கள்ளத்தொடர்பால் வந்த விபரீதம் : ஒருவர் பலி; வாலிபர் தற்கொலை

by arularjuna Wed Mar 31, 2010 9:17 am

மானாமதுரை : சிவகங்கை மாவட்டம் மானாமதுரை அருகே ஆலம்பச்சேரியை சேர்ந்த மாயகிருஷ்ணன் (22), கள்ள காதலியின் கணவரை கொன்று, தற்கொலை செய்து கொண்டார்.

இவருக்கும், தேவரேந்தலை சேர்ந்த நாகு மனைவி சீதாவுக்கும் (40), சில ஆண்டுகளாக கள்ளத்தொடர்பு இருந்து வந்துள்ளது. மாயகிருஷ்ணனின் தங்க சங்கிலியை 8,000 ரூபாய்க்கு சீதா அடகு வைத்தார். இவர்களது உறவை நாகு (45) கண்டித்தார். இதனால், தனது நகையை தருமாறு, மாயகிருஷ்ணன் வற்புறுத்தினார். நேற்று, மானாமதுரை கூட்டுறவு வங்கியில் நகையை திருப்பி விட்டு கணவன், மனைவி இருவரும், பஸ்சில் ஊர் திரும்பினர். மதியம் 1.30 மணிக்கு, வயல் வெளியில் நடந்து வந்தபோது, எதிரே மாயகிருஷ்ணன் வந்தார். நகையை அவரிடம் கொடுத்து விட்டு, 'இனிமேல் எந்த தொடர்பும் வைத்து கொள்ள கூடாது,' என நாகு எச்சரித்தார். இதனால், தகராறு ஏற்பட்டது.

ஆத்திரமடைந்த மாயகிருஷ்ணன் கத்தியால், நாகுவின் தலையிலும்,வயிற்றிலும் குத்தினார். நாகு குடல் சரிந்து இறந்தார். சீதாவிற்கும் கழுத்தில் வெட்டு விழுந்தது. அதிர்ச்சி அடைந்த மாயகிருஷ்ணன், தான் கொண்டு வந்திருந்த பூச்சிமருந்தை குடித்து தற்கொலை செய்து கொண்டார். சீதா உயிருக்கு போராடி கொண்டிருந்தார். அவ்வழியே சென்றவர்கள் போலீசாருக்கு தகவல் கொடுத்தனர்.போலீசார் விசாரித்தனர். சீதா மதுரை அரசு மருத்துவமனையில் சேர்க்கப்பட்டார். இரு தரப்பினரும் வெவ்வேறு சமூகத்தை சேர்ந்தவர்கள் என்பதால், கிராமத்தில் போலீசார் குவிக்கப்பட்டுள்ளனர்.