இந்தியில் அக்சய் குமார் ஜோடியாக த்ரிஷா!

by rikniz Wed Jun 17, 2009 8:34 pm

தமிழ் திரையுலகில் முன்னணி நடிகைகளுள் ஒருவராக வலம் வந்து கொண்டிருக்கும் த்ரிஷா முதன் முறையாக பாலிவுட் படத்தில் ஒப்பந்தமாகியுள்ளார். இந்தியின் முன்னணி நாயகர்களில் ஒருவரான அக்சய் குமாருக்கு ஜோடியாகவே அவர் நடிக்கிறார்.

இப்படத்தை இயக்கும் பிரியதர்ஷன் அளித்த பேட்டியில், "தனது புதிய படமான 'கேட்டா மேதா'வில் புதுமுக நடிகையை அறிமுகப்படுத்த விரும்பினார், அக்சய். தமிழ் நடிகை த்ரிஷா மிகவும் பொருத்தமானவர் என்று அவரிடம் கூறினேன். த்ரிஷாவின் சில படங்களைப் பார்த்து வியந்த அக்சய், அவரையே நாயகியாக போடலாம் என உறுதியாக சொல்லிவிட்டார்," என்றார்.

அதைத் தொடர்ந்து, த்ரிஷாவிடம் கால்ஷீட் விவகாரங்கள் குறித்து பேசி ஒப்பந்தம் செய்துவிட்டார், இயக்குனர் பிரியதர்ஷன்.

முதன் முறையாக பாலிவுட்டில் அடியெடுத்து வைக்கும் த்ரிஷாவும், " தமிழில் லேசா லேசா என்ற பிரியதர்ஷன் படம் மூலம் நான் அறிமுகமானேன். இந்தியிலும் அவர் மூலம் அறிமுகமாவது அதிர்ஷ்டமே. தென்னிந்தியாவில் மட்டுமின்றி, பாலிவுட்டிலும் பொருத்தமான நாயகி என்றே கருதுகிறேன்," என்கிறார் வியப்புடன்.
காதலும் நகைச்சுவையும் கலந்த அக்மார்க் பிரியதர்ஷன் படமான 'கேட்டா மேதா'வின் படப்பிடிப்பு இந்த ஆண்டு அக்டோபரில் தொடங்குகிறது.

அண்மையில் 'கஜினி' படம் மூலமாக இந்தியில் அறிமுகமாகி, அங்கு முன்னணி நாயகியாகிவிட்ட அசின், தொடர்ந்து சல்மான்கான் உள்ளிட்ட ஸ்டார்களுடன் நடித்து வருகிறார். அவரைப் போலவே பாலிவுட்டில் த்ரிஷாவும் ஒய்யாரமாக வலம் வருவார் என்று எதிர்பார்க்கலாம்!