நாகர்கோவில் பெண்ணின் உடல் உறுப்புகள் தானம்

by இளவரசன் Thu Apr 09, 2009 10:11 am

நெல்லை: நெல்லையில் மூளைச்சாவை சந்தித்த பெண்ணின் உடல் உறுப்புகள் பலருக்கும் தானமாக வழங்கப்பட்டது.

நாகர்கோவில் அருகேயுள்ள கீழபெருவிளையை சேர்ந்தவர் தினேஷ். மதுரையை சேர்ந்த கலா என்பவரை கடந்த ஆண்டு காதலித்து திருமணம் செய்து கொண்டார். கடந்த 5ம் தேதி தினேசும, கலாவும் வழுக்கம்பாறை கிருஸ்துவ ஆலயத்திற்கு சென்று விட்டு பார்வதிபுரம் வந்து கொண்டிருந்தனர்.

அப்போது எதிரே வந்த அரசு பஸ் மோதியதில் பைக்கில் இருந்து பின்புறமாக சரிந்த கலாவிற்கு தலை பகுதியில் பலத்த காயம் ஏற்பட்டது. தினேஸ் லேசான காயத்துடன் தப்பினார். இதையடுத்து கலாவை நாகர்கோவிலில் உள்ள ஜெயசேகரன் மருத்துவமனையில் சேர்த்தனர்.

மறுநாள் 6ம் தேதி கலா மூளைச்சாவை சந்தித்து விட்டார் என மருத்துவமனை டாக்டர்கள் தெரிவித்தனர். இனி கலாவை காப்பாற்ற முடியாது என நினைத்த தினேஷ் அவரது உடல் உறுப்புகளை தானம் செய்து, அதன்மூலம் பலருக்கு வாழ்க்கை கொடுக்க முன்வந்தார்.

இதற்கான வசதி நாகர்கோவிலில் இல்லாததால் நெல்லைக்கு செல்லுமாறு தினேசிடம் டாக்டர்கள் தெரிவித்தனர். அந்த மருத்துவமனையில் டாக்டர் தேவபிரசாத் நெல்லையில் உள்ள கேலக்ஸி மருத்துவமனை டாக்டர்களுக்கு தகவல் தெரிவித்தார்.

இதைத் தொடர்ந்து 6ம் தேதி இரவு கலாவை நெல்லை மருத்துவமனைக்கு கொண்டு வந்தனர். நரம்பியல் நிபுணர் கணேசன் கலாவை பரிசோதனை செய்தபோது மூளைச்சாவு உறுதி செய்யப்பட்டது.

கலாவின் உடல் உறுப்புகளை தானமாக பெற முடிவெடுத்த டாக்டர்கள் அந்த உடல் உறுப்புகளை பிறருக்கு பொருத்துவதற்காக மதுரை மீனாட்சி மிஷன், சென்னை அப்போல்லோ டாக்டர்களுக்கு தகவல் தெரிவித்தனர்.

இந்த மருத்துவ குழுவினர் நேற்று நெல்லை வந்தனர். நேற்று பிற்பகல் 1 மணிக்கு கேலக்ஸி மருத்துவமனை தலைமை டாக்டர் பாலசுப்பிரமணியன் தலைமையில் டாக்டர்கள் ஆவுடையப்பன், பூர்ணலிங்கம், சவுந்திரராஜன், மயக்கவியல் நிபுணர்கள் கண்ணன், லெட்சுமணன் ஆகியோர் அடங்கிய குழுவினர் 4 மணி நேரத்தில் கலாவின் உடல் உறுப்புகளை அறுவை சிகிச்சை மூலம் எடுத்தனர்.

சிறுநீரகம் அந்த மருத்துவமனையிலேயே சிகிச்சை பெற்று வந்த கிருஸ்டிக்கு பொருத்தப்பட்டது. மற்றொரு சிறுசீரகம் மதுரை மீனாட்சி மீஷன் டாக்டர்களிடம் ஓப்படைக்கப்பட்டது. இதயம், கல்லீரல் ஆகியவை சென்னை அப்பல்லோ டாக்டர் ஆனந்த் கர்கார் தலைமையிலான குழுவிடம் ஓப்படைக்கப்பட்டது.