அமெரிக்கா – கொரோனா படுத்தும் பாடு

by **ayyasamy ram** Tue Aug 11, 2020 6:04 pm

அமெரிக்காவின், கலிபோர்னியா மாகாணம்,
சான்பிரான்சிஸ்கோ நகரிலிருந்து நண்பர் ஒருவர்
போன் செய்தார்.

சென்னை, ஐ.ஐ.டி.,யில் விரிவுரையாளராக உள்ளார்.
மகள், அவ்வூரில் படிக்கிறார் என்பதால், மனைவி
சகிதமாய் அங்கு சென்றிருக்கிறார்.

‘கொரோனா’வால், சர்வதேச விமான சேவை
துண்டிக்கப்பட்டுள்ளதால், அங்கேயே தங்கி இருக்கிறார்.

‘என்னது… மதிய நேரத்தில் போன் செய்யறாரே…
அங்கே, நடுநிசியா இருக்குமே…’ என்றபடியே, போனை
எடுத்தேன்.

‘அந்து… ‘சேப்’ தானே…’ என, குசலம் விசாரித்தார்.

‘நான் நல்லா இருக்கேன்… நீங்கல்லாம் பத்திரமா
இருக்கீங்களா… எப்ப சென்னை வர்றீங்க…’ எனக் கேட்டது
தான் தாமதம், ‘படபட’வென கொட்டித் தீர்த்து விட்டார்.

‘நீங்கல்லாம் குடுத்து வெச்சவங்க பா… இங்கே ரொம்ப,
‘டேஞ்ஜர்…’ எல்லாரும் வெளியே சுத்தறாங்க… யாருக்கு
, ‘கொரோனா’ இருக்கு, இல்லேன்னு தெரியலே…

‘ஏன் இப்படி சுத்தறாங்கன்னா, கையில காசு இருந்தா தான்,
வாயில தோசை! காசு இல்லையா… பட்டினி தான்!
சேமிப்பு பழக்கமே கிடையாது… மிகப்பெரிய, ஓட்டல் ஓனர்
கூட, தெருவுக்கு வந்துட்டாருன்னா பார்த்துக்குங்க…

‘நாங்க தங்கி இருக்கிற வீட்டு வாசல்ல உட்கார்ந்திருந்தாரு…
‘என்னாச்சு… ‘மெடிக்கல் ஹெல்ப்’ வேணுமா?’ன்னு கேட்டேன்.

‘இல்லே… பசிக்குது… நான் மிகப்பெரிய உணவகம்
நடத்திட்டிருந்தேன். எல்லாரும் வேலைக்குப் போறாங்க.
ஆனா, உணவகத்தை நம்பி இருக்கிறதில்லை.

வீட்லயே சமையல் செய்து சாப்பிட்டுக்கிறாங்க. 1௦ நாளா,
உணவகம், ‘வெறிச்’சுன்னு கிடக்கு. வருமானம் இல்லாம,
எனக்கே சாப்பாட்டுக்கு வழியில்லே…’ என்றார்.

பரிதாபமாக இருந்தது. என் கையில் இருந்த ரொட்டியையும்,
வெண்ணெயையும் கொடுத்து அனுப்பினேன்.

‘இது இப்படீன்னா, நோய்வாய்ப்பட்டா திண்டாடுறாங்க பா…
சொல்லி மாளலே… ‘கிளினிக்’கெல்லாம் ரொம்ப துாரமா
இருக்கு… யாரையும் சேர்க்கறதில்லே… ‘மெடிக்கல் ஷாப்’ல
எல்லா மருந்தும், யானை விலை, குதிரை விலை…

‘நம்மூர்ல கிடைக்கிற மாத்திரை, அதே மூலக்கூறோட,
இங்கே மூணு மடங்கு விலை கொடுத்தா தான் கிடைக்கும்.
‘காய்ச்சலா இருக்கு; வரலாமா’ன்னு, ‘கிளினிக்’குக்கு போன்
செஞ்சா, ‘வரவே வராதீங்க… ‘கொரோனா’வா இருக்கும்…
நீங்க, வெளியவே வரக் கூடாது’ன்னு சொல்லி,
அடுத்த வார்த்தை நாம பேசுறதுக்குள்ள, போனை
வச்சிடறாங்க…

‘திடீர் திடீர்ன்னு எல்லாம் செத்துப் போறாங்க…
குலை நடுங்குது… வெளியே போகவே பயமா இருக்கு…
நம்மூர்ல, வீட்டுக்கு வீடு, ‘டெஸ்ட்’ எடுக்கிறாங்களாமே…
‘கொரோனா பாசிட்டிவ்’னு, ‘ரிசல்ட்’ வந்தா,
ஆஸ்பத்திரிலேர்ந்தே கூப்டுறாங்களாமே… ஆம்புலன்ஸ்ல
கூட்டிட்டுப் போறாங்களாமே…
இங்கே, எல்லாமே தலைகீழ் பா… நரகம்… எப்படாப்பா
நம்மூருக்கு வருவோம்ன்னு இருக்கு…’

இப்படிக் கூறி முடித்தார்.
‘அமெரிக்கா… அமெரிக்கா’ன்னு, துாக்கி வைத்து
கொண்டாடுபவர்களுக்கு இது ஒரு பாடம்!
-
-------------------
அந்துமணி பா.கே.ப.,- வாரமலர்