தமிழகத்தில் பரவலாக மழை

சென்னை தமிழகம் முழுவதும் பல்வேறு மாவட்டங்களில்
பரவலாக மழை பெய்தது.

கோடை வெயில் சுட்டெரித்து வரும் நிலையில் தமிழகத்தில்
உள்மாவட்டங்களில் மழை பெய்ய வாய்ப்பு உள்ளதாக சென்னை
வானிலை ஆய்வு மையம் தெரிவித்திருந்தது.

இந்நிலையில் நெல்லை, விருதுநகர் , திண்டுக்கல், தேனி ,
நீலகிரி, திருச்சி உள்ளிட்ட மாவட்டங்களில் மழை பெய்தது.

திருநெல்வேலி:

தென்காசி மற்றும் அதன் சுற்றுவட்டார பகுதிகளான செங்கோட்டை,
விகேபுரம், சேரன் மாதேவி உள்ளிட்ட பகுதிகளில் இடி மின்னலுடன்
மழை பெய்தது.

விருதுநகர்:

விருதுநகர் மாவட்டம் ஸ்ரீவில்லிபுத்தூர் பகுதியில் மழை பெய்தது.
மின்னல் தாக்கி இடி விழுந்த விபத்தில் அப்போது பட்டாசு ஆலை
ஒன்றில் இருந்த அறை இடிந்து விழுந்தது.மேலும் வி கோவில்பட்டி
பகுதியில் சுவர் இடிந்து விழுந்து 20-க்கும் மேற்பட்ட ஆடுகள்
பலியாயின.

தேனி மாவட்டம்

தேனி மாவட்டம் பெரியகுளம்,வடுகபட்டி, மேல்மங்கலம்,
லட்சுமிபுரம், தேவதானபட்டி, கும்பக்கரை உள்ளிட்ட சுற்றுவட்டார
பகுதிகளில் பலத்த காற்றுடன் மழை பெய்கிறது.

திண்டுக்கல்:

கொடைக்கானல் சுற்றுவட்டார பகுதியில் ஆலங்கட்டி மழை பெய்தது.
திருச்சி சுற்றுவட்டாரத்தில் மழை மிதமான மழை பெய்தது.

ஈரோடு:

சத்திய மங்கலம் அருகே சூறை காற்று வீசியதில் செண்பக புதூர்
பகுதியில் போக்குவரத்து பாதிப்பு ஏற்பட்டது.

நீலகிரி :

நீலகிரி மாவட்டம் ஊட்டி, குன்னூர் பகுதிகளில் மழை பெய்தது.

தமிழகத்தில் வெயில் சதம்

தமிழகம் முழுவதும் 8 இடங்களில் வெயில் சதம் அடித்தது.
இதன்படி திருச்சியில் 107.2, மதுரை 106.8, திருத்தணி 106.7,
வேலூர் 106.3, பரமத்தி வேலூர் 105.8, நெல்லை 104.5, சேலம் 101.1,
சென்னை 100 டிகிரி பாரன்ஹீட் என்ற அளவில் வெயில் அளவு
பதிவாகி உள்ளது.
-
--------------------------------------------------------
தினமலர்