பத்தில் பத்து - மு.அ. அபுல் அமீன் – நாகூர்

by azeezm Mon Apr 19, 2010 11:54 am

பத்தில் பத்து - மு.அ. அபுல் அமீன் – நாகூர்

ஆசிக்கான ஆசுரா நாளாம்
ஆண்டின் ஆரம்ப மாதம்
நேசிக்கும் முஹர்ரம் பத்தில்
நேர்ந்த நிகழ்ச்சிகள் பத்து

அழுதழுது ஆதிநபி ஆதம்
அந்தமும் ஆதியுமில்லா அல்லாஹ்வைத்
தொழுது கேட்ட பாவத்தைத்
தொய்வின்றி மன்னித்த நிகழ்ச்சி

இனியநபி இத்ரீஸ் இறைவனை
இறைஞ்சி கேட்ட வாறு
கனிந்து வானில் உயர்த்திய
கருணை பெற்ற நிகழ்ச்சி

சுழன்ற சூறா வளியில்
சுற்றிய நூஹ்நபியின் கப்பல்
சுழலாத ஜூதி மலையில்
சுகமாய் நின்ற நிகழ்ச்சி

இறையை மறுத்த நம்ரூது
இறைத்தோழர் இப்ராஹீம் நபியை
நிறைந்த நெருப்பிலிட நெருப்பும்
நிழலான நீங்கா நிகழ்ச்சி

தாவூத்நபி தவறான தீர்ப்புக்கு
தாளாது தளராது கேட்ட
பாவமன்னிப்பு கிட்டிய
பங்கமிலா பாங்கான நிகழ்ச்சி

தந்திர சைத்தான் மந்திரத்தில்
தவறவிட்ட கணையாழி கிடைத்து
சுந்தர சுலைமான்நபி ஆட்சியைச்
சுகமாய் மீட்ட நிகழ்ச்சி

தாங்கொணா வேதனை தந்து
தளர வைத்த நோய்கள்
நீங்கி யோடி அய்யூப்நபி
நிம்மதியாய் சுகம்பெற்ற நிகழ்ச்சி

மூசா நபியும் படையும்
முந்தி செல்ல வழிவிட்டு
கூசா பிர்அவ்னை நைல்நதி
கூவி விழுங்கிய நிகழ்ச்சி

மீனின் வயிற்றில் நுழைந்து
மீளா இருட்டில் தவித்த
யூனூஸ் நபியும் வெளியில்
விழுந்த விழுமிய நிகழ்ச்சி

நேசக்கரம் நீட்டி நேரிய
ஈசாநபியைக் கொல்ல முயன்ற
மோசடியை முறியடித்து அல்லாஹ்
விண்ணேற்றிய வியத்தகு நிகழ்ச்சி

பத்து நிகழ்ச்சிகள் நடந்த
முத்தான முஹர்ரம் பத்தில்
சித்தம் தெளிந்து சித்திபெற
சிரத்தையாய்க் கேட்போம் துஆவை

நன்றி : புனித பயணம்/ ஜனவரி 2010
பத்தில் பத்து - மு.அ. அபுல் அமீன் – நாகூர்

பத்தில் பத்து - மு.அ. அபுல் அமீன் – நாகூர் Abul-amin

[left]

by சபீர் Mon Apr 19, 2010 12:14 pm

ரொம்ப அழகான வரிகள் நன்றி தோழரே

by ரமீஸ் Mon Apr 19, 2010 2:06 pm

மிகவும் அருமையான கவிதை நண்பரே,...
மகிழ்ச்சி

by kalaimoon70 Mon Apr 19, 2010 2:20 pm

பத்து நிகழ்ச்சிகள் நடந்த
முத்தான முஹர்ரம் பத்தில்
சித்தம் தெளிந்து சித்திபெற
சிரத்தையாய்க் கேட்போம் துஆவை...

வார்த்தைகள் இங்கு வரலாறுடன் சேர்க்கப்பட்டு ,பத்தாய் அதிலுள்ள முத்தான ,
செய்திகளை கவிதையாய் தந்ததை ரசித்து ,அதை இங்கு தந்த தோழருக்கு என்
நன்றி பாராட்டு. மகிழ்ச்சி