பாப்பரசரையே தள்ளி வீழ்த்திய பெண்மணி

நத்தார் அதிகாலை சுமார் 500 வீடுகளில் திருட்டு
போலீசாரையே அடித்த திருடரின் வீறாப்பு.. பாப்பரசர்
நத்தார் விசேட ஆராதனைக்காக செங்கம்பள விரிப்பின் வழியே நடந்து வரும்போது
சிவப்பு நிற கோட் அணிந்த பெண்மணி ஒருவர் கூட்டத்தில் இருந்து பாய்ந்து ஓடி
பாப்பரசரை நிலத்தில் தள்ளி வீழ்த்தினார். இதனால் பெரும் அல்லோலகல்லோலம்
ஏற்பட்டது.நேற்று நத்தார் மாஸ் வழிபாடுகளுக்காக சென்று கொண்டிருந்த
பாப்பரசரை பெண்மணி ஒருவர் தள்ளி வீழ்த்திய நிகழ்வு வத்திக்கானில்
நடைபெற்றுள்ளது. நிலத்தில் வீழ்ந்த 82 வயதான பாப்பரசர் மறுபடியும் தன்னைச்
சுதாகரித்துக்கொண்டு எழுந்துள்ளார். அதேவேளை பாப்பரசரின் அருகில் வந்த
கார்டினல் றோஜர் வற்செரினை அப்பெண்மணி தாக்கினார். இதனால் இவர்
வைத்தியசாலை கொண்டு செல்லப்பட்டார். பெண்மணி போலீசாரால் கைது
செய்யப்பட்டுள்ளார். இவர் மனோநிலை குழம்பிய ஒருவர் என்று கூறப்படுகிறது.
இதேபோல இத்தாலிய பிரதமர் சில்வியோ பலர்ஸ்கோனி தாக்கி பல்லுடைக்கப்பட்ட
நிகழ்வு சில தினங்களுக்கு முன் நடைபெற்றது. அந்தவகையில் பாப்பரசர் மீது
நடாத்தப்பட்ட தாக்குதல் இத்தாலியில் இடம் பெற்ற இரண்டாவது நிகழ்வாகிறது.இது
இவ்விதமிருக்க டென்மார்க் ஊடகங்கள் நத்தார் இரவில் அதிக திருடர்கள்
வருவார்கள் என்ற எச்சரிக்கையை வழங்கியும் திருட்டைக் குறைக்க முடியவில்லை.
இவ்வாண்டும் எதிர் பார்த்ததைவிட அதிகமான நத்தார் இரவு திருட்டுக்கள்
நடைபெற்றுள்ளதாக இன்றய காலை நேர போலீஸ் தகவல்கள் கூறுகின்றன. இன்று
அதிகாலைவரை மொத்தம் 500 வீடுகள் உடைத்துத் திருடப்பட்டுள்ளதாக
முறைப்பாடுகள் வந்துள்ளன. முன்னைய கணிப்புக்களின்படி 450 வீடுகள் வரை
உடைக்கப்படலாம் என்று காப்புறுதிக் கூட்டுத்தாபனக் கணிப்புக்கள்
தெரிவித்திருந்தன. இந்த வேகத்தில் சென்றால் நத்தார் கொண்டாட்டங்கள்
களைகட்டும் மூன்று தினங்களும் 1000 வீடுகள் திருடர்களினால் பதம்
பார்க்கப்படும் என்று கூறப்படுகிறது. மேலும் ரஸ்ரப் நகரில் திருடிக்
கொண்டிருந்த இருவரை போலீசார் மடக்கிப் பிடித்தனர். இவர்களில் ஒருவர்
போலீசாரை தாக்கியுள்ளார். திருடரிடம் அடி வேண்டி அவர்களை மடக்க வேண்டிய
நிலை ஏற்பட்டமை குறிப்பிடத்தக்கது. கடந்த மூன்று ஆண்டு காலத்தில்
டென்மார்க்கில் நத்தார் கால திருட்டு 70 வீதம் அதிகரித்துள்ளது.