தென் ஆப்ரிக்கா - ஆலோசனை கேட்காத அரசு மீது வல்லுனர்கள் கடும் அதிருப்தி

ஜோகனஸ்பர்க்;
தென் ஆப்ரிக்காவில், ஆலோசனை கேட்காமல் ஊரடங்கை அமல்படுத்தியதால்,
வல்லுனர்களுக்கும், அரசுக்கும் இடையே வார்த்தைப் போர் வெடித்து உள்ளது.

தென் ஆப்ரிக்காவில், கொரோனா வைரசால் பாதிக்கப்பட்டோர் எண்ணிக்கை,
15 ஆயிரத்து, 515 ஆக அதிகரித்துள்ளது. பலி எண்ணிக்கை, 264 ஆக உயர்ந்துள்ளது.
இதற்கிடையே, வைரஸ் பரவலை தடுக்க, அதிபர் சிரில் ரமாபோசா அரசு,
ஊரடங்கை அமல்படுத்திஉள்ளது.

இதற்கு, அந்நாட்டு வல்லுனர்கள், கடும் எதிர்ப்பு தெரிவித்துள்ளனர்.
கட்டுப்பாடுகளை தளர்த்தாததால், நாட்டில் வறுமை அதிகரிக்க வாய்ப்புள்ளதாகவும்,
பொருளாதாரம் சீர்குலையும் அபாயம் ஏற்பட்டுள்ளதாகவும், அவர்கள் எச்சரித்துள்ளனர்.

அமைச்சர் அறிவுரை குழு உறுப்பினரும், தென் ஆப்ரிக்க மருத்துவ ஆராய்ச்சி கவுன்சில்
தலைவருமான டாக்டர் கிலென்டா கிரே நேற்று கூறுகையில், “ஊரடங்கை உடனடியாக
தளர்த்த வேண்டும். “வல்லுனர்களின் ஆலோசனையைக் கேட்டு, இந்த நடவடிக்கை
எடுக்கப்படவில்லை,” என்றார். இதர உறுப்பினர்களும், கிலென்டாவின் கருத்துக்கு ஆதரவு
தெரிவித்துள்ளனர்.

இதையடுத்து, சுகாதாரத்துறை பொது இயக்குனர், டாக்டர் அன்பன் பிள்ளை கூறியதாவது:

கிலென்டா கிரேவின் அறிக்கை, ஆச்சரியமளிக்கிறது. ஊரடங்கு அமல்படுத்துவதில்,
அறிவுரைக் குழுவுக்கு அதிகாரம் இல்லை. மருத்துவ பேராசிரியராக இருக்கும்
கிலென்டா, ஊரடங்கு குறித்து அறிந்திருக்கமாட்டார். எந்த பிரச்னை ஏற்பட்டாலும்,
அதற்கு அரசே பொறுப்பேற்கும்; கிலென்டா பொறுப்பேற்க மாட்டார்.
இவ்வாறு, அவர் கூறினார்.

இந்தியாவில் இருந்து 200 பேரை மீட்க திட்டம்

இந்தியாவில் ஊரடங்கு அமலில் உள்ளதால், தென் ஆப்ரிக்க நாட்டினர்,
200க்கும் மேற்பட்டோர், தங்கள் சொந்த நாட்டிற்கு திரும்ப முடியாமல் தவித்து
வருகின்றனர். இந்நிலையில், சிறப்பு விமானம் மூலம் அவர்கள் அனைவரையும்
மீட்க, தென் ஆப்ரிக்க அரசு திட்டமிட்டுள்ளது. வரும், 22ம் தேதி, டில்லி மற்றும்
மும்பையில் உள்ள தென் ஆப்ரிக்க குடிமக்கள், விமானம் மூலம் அழைத்துச்
செல்லப்படவுள்ளனர்.
-
தினமலர்