இந்தோனிசியாவில் தடுத்து வைக்கப்பட்டிருந்த கனடிய மாணவி நாடு திரும்புகிறார்

by kirupairajah Sat Jan 30, 2010 5:23 pm

இந்தோனிசியா கடலில் கரை ஒதுங்கியிருக்கும் கப்பலில் இருக்கும் தமிழ் அகதிகளைச் சந்தித்து அவர்களுக்கு உதவி செய்ய அந்த நாட்டுக்குச் சென்றிருந்த ரொறன்ரோ பல்கலைக் கழக முனைவர் பட்டத்துக்குப் படித்துக் கொண்டிருக்கும் மாணவி ஜெசிக்கா சந்திரசேகர் இந்தோனிசியா அதிகாரிகளால் கைது செய்து தடுத்து வைக்கப்பட்ட பின்னர் நாளை சனிக்கிழமை (சனவரி 30) பி.ப. 12.30 மணிக்கு பியர்சன் பன்னாட்டு வானூர்தி நிலையம் வந்து சேருகிறார்.

அப்போது அவர் ஊடகவியலாளர்களைச் சந்தித்து தனது பயண அனுபவத்தை அவர்களோடு பகிர்ந்துகொள்ள இருக்கிறார். ஜெசிக்கா தடுத்து வைக்கப்பட்டிருந்த காலத்தில் அவரது கடவைச்சீட்டு அதிகாரிகளால் பறிமுதல் செய்யப்பட்டது. இந்தோனிசியா மொழியில் எழுதப்பட்ட ஒரு ஆவணத்தில் கையெழுத்திடுமாறு கட்டாயப் படுத்தப்பட்டார். ஊடகவியலாளர்களோடு பேசக்கூடாது என எச்சரிக்கப்பட்டார்.

ஜெசிக்கா இந்தோனிசியா நாட்டு வெளியுறவு அமைச்சின் மூத்த அதிகாரிகளோடு பேசிக் கப்பலில் கரையொதுங்கிய 254 தமிழ் அகதிகளுக்கு வேண்டிய மனிதாபிமான உதவிகளைப் பெற்றுக் கொடுக்கவே அங்கு சென்றிருந்தார். "நான் கனடா வந்துசேரும் வேளையை ஆவலோடு எதிர்பார்த்திருக்கிறேன். மனிதாபிமான உதவி செய்யப் போன என்னை அவர்கள் கைது செய்வார்கள் என நான் நம்பியிருக்கவில்லை. ஆனால் அதைவிட மோசமான செயல் இந்த அகதிகள் உணவு, தண்ணீர், பாதுகாப்பு எதுவும் கொடுக்காமல் இந்தக் கப்பலில் அவர்கள் நடத்தப்படும் விதம் கவலை அளிக்கிறது" என ஜெசிக்கா தான் விடுத்த அறிக்கையில் கூறியுள்ளார்.

கடந்த 100 நாள்களுக்கு மேலாக ஒரு கப்பலில் இந்த புகலிட கோரிப்பாளர்கள் அவல வாழ்க்கை வாழ்ந்து கொண்டிருக்கிறார்கள். மீண்டும் சிறிலங்காவுக்கு திருப்பி அனுப்பப்படும் ஆபத்தில் இருக்கிறார்கள். ஒரு அகதி கோரிக்கையாளர் மருத்துவ கவனிப்பு மறுக்கப்பட்ட நிலையில் இறந்துவிட்டார். இன்னொருவருக்கு போரில் பட்ட விழுப்புண்ணுக்கு அவசர மருத்துவ உதவி தேவைப்படுகிறது.

இந்தப் கப்பலில் 31 சிறார்களும் ஒரு கற்பிணிப்பெண்ணும் இருக்கிறார்கள். இவர்கள் எல்லோரும் போதிய உணவு, மருந்து, மருத்துவ கவனிப்பு இல்லாது துன்பப்படுகிறார்கள்.

மேலதிக விபரங்களுக்கு தொடர்பு கொள்ளவும்:

HART - தொலைபேசி

(647) 836 - 6858

(647) 836 - 6858

(647) 836 - 6858

(647) 836 - 6858