சென்னை - தூத்துக்குடி இடையே புதிய எக்ஸ்பிரஸ் ரெயில் சேவை -கனிமொழி எம்.பி. கோரிக்கை

-
சென்னை,
தெற்கு ரெயில்வே பொதுமேலாளர் ஆர்.என்.சிங்கை, தி.மு.க. துணை பொதுச்செயலாளரும், தூத்துக்குடி தொகுதி எம்.பி.யுமான கனிமொழி நேற்று சந்தித்தார்.

அப்போது கோரிக்கைகள் அடங்கிய மனுவை அவர் வழங்கினார்.
கோரிக்கை மனுவில் அவர் கூறியிருப்பதாவது:-

புதிய எக்ஸ்பிரஸ் ரெயில் சேவை * நெல்லை - பாலக்காடு இடையே இயக்கப்படும் பாலருவி எக்ஸ்பிரஸ் ரெயிலை தூத்துக்குடி வரை நீட்டிக்க வேண்டும். அதேபோல மும்பை - மதுரை இடையே இயக்கப்படும் லோக்மான்யா திலக் எக்ஸ்பிரஸ் ரெயிலையும் தூத்துக்குடி வரை நீட்டிக்க வேண்டும்.

* சென்னை-தூத்துக்குடி இடையே முத்துநகர் எக்ஸ்பிரஸ் ரெயில் இயக்கப்பட்டு வருகிறது. இந்தநிலையில் பயணிகள் கூட்ட நெரிசலை தவிர்க்க வேண்டி தஞ்சை, கும்பகோணம் வழியாக சென்னை - தூத்துக்குடி இடையே முன்பு இயக்கப்பட்ட ஜனதா எக்ஸ்பிரஸ் ரெயில் போல,
புதிய எக்ஸ்பிரஸ் ரெயில் சேவை இயக்கப்பட வேண்டும்.

* நெல்லை - தூத்துக்குடி இடையே இருமார்க்கமாக இயக்கப்படும் பாசஞ்சர் ரெயில் சேவைக்கான நேரத்தை 3 மணி நேரத்தில் இருந்து 1½ மணி நேரமாக குறைக்க வேண்டும். விரிவாக்கம் செய்யவேண்டும்

* திருச்செந்தூர் எக்ஸ்பிரஸ் ரெயில் ஆழ்வார் திருநகரி நிறுத்தத்தில் நின்று செல்ல நடவடிக்கை எடுக்க வேண்டும்.

* காயல்பட்டினம், குரும்பூர் ரெயில் நிலையங்களில் நடைமேடை அளவு (21 பெட்டிகள் கொண்ட ரெயில்கள் சென்றுவர) உயர்த்தப்பட வேண்டும்.

* நாசரேத் ரெயில் நிலைய 2-வது நடைமேடையை 18 பெட்டிகள் கொண்ட ரெயில் நின்று செல்லும் வகையில் விரிவாக்கம் செய்ய வேண்டும்.

* தூத்துக்குடியில் இருந்து குருவாயூர் எக்ஸ்பிரஸ் மற்றும் நாகர்கோவில் எக்ஸ்பிரஸ் ரெயில்களை பிடிப்பதற்கு தனியாக ரெயில்கள் இயக்குவதை விடவும், குருவாயூர் எக்ஸ்பிரஸ் இணைப்பு ரெயில் மற்றும் நாகர்கோவில் எக்ஸ்பிரஸ் இணைப்பு ரெயில்களை இயக்க வேண்டும்.

கோவைக்கு நேரடி ரெயில்
* கடந்த 2020-ம் ஆண்டு அக்டோபர் 3-ந்தேதி முதல் இயக்கப்படும் சென்னை - கொல்லம் சிறப்பு ரெயில் முன்பு இருந்தது போன்றே கடம்பூர், வாஞ்சி மணியாச்சி ரெயில் நிலையங்களில் நின்று செல்ல நடவடிக்கை எடுக்க வேண்டும்.

* கடம்பூர் ரெயில்வே 'கேட்' அமைந்திருக்கும் பகுதியில் வாகன போக்குவரத்து அதிகரித்து பெரும் போக்குவரத்து நெரிசல் ஏற்பட்டு வருகிறது. இதற்கு தீர்வு காணும் விதமாக கடம்பூர் ரெயில்வே கேட் அமைந்துள்ள பகுதியில் பறக்கும் பாலம் அமைக்கப்பட வேண்டும்.

* தூத்துக்குடி-கோவை இடையே புதிய எக்ஸ்பிரஸ் ரெயில் இயக்கப்பட வேண்டும்.

* தூத்துக்குடி-மேல்மருதூர் இடையே பயணிகள் ரெயில் இயக்கும் வகையில் புதிய ரெயில்வழித்தட பணிகளை விரைந்து முடிக்க வேண்டும்.

* திருச்செந்தூர் - நெல்லை இடையே தினசரி 4 பயணிகள் ரெயில்கள் இயக்கப்பட நடவடிக்கை எடுக்க வேண்டும். மேம்பாலம், சுரங்கப்பாதை * ஆழ்வார் திருநகரி ரெயில்வே கடவுப்பாதையில் மேம்பாலம் அல்லது சுரங்கப்பாதை அமைக்க வேண்டும்.

* கோவில்பட்டியில் லட்சுமி மில் கேட், இளையரசனேந்தல் ரெயில்வே சாலை, இனாம் மணியாச்சி, தட்சிணாமூர்த்தி தெரு ரெயில்வே சாலை, ராமசாமிதாஸ் பார்க் ரெயில்வே பாதை உள்ளிட்ட இடங்களில் வாகனங்கள் மற்றும் பாதசாரிகள் சிரமமின்றி செல்லும் வகையில் சுரங்கப்பாதை அமைக்க வேண்டும்.

* நிகிலேசன் நகர் 4-வது ரெயில்வே 'கேட்'டில் வடக்கு மற்றும் தெற்கு பகுதிகளை இணைக்கும் வகையில் மேம்பாலம் அல்லது சுரங்கப்பாதை அமைக்க வேண்டும். மேற்கண்ட கோரிக்கைகள் அதில் இடம் பெற்று உள்ளது.

-தினத்தந்தி