பிரிட்டன் பிரதமரின் அசத்தலான பொங்கல் வாழ்த்து; உற்சாகத்தில் தமிழர்கள்!

by **T.N.Balasubramanian** Fri Jan 15, 2021 3:36 pm

தமிழர்களுக்கு பொங்கல் வாழ்த்து கூறி பிரிட்டன் பிரதமர் வீடியோ ஒன்றை வெளியிட்டுள்ளார்.

பிரிட்டன் பிரதமரின் அசத்தலான பொங்கல் வாழ்த்து; உற்சாகத்தில் தமிழர்கள்! Samayam-tamil

பிரிட்டன் பிரதமர் போரிஸ் ஜான்சன் தனது ட்விட்டர் பக்கத்தில் வெளியிட்டுள்ள வீடியோவில், பிரிட்டனில் வசிக்கும் தமிழ்ச் சமூகத்தினர் அனைவருக்கும் வணக்கம். இனிய தைப் பொங்கல் திருநாள் வாழ்த்துக்கள். இன்றைய தினத்தை பொங்கல் வைத்து இயற்கைக்கு நன்றி சொல்லும் திருநாளாக கொண்டாடுகிறீர்கள். நானும் உங்களுக்கு நன்றி தெரிவித்துக் கொள்கிறேன். கொரோனா காலத்தில் உங்களின் ஒத்துழைப்பிற்காக. ஏனெனில் இந்த இக்கட்டான சூழலில் அனைவரது கடின உழைப்பும், தீவிரமான கட்டுப்பாடுகளும் மிகுந்த நன்மையை ஏற்படுத்தி வருகின்றன.

இங்கிலாந்தின் தேசிய சுகாதார சேவையில் தமிழ் மருத்துவர்களின் பங்கு அளப்பறியது. இவர்கள் முன்களப் பணியாளர்களாக தங்கள் சேவையை ஆற்றி வருகின்றனர். வியாபாரத்தில் பல்வேறு தியாகங்களைச் செய்துள்ளீர்கள். இதுவரை காணாத வகையில் உறவினர்களுடன் ஒன்று கூடி இந்த பண்டிகையை கொண்டாட முடியாத சூழலில் இருக்கிறோம்.

தொடருகிறது.

by **T.N.Balasubramanian** Fri Jan 15, 2021 3:38 pm

தொடர்ச்சி
இது எவ்வளவு வேதனையான விஷயம் என்று எனக்குத் தெரியும். அனைவரும் நம்பிக்கையுடன் இருங்கள். இந்த அற்புதமான பண்டிகையில் தங்களைப் புதுப்பித்துக் கொண்டு நம்பிக்கையுடன் நடைபோடுங்கள். ஒவ்வொரு நாளும் ஏராளமானோருக்கு தடுப்பூசி போடப்பட்டு வருகிறது. இதன்மூலம் பலரும் கொரோனாவில் இருந்து தங்களைப் பாதுகாத்துக் கொள்ளும் நிலையை அடைந்து கொண்டிருக்கின்றனர்.

எனவே தற்போதைய மோசமான காலகட்டத்தில் இருந்து மீண்டு புதிய தொடக்கத்திற்கு வித்திடுவோம். இதையொட்டி இங்கிலாந்தில் உள்ள தமிழர்கள் மற்றும் உலகெங்கும் வாழும் தமிழர்கள் அனைவருக்கும் எனது வாழ்த்துக்களைத் தெரிவித்துக் கொள்கிறேன்.

நீங்கள் வைக்கும் பொங்கலில் இருந்து மகிழ்ச்சி, உற்சாகம், செழுமை ஆகிய பொங்கி வரட்டும் என்று போரிஸ் ஜான்சன் குறிப்பிட்டுள்ளார். இது சமூக வலைதளங்களில் வைரலாகி வரும் சூழலில், பிரதமரின் வாழ்த்துச் செய்தியால் தமிழர்கள் மிகுந்த மகிழ்ச்சி அடைந்துள்ளனர்.

நன்றி சமயம்