில் நேற்று மாலையில் நடந்தது. கூட்டத்தில் துணை முதல்வர் மு.க.ஸ்டாலின் கலந்து கொண்டு நலிந்த தி.மு.க.வினர் 20 பேர் குடும்பங்களுக்கு தலா ரூ.50000 வழங்கினார்.

அவர் பேசியதாவது:

கடந்த 4 ஆண்டுகளில் நடந்த 11 இடைத் தேர்தலிலும் தி.மு.க. வெற்றி பெற்றுள்ளது. தி.மு.க.வின் இந்த வெற்றிக்கு காரணம் கலைஞர் மீது மக்களுக்கு ஏற்பட்ட நம்பிக்கை தான். அந்த அளவு அரசின் சாதனை, திட்டங்கள் மக்களை சென்று அடைந்துள்ளன.

2015ம் ஆண்டுக்குள் சென்னையில் மெட்ரோ ரெயில் திட்டம் நிறைவேற்றப்பட்டு விடும். 2011ல் தேர்தல் வருகிறதே என்று சிலர் கருதலாம். அதற்குப் பிறகும் தி.மு.க. ஆட்சி தான் நடைபெறும். சந்தேகம் வேண்டாம். திருவொற்றியூர் வரை மெட்ரோ ரெயில் திட்டத்தை நிறைவேற்ற அரசு தயாராக இருக்கிறது.

தனது கட்சியில் தற்போது இருப்பவர்களும் போய் விடக் கூடாது என்பதற்காக ஜெயலலிதா தினமும் ஆர்ப்பாட்டம் அறிவிக்கிறார். விரைவில் அ.தி.மு.விலிருந்து விலகி வருபவர்களை தி.மு.க.வில் சேர்க்கலாமா என்று அதை எதிர்த்து ஆர்ப்பாட்டம் என்பார்.

என்னிடம் ஒரு பத்திரிகையாளர் அடுத்து யார் என்று கேட்டார். பொறுங்கள் இன்னும் பலர் வர இருக்கிறார்கள் என்று கூறினேன். இப்படியே போனால் அந்த அம்மாவை எப்போது கட்சியில் சேர்ப்பீர்கள் என்று அவர் கேட்டார். அந்த அளவு அந்த கட்சி போய்க் கொண்டு இருக்கிறது.
இவ்வாறு மு.க.ஸ்டாலின் பேசினார்.

கூட்டத்துக்கு தென் சென்னை மாவட்ட தி.மு.க. செயலாளர் ஜெ.அன்பழகன் தலைமை தாங்கினார். கவுன்சிலர் ஜெ.கருணாநிதி வரவேற்றார். அ.தி.மு.க, தே.மு.தி.க., பா.ம.க. கட்சிகளிலிருந்து பலர் விலகி தி.மு.க.வில் இணைந்தனர். பி.மாரி நன்றி கூறினார். முன்னதாக ஸ்டாலினுக்கு உற்சாக வரவேற்பு அளிக்கப்பட்டது.