நாங்கள் ஆவிகள்...

by பாரதிப்பிரியன் Mon 17 May 2010 - 18:38

செம்மணிச் சுடலையிலும்,
குமுதினிப் படகிலும்,
நவாலித் தேவாலயத்திலும்,
முல்லைத்தீவிலும்,
நரபலி கொண்டீர் !
மாறினோம் ஆவிகளாய்,
விண்ணுலகமும் இன்றி,
மண்ணுலகமும் இன்றி,
கண்ணில் சுதந்திரம்
கிடைக்குமோ என்று,
அலையும்
நாங்கள் ஆவிகள்....!

மண்ணுலகில் மாசில்லாப் பிறவி வேண்டி,
எண்ணிய பொருளெல்லாம் கிடைத்திட,
பண்ணவனைக் கேட்கவில்லை !
மானமுடன் வாழ
சுதந்திரம் தானே கேட்டோம்,
தந்திரமாக
வெற்றி அன்னையை
மானபங்கம் செய்து விட்டீர்...
மீண்டுமும் கொட்டமடக்க
மண்ணுலகில் நாமில்லை,
நாங்கள் ஆவிகள்...!

கோடி கோடி கற்பனை கொண்டு
தாயின் கருவில் உறங்கிக் கிடந்தோம்,
அன்னை பூமி அன்பு நாடு
தவழ்ந்த போது இனித்தது,
யாழ் இனிதல்ல என்பர்
எம் சொல்லைக்
கேட்டவர்கள்,
குருதி நிறம் அறிந்திட முன்னே
பருதி உலகம் சென்று விட்டோம்,
நாங்கள் ஆவிகள்...!

கணிணி என்பர்
காதில்தான் கேட்டது,
வருங்காலத்திலதைப்
படித்திட ஆசைதான்,
காதில் இரு குழாய் மாட்டி
வெள்ளைத் தேவதை போல்
வலம் வரும்
வெள்ளை உடை பூண்ட
மருத்துவராகவும் ஆசைதான்,
கல்வித் தெய்வத்தின்
கடைக் கண் பார்வையில் கூட
மேதாவி ஆகிடுவோம்,
ஐயகோ..
ஆசைகள் எல்லாம்
கரைந்து போனதே
எம்மைப் போல்...
நாங்கள் ஆவிகள்..!

பத்துத் திங்கள் சுமந்து கொண்டு,
பத்து வருடமாய்
பாலூட்டித் தாலாட்டிப்
பாராட்டிச் சீராட்டி
பாரில் புகழ் தருவான்
நம் பிள்ளையெனப்
பற்பல கனவுகள் கொண்டு,
செல்வத்தை வளர்த்திடும் போது,
நச்சுப் பாம்பு கூடப் பாராட்டிச்
சென்றது,
எம் சகோதர மனிதனோ
நச்சுப் புகைகொண்டு
தாக்கியதால்,
நாங்கள் ஆவிகள்....

நாங்கள் அன்று எழுந்ததெல்லாம்
நாளை நீங்கள் அமைதியாக
இருந்திடவே,
நாங்கள் இன்று அலைவதேல்லாம்
நாளை உங்கள் ஆவிவாழ்வைத்
தடுத்திடவே,
ஒன்று படுவீர் மக்காள் !
என்றும் வென்றுடுவீர் !
மேமாதப் பதினெட்டில்
பதினாறும் நீங்கள்
பெற்றிட
வாழ்த்துகின்றோம்
நாங்கள் ஆவிகள்...!

இதுவரை காலமும் ( மே 18 உட்பட ) தம்முயிர் தந்த உன்னத மாவீரர்களுக்கும் தமிழ் உறவுகளுக்கும் அவர் தம் ஆத்மா சாந்தியடைய பிரார்த்தனை செய்குவோம்.

by ARR Mon 17 May 2010 - 18:50

அப்பாவிகளின் ஆவிகள் அப் பாவிகளை தப்பாது மாய்க்கட்டும்..!

நல்லதோர் நினைவஞ்சலியை ப்திவுசெய்திருக்கிறீர்கள் பாரதிபிப்ரியன்..

பாராட்டுகள்..!

by பாரதிப்பிரியன் Tue 18 May 2010 - 0:32

ARR wrote:அப்பாவிகளின் ஆவிகள் அப் பாவிகளை தப்பாது மாய்க்கட்டும்..!

நல்லதோர் நினைவஞ்சலியை ப்திவுசெய்திருக்கிறீர்கள் பாரதிபிப்ரியன்..

பாராட்டுகள்..!

by கலைவேந்தன் Tue 18 May 2010 - 1:20

எண்ணித்துணிந்து செய்த சுதந்திரப்போர் கருவறுக்கப்பட்டதும் எண்ணிலா ஏழைகள் தங்கள் இன்னுயிரை இழந்ததும்
எண்ணினால் ஏழுபிறவியும் நடுங்கிடும் உண்மைகள்
எண்ணிப்பார்ப்போம் அவர்தம் பலிதானங்களை..

அருமையான கண்ணீர் அஞ்சலிக்கு பாராட்டுகள் பாரதிப் பிரியன்...!

by மஞ்சுபாஷிணி Tue 18 May 2010 - 13:28

ஒவ்வொரு உயிரும் ஜனிக்கும்போதே சந்தோஷமான சூழல் தான் இதுவரை கண்டது எல்லோருமே... ஆனால் ஈழத்தமிழ் மண்ணில் ஜனித்த குழந்தைகள் முதல் பெரியவர் வரை பெண்களை கூட விட்டு வைக்காது ஈவிரக்கமில்லாது அட்டூழியங்கள் செய்தவரை தோலுரித்து காட்டிய பாரதிக்கு அன்பு நன்றிகள்....

கண்ணீரால் நனைந்த இந்த கவிதைக்கு ஆவிகளாய் அமைதி இல்லாமல் திரியும் ஈழ மக்களின் நிலையை அப்படியே கவிதையில் எழுதி எங்கள் மனதையும் கலங்க வைச்சிருக்கீங்க பாரதி....

அன்பு நன்றிகள் பாரதி...