சங்கம் வளர்த்த தமிழ் தாய்ப்புலவர் காத்த தமிழ்

ஒருமுறை பக்கத்து ஊரில் துலாபாரம் படம் போட்டிருப்பதாகக் கேள்விப்பட்டு படத்துக்குப்போனோம் குடும்பத்தில் மூவர்.
அன்றிலிருந்து கொஞ்ச வருடமாய் சினிமா ஆசையே அற்றுப்போகச் செய்த அத்தனை சோகமான படமது. மகிழ்வாய் ஆரம்பித்த படம் கொஞ்சம் கொஞ்சமாய் சோகமாகி அழுது தவித்து வெளியே விட்ட கதை.
அந்தப்படத்தில் இந்தப்பாடலே அத்தனை சுகமானது.
கதையெல்லாம் சொன்னால் பதிவு நீளும் நேராக கவிஞரின் வரிகளுக்குள் போய்விடலாம்.
*******
சங்கம் வளர்த்த தமிழ்
தாய்ப்புலவர் காத்த தமிழ்
கங்கை கொண்ட எங்கள் தமிழ்
வெல்லும் வெல்லும்
ஒரு காலம் வரும் நல்ல பதில்
சொல்லும் சொல்லும்!
தென்றலுக்குச் சீதனமாய் தேவன் தந்த தமிழ்க்
கன்று குரல் கொண்ட தமிழ் வெல்லும் வெல்லும்
ஒரு காலம் வரும் நல்ல பதில்
சொல்லும் சொல்லும்!
*******
என நாட்டியமாடும் ஒரு மங்கைக்கு பாட்டுச் சொல்லும் பாவணையில் காதலில் விழுந்த நாயகனும்,நாயகியும் சங்கம் வளர்த்த தமிழ் வெல்லுமெனும் நம்பிக்கை வரியில் பல்லவியைத் தொடங்கி அடுத்து
*********
செவ்வரி யோடிய கண்களி ரெண்டினில்
சேலொடு வேலாட!
இரு கொவ்வை இதழ்களும்
கொத்து மலர்களும்
கொஞ்சி மகிழ்ந்தாட!
********
எனக் காதலன் நாட்டியத்துக்கு வரி சொல்வதுபோல் தன் காதலியின் அழகை ரசித்துச்சொல்ல.
அவளோ..
********
தெய்வ ரதத்தினைச் சேலை மறைத்திட
சிற்றிடை தள்ளாட
நடை சிந்து படித்தவள்
பந்து பிடித்தனள் முந்தி எழுந்தாட..!
*******
எனக் காதலன் சொன்னதை இல்லையென மறுக்காமல் அவளழகை அவளே மகிழ்வாய் சொன்னபின்.
*******
சந்தம் நிறைந்த தமிழ்
சங்கீதம் பாடும் தமிழ்
சிந்து பல கொண்ட தமிழ்
வெல்லும் வெல்லும்.
******
என அங்கே அங்க வர்ணிப்போடு அப்படியே நின்றுவிடாமல் அவன்
தமிழின் பெருமை சொல்லி முடித்ததும்.
அவளோ விட்டதைத் தொடர்வாள்
********
தோட்டத்திலே தென்னை இரண்டு
முற்றித் திரண்டு பக்கம் உருண்டு
கண்ணில் தூக்கி நிறுத்திய விருந்து
******
என்றதும்
அடடா..! என அவன் வியந்து
******
அதைத் தொட வோடிய
விழியோ டொரு விழிமோதிய கணமே
எனைத் தாக்கித் தகர்த்தவை இரண்டு
பக்கம் உருண்டு முற்றித் திரண்டு
என்னைத் தாங்க அழைத்திட்ட விருந்து!
*********
என்று சங்கம் வளர்த்த அத் தமிழில் சுவையூரிய சொற்களையெடுத்துச் சொல்லிவிட்டு அச் சரணத்தின் இரண்டாம் பாகத்தில்.
********
காலமெனும் ஆற்றினிலே
கையெடுத்து நீந்திவந்து
கோடிமலர் தேடி வந்து வெல்லும் வெல்லும்
உயர் கோபுரத்தில் ஏறி நின்று
சொல்லும் சொல்லும்.
******
என்று ஒருவருக்கொருவர் இன்ப வயப்பட்டு எடுத்துச் சொன்ன இரு சரணத்தின் முடிவில் இருவரும் இணைந்து.
*******
சந்தம் நிறைந்த தமிழ்
சங்கீதம் பாடும் தமிழ்......
****
எனப் பாடிமுடிப்பர் அப் பாடலை.
இந்தப் பாடலில் இருக்கும் சிறப்பையெல்லாம் சொல்ல ஒரு பதிவு பத்தாது.
சங்கம் வளர்த்த தங்கத் தமிழெடுத்து தமிழைப் புகழ்ந்து, காதலில் நுழைந்து, காமத்தில் நனைந்து, கேட்போரையும் தமிழால் நனைத்து சந்த வரிகளை தந்த கவி யாராக இருப்பார் ? நம்ம அப்பச்சி கண்ணதாசனேதான்.
ஜி.தேவராஜன் அவர்களின் இசையில் டி.எம்.எஸ் &சுசிலா பாடிய துலாபாரம் படத்தில்தான் இப்பாடல்.
(சொன்னதைச் சொன்னாலும் மீண்டும்)
இன்னும் சொல்ல வருகிறேன்
வாஞ்சையுடன் உங்கள்
வளநாடன்.
(முகநூலில் படித்தது)