அமெரிக்கா, பிரிட்டனை விட சீனாவுக்கான ஏற்றுமதி அதிகரிப்பு

-

மும்பை :
ஊரடங்கு தளர்வுகளுக்குப் பின், நாட்டின் ஏற்று மதி அதிகரித்து
வரும் நிலையில், சீனாவுக்கான ஏற்றுமதி வளர்ச்சி, 78 சதவீதமாக
உயர்ந்திருக்கிறது. அதேசமயம் அமெரிக்கா, பிரிட்டன் உள்ளிட்ட
நாடுகளுக்கான ஏற்றுமதி சரிந்துள்ளன.

கடந்த ஏப்ரல் மாதத்தில் நாட்டின் ஏற்றுமதி வளர்ச்சி,
மைனஸ் 60.2 சதவீதம் அளவுக்கு சரிந்த நிலையில், ஜூலையில்
மைனஸ் 10.2 சதவீதம் என்ற அளவுக்கு மீட்சியை கண்டது.தொடர்ந்து
தளர்வுகள் அறிவிக்கப்பட்டு, பொருளாதார செயல்பாடுகள் அதிகரித்து
வரும் நிலையில், நாட்டின் ஏற்றுமதியும் அதிகரிக்க துவங்கி இருக்கிறது.

ஏற்றுமதி வீழ்ச்சியில், மே மாதத்தில் 50 சதவீதம் அளவுக்கும்;
ஜூன் மாதத்தில், 30 சதவீதம் அளவுக்கும் மீட்சி ஏற்பட்டுள்ளது.
ஜூலை மாதத்தில் நிலைமைகள் முற்றிலும் மாறி, சீனாவுக்கான
ஏற்றுமதி, 78 சதவீதமாகவும், மலேஷியாவுக்கு, 76 சதவீதமாகவும்
அதிகரித்துள்ளது.
இந்த காலகட்டத்தில், அங்கு கொரோனா பாதிப்புகள் வீழ்ச்சி
அடைந்திருந்தன.

நாட்டின் ஏற்றுமதியில், கிழக்கு ஆசிய நாடுகளின் பங்களிப்பு,
16 சதவீதமாக உள்ளது குறிப்பிடத்தக்கது. ஆனால், மேற்கு
நாடுகளுக்கான ஏற்றுமதி குறைந்துள்ளது. குறிப்பாக அமெரிக்கா,
பிரேசில், பிரிட்டன் ஆகிய நாடுகளுக்கான ஏற்றுமதியில் சரிவு
ஏற்பட்டுள்ளது. அந்நாடுகளில் கொரோனா பரவல் அதிகரித்து,
அவற்றை கட்டுப்படுத்த இயலாமல் தடுமாறிக் கொண்டிருந்தது,
ஏற்றுமதி சரிவுக்கு ஒரு காரணமாக அமைந்தது.

ஐக்கிய அரபு நாடுகளுக்கான ஏற்றுமதி, மைனஸ் 53.2 சதவீதமாகவும்;
பிரிட்டனுக்கான ஏற்றுமதி மைனஸ் 38.8 சதவீதமாகவும்;
அமெரிக்காவுக்கானது மைனஸ் 11.2 சதவீதமாகவும்; பிரேசிலுக்கானது
மைனஸ் 6.3 சதவீதமாகவும் சரிவைக் கண்டன. இதை வைத்து பார்க்கும்
போது, ஏற்றுமதி செய்யப்படும் நாடுகளின் நிலைக்கு ஏற்ப,
நிலைமைகளில் ஏற்ற இறக்கங்கள் ஏற்பட்டுள்ளது தெரியவந்துள்ளது.

சீனாவை பொறுத்தவரை, கொரோனா பாதிப்பு, மற்ற நாடுகளை விட
மிகவும் முன்பாகவே ஏற்பட்டு, சீராகிவிட்டது. இதனால் அதன்
பொருளாதாரம், ஜூன் காலாண்டில், 3.2 சதவீத வளர்ச்சியை கண்டது.
ஆனால், பிற நாடுகள் பலத்த சரிவைக் கண்டன.

பொருட்களின் அடிப்படையில் பார்க்கும்போது, இரும்பு தாது ஏற்றுமதி,
63 சதவீதம் அளவுக்கும்; அரிசி, 33 சதவீதமும்; மசாலா பொருட்கள்,
23 சதவீதமும்; ரசாயனம், 19 சதவீதமும்; மீன், 11 சதவீதமும்; மருந்து,
10 சதவீத மும் மீட்சி கண்டுள்ளன.

சீனாவிலிருந்து வரும் இறக்குமதி, இந்த ஆண்டின் துவக்கத்தில் இருந்தே
குறைந்து, ஜூன் மாதத்தில், மைனஸ் 60 சதவீதம் அளவுக்கு சரிந்துவிட்டது.
இதையடுத்து, நாட்டின் வர்த்தக பற்றாக்குறையும் பெருமளவு சரிந்தது.

தினமலர்