உடையாள்-சிவகங்கை தெய்வம் வீர மங்கை வெட்டுடையாள்

காலனிய ஆதிக்கத்துக்கு எதிராக உயிர் தியாகம் செய்து, தமிழர்களின் தெய்வமானார் உடையாள் என்ற பெண்.
சிவகங்கை அரசி வேலு நாச்சியார், தனது கணவர் கொலை செய்யப்பட்ட பின்பு அவரை கைது செய்ய எதிரிகள் தேடியபோது சிவகங்கையில் இருந்து வெளியேறினார்.
வெள்ளையர்களின் படையினர் இவரை நாடு முழுவதும் தேடி கொண்டு இருந்தார்கள். வேலு நாச்சியார் காடுகள் வழியாக சிவகங்கையில் இருந்து வெளியேறும் நேரத்தில் மாடு மேய்க்கும் யாதவர் குல பெண், "உடையாள்" என்ற சிறுமியிடம் நீர் அருந்திவிட்டு சிறிது நேரம் இளைப்பாறிய பின் நன்றி தெறிவித்து, அந்த இடத்தை விட்டு சென்றார். 

சிறிது நேரத்தில் வெள்ளையர்கள் படை அங்கே வந்து யாதவ குல சிறுமியிடம் வேலுநாச்சியார் சென்ற வழியை கேட்டார்கள். "சொல்லவில்லை என்றால் துண்டு துண்டாக வெட்டி விடுவேன்" என மிரட்டினார்கள். துப்பாக்கியுடனும் நவீன ஆயுதங்களுடனும் நின்று கொண்டிருந்த எதிரிகளைப் பார்த்து தைரியமாக தலை நிமிர்த்தி "வெட்டிக் கொன்றாலும் சொல்லமாட்டேன்" என்றாள் உடையாள். சிறுமி என்று கூட பார்க்காமல் முதலில் ஒரு கையை வெட்டினார்கள். அப்படியும் அலட்சியமாக சொல்ல மாட்டேன் என பதில் அளித்தாள் உடையாள். நெஞ்சுரம் கொண்ட அந்த சிறுமியின் தலையை வெட்டி கொலை செய்துவிட்டு அங்கிருந்து சென்றார்கள் வெள்ளையர்களின் படையினர்.

வேலு நாச்சியாருக்கு இந்த செய்தி தெரிய வந்ததும்,அந்த வீரமிக்க உடையாளின் நினைவாக தன்னுடைய பெண்கள் போர் படைப் பிரிவுக்கு "உடையாள் படை பிரிவு" என பெயர் வைத்து அதற்கு தனது பாதுகாவலராக இருந்த குயிலியை தலைவி ஆக்கினார்.

தமிழர்களுக்காக உயிர் தியாகம் செய்ததற்காக உடையாளுக்கு "வெட்டு உடையாள் காளியம்மன்" என்ற கோயிலையும் கட்டி, உண்டியலில் தனது வைர தாலியை சமர்ப்பித்து வணங்கினார் வேலுநாச்சியார்.

வெள்ளை காலனிய ஆதிக்கத்திலிருந்து விடுதலை பெற வேண்டும் என்பதற்காக ஆண், பெண் வேற்றுமையின்றி சமூக பேதங்களின்றி "தமிழர்கள்" என்று அனைவரும் ஒன்றிணைந்து விடுதலையை மட்டுமே குறிக்கோளாகக் கொண்டு போராடினார்கள். தமிழர் தலைநிமிர்ந்து நிற்க ஒரு சின்னஞ்சிறு சிறுமிக்குக்கூட விடுதலை வேட்கை இருந்தது என்பது நமக்கான வரலாற்று படிப்பினையாகும்.

#சிவகங்கை
#வேலுநாச்சியார்
#உடையாள்
#குயிலி
#வெட்டுடையாள்
#காளியம்மன்
#பெண்விடுதலைவீரர்கள்
#இந்தியவிடுதலை
#