புதிய இசை கருவிகளில் ஸ்ருதி இருப்பதில்லை! 'புல்புல் தாரா' கலைஞர் ஜவஹர் வருத்தம்

தமிழ் சினிமாவில், 1950 -- 1965 கால கட்டத்தில், 'புல்புல் தாரா' எனும் இசைக்கருவியின் பங்களிப்பு இல்லாமல், பாடல்கள் இருக்காது. சிறிய அளவிலான கீ போர்டில், கம்பியை வைத்து இசைப்பது போன்ற கட்டமைப்பில் இருக்கும் இக்கருவியை, தற்போது வாசிப்பவர்கள் மிக அரிது.

இந்த புல்புல் தாரா இசைக் கருவியை, 50 ஆண்டுகளாக மேடைகளில் இசைத்து வருபவர் கே.ஜி.ஜவஹர், 65. சாலிகிராமத்தில் உள்ள அவரது வீட்டிற்கு சென்று சந்தித்தோம். நம்மிடம் பேச துவங்குவதற்கு முன், 'புல்புல் தாரா இசைக்கருவியில், சிறிது நேரம் இசையை கேளுங்கள்' எனக்கூறி, 'நான் ஆணையிட்டால்... அதோ அந்த பறவை போல வாழ வேண்டும்...' போன்ற, எம்.ஜி.ஆர்., பாடல்களை இசைத்துக் காண்பித்தார்.

தேசிய கீதத்தை, இக்கருவியில் இசைப்பது குறித்து, நமக்கு கற்றுக் கொடுத்து வியக்க செய்தார்.
அவரிடம் பேசியதிலிருந்து...

உங்களை பற்றி?

சொந்த ஊர் திருநெல்வேலி. கனரா வங்கியில் பணிபுரிந்து ஓய்வு பெற்றேன். சாலிகிராமத்தில், 25 ஆண்டுகளாக வசிக்கிறேன். பத்திரிகை துறையில் ஆர்வம் அதிகம். பல தலைவர்களை
நேர்காணல் செய்து உள்ளேன். பல கதைகள், கட்டுரைகளை எழுதி உள்ளேன்.

'புல்புல் தாரா' இசைக்க ஆர்வம் வந்தது எப்படி?

அந்த காலத்தில், அனைவர் வீட்டிலும் காணும் பொருளாக புல்புல் தாரா இருந்தது. என்
வீட்டிலும் இருந்தது. நான் இளம் வயதில் இருந்து, இந்த இசைக்கருவியை பயன்படுத்த துவங்கினேன். எனக்கு, இசையில் முறையான பயிற்சி இல்லை.

புல்புல் தாரா வாசிக்க, தானாகவே கற்றுக் கொண்டேன். ஐந்து நிமிடங்களில் உங்களுக்கும்
என்னால் கற்பிக்க முடியும். மலிவானதாக இருந்ததால், புல்புல் தாராவை, 'ஏழை மனிதனின் வீணை' என, அழைப்பர்.

எத்தனை ஆண்டுகளாகபுல்புல் தாரா இசைக்கருவியுடன் பயணிக்கிறீர்கள்?

கடந்த, 50 ஆண்டுகளாக, 300க்கும் மேற்பட்ட மேடைகளில், புல்புல் தாரா இசை நிகழ்ச்சிகள் நடத்தி வருகிறேன். ஆதரவற்ற குழந்தைகள் இல்லங்களிலும் இசைத்துள்ளேன்.ஒரு முறை, தேசிய அளவில் வங்கிகள் இடையேயான இசை போட்டியில், புல்புல் தாரா இசைத்து, முதல் பரிசு வென்றேன். வீணைக்கு இரண்டாவது பரிசு தான் கிடைத்தது.

விரும்பி அழைத்தால், நிகழ்ச்சிகளுக்கு செல்வேன். 2008 -- 09ம் ஆண்டிற்கான, 'புல்புல் தாரா கலைஞர்' என, தமிழக அரசின், 'கலை நன்மணி' விருதை பெற்றுள்ளேன்.

தமிழ் சினிமாக்களில்,புல்புல் தாரா இசைக்கருவி பயன்பாடு எப்படி?

பழைய தமிழ் படங்களில், புல்புல் தாரா இசை கருவி இன்றி பாடல்கள் கிடையாது. 1952ல்,
பராசக்தி; 1954ல், அந்த நாள்உள்ளிட்ட பழைய படங்களின் பாடல்களில், இந்த இசைக்கருவி பயன்படுத்தப்பட்டுள்ளது.

சினிமா வாய்ப்புகள் உள்ளதா?

சில வாரங்களுக்கு முன், இயக்குனர் பாக்யராஜ், என்னை அழைத்து, ஒரு பாடலை கொடுத்து புல்புல் தாராவில் இசைத்து தர கேட்டார். இசை அமைத்து அனுப்பியுள்ளேன். நான் எதிர்பார்க்காத புகழை, அது எனக்கு பெற்றுக் கொடுத்தது. என் குழந்தை போல், இந்த இசைக்கருவியை பாதுகாத்து வருகிறேன்.

அரிதான இந்த இசைக்கருவியின் தற்போதைய நிலை?

இந்த இசை கருவி, தற்போது கிடைப்பது அரிது. புதிதாக வரும் கருவிகளில், ஸ்ருதி
இருப்பதில்லை. என்னிடம் இருக்கும் கருவியில் உள்ள கம்பியை மாற்றி, 30 ஆண்டுகள் ஆகின்றன. இதன் கம்பிகள், தற்போது கிடைப்பதில்லை. இளைஞர்களிடம், இப்படி ஒரு இசைக்கருவி இருந்தது என்பதை பதிவு செய்ய விரும்புகிறேன்.

- நமது நிருபர் --தினமலர்