பாகிஸ்தானை “பெட்” புயல் தாக்கியது: சிந்து மாகாணத்தில் பயங்கர சேதம்

by ரபீக் Mon 7 Jun 2010 - 17:29

அரபிக் கடலில் உருவான “பெட்” புயல் குஜராத் மாநிலம் வழியாக ஓமன் நாட்டை தாக்கியது. இதனால் அங்கு பலத்த மழை பெய்தது. இதில் 15 பேர் பலியானார்கள். 60 ஆயிரம் பேர் அப்புறப்படுத்தப்பட்டு பாதுகாப்பான இடங்களுக்கு அனுப்பப்பட்டனர். ஆயிரக்கணக்கான மக்கள் வீடுகளை இழந்து தவிக்கின்றனர். ஓமனை தாக்கிய புயல் அங்கிருந்து பாகிஸ்தான் கடல் பகுதிக்குள் புகுந்தது.

இதனால் சிந்து மாகாணத்தில் தத்தா கடலோரத்தில் சூறாவளி காற்றுடன் பலத்த மழை பெய்கிறது. கடலில் 3 முதல் 5 மீட்டர் உயரத்துக்கு ராட்சத அலைகள் எழும்புகின்றன. இந்த புயலின் தாக்கம் கராச்சி கடலோர பகுதிகளிலும் எதிரொலித்துள்ளது.

அங்கும் பலத்த மழை கொட்டுகிறது. சிந்து மாகாணத்தில் உள்ள கேதிபந்தர் நகரில் தாழ்வான பகுதிகளில் வசித்த சுமார் 5 ஆயிரம் பேர் அங்கிருந்து வெளியேற்றப்பட்டு பாகன் நகரில் அமைக்கப்பட்டுள்ள நிவாரண முகாம்களில் தங்க வைக்கப்பட்டுள்ளனர்.

தொடர்ந்து மழை கொட்டு வதால் சிந்து மாகாணத்தில் கடுமையான வெள்ளப் பெருக்கு ஏற்பட்டுள்ளது. இதனால் வீடுகள் இடிந்தன. ரோடுகளில் உடைப்பு ஏற்பட்டுள்ளது. பல ராட்சத மரங்கள் சாய்ந்தன. இதனால் மின் வினியோகம் பாதிக்கப்பட்டுள்ளது.

அங்கு பலத்த சேதம் ஏற்பட்டுள்ளது. ஆனால் அது பற்றிய விவரங்கள் வெளியிடப்படவில்லை. மீட்பு நடவடிக்கையில் ராணுவ வீரர்கள், போலீசார் மற்றும் தீயணைப்பு படையினர் ஈடுபட்டுள்ளனர்