'ஏர் இந்தியா'வை வாங்க, 'டாடா' தீவிரம்

மும்பை:
'டாடா சன்ஸ்' நிறுவனம், 'ஏர் இந்தியா'வை வாங்கப் போவது,
கிட்டத்தட்ட உறுதியாகிவிட்டதாக சொல்லப்படுகிறது.

பொதுத்துறை நிறுவனமான, ஏர் இந்தியாவின், 100 சதவீத
பங்குகளையும் விற்பனை செய்ய தயார் என, மத்திய அரசு
அண்மையில் அறிவித்தது. இதையடுத்து, டாடா சன்ஸ்
நிறுவனம், ஏர் இந்தியாவை வாங்கும் முயற்சியில் தீவிரமாக
இறங்கி உள்ளது.

இதற்காக, சிங்கப்பூர் ஏர்லைன்ஸ், ஏர் ஆசியா இந்தியா,
ஏர் இந்தியா எக்ஸ்பிரஸ் ஆகிய நிறுவனங்களின் கூட்டணியை
உருவாக்கவும், டாடா சன்ஸ் திட்டமிடுகிறது.


டாடா சன்ஸ், சிங்கப்பூர் ஏர்லைன்ஸ் நிறுவனத்தின் கூட்டுடன்,
ஏர் இந்தியாவை வாங்குவதற்கான முயற்சிகளில், ஏற்கனவே
இறங்கி விட்டதாகச் சொல்லப்படுகிறது. டாடா விஸ்டாரா விமான
நிறுவனத்தில், டாடா நிறுவனத்துக்கு, 51 சதவீத பங்குகளும்,
சிங்கப்பூர் ஏர்லைன்ஸுக்கு, 49 சதவீத பங்குகளும் உள்ளன
என்பது குறிப்பிடத்தக்கது.

மேலும் ஏர் ஆசியா இந்தியா, ஏர் இந்தியா எக்ஸ்பிரஸ்
ஆகியவற்றையும் இணைத்துக்கொள்ளும் முயற்சியில்
டாடா சன்ஸ் இறங்கி உள்ளது.

ஏர் ஆசியா இந்தியா நிறுவனத்தில், டாடா சன்ஸ், 51 சதவீத
பங்குகளை வைத்திருக்கிறது. மீதி, 49 சதவீத பங்குகள்
மலேஷியாவை சேர்ந்த தொழிலதிபரான, டோனி பெர்னாண்டஸ்
வசம் உள்ளது.ஏர் இந்தியா எக்ஸ்பிரஸ் நிறுவனத்தை வாங்குவதற்கு,
டோனி பெர்னாண்டஸ் சம்மதமும் தேவை என்பதால், அவருடனும்
ஆலோசனை நடத்தப்பட்டு வருகிறது.

ஒப்பந்தப்படி, டோனி பெர்னாண்டஸ் சம்மதம் இல்லாமல் வேறு
பட்ஜெட் விமான நிறுவனத்தில், 10 சதவீதத்துக்கு மேல் டாடாவால்
முதலீடு செய்ய முடியாது.

இத்தகைய முயற்சிகளை வைத்துப் பார்க்கும்போது,
ஏர்ஆசியா இந்தியா, ஏர் இந்தியா எக்ஸ்பிரஸ் ஆகியவற்றை
ஒன்றிணைத்து, சிங்கப்பூர் ஏர்லைன்ஸ் கூட்டுடன்,
ஏர் இந்தியாவை டாடா சன்ஸ் வாங்க போவது உறுதி என,
தெரிகிறது.

ஏர் இந்தியாவை வாங்க விரும்பும் நிறுவனங்கள்,
மார்ச், 17ம் தேதிக்குள் தெரிவிக்க வேண்டும்.

தினமலர்