நல்ல தலையணை… நல்ல தூக்கம்!

by **ayyasamy ram** Tue May 07, 2019 7:15 pm

-
வேலையில்லாமல் துன்பப்படுபவர்களுக்கு தூக்கம் வருவதில்லை. தகவல் தொழில்நுட்ப நிறுவனங்கள் போன்ற பல்வேறு நிறுவனங்களில் ஒரு நாளைக்கு 12 மணி நேரத்துக்கும் மேலாக வேலை செய்பவர்களுக்கு தூங்க நேரம் இருப்பதில்லை.

அப்படியே கிடைக்கும் நேரத்தில் அவர்கள் தூங்கினாலும் அது ஆழ்ந்த உறக்கமாக இருப்பதில்லை. தூங்கி விழித்தவுடன், முழுமையாகத் தூங்காததால் ஏற்படும் கண் எரிச்சலும், உடல் சோர்வும்தான் மிச்சமாக இருக்கிறது.

“தூக்கம் என்பது எதிர்காலத்துக்காக இன்று நாம் செய்யும் முதலீடு” என்கிறார் பெங்களூருவைச் சேர்ந்த ஷாஷங் பாலி.

ஷாஷங் ஐஐடி கான்பூரில் 2011 இல் படித்தவர் அவர். அதற்குப் பிறகு பல நிறுவனங்களில் வேலை செய்திருக்கிறார். 3D பிரிண்டிங் செய்யும் லைட்ஃபேபர் என்ற நிறுவனத்தை 2013 இல் தொடங்கியிருக்கிறார்.

2015 இல் SaaS என்ற நிறுவனத்தைத் தொடங்கி நடத்தியிருக்கிறார். தொழில் சார்ந்து, வேலை சார்ந்து அவர் சந்தித்த பல மனிதர்களிடம் இருந்து அவர் தெரிந்து கொண்டது, யாருமே நன்றாகத் தூங்குவதில்லை என்பதுதான்.

அடுத்து “ஏன் தூங்குவதில்லை?’ என்ற ஆராய்ச்சியில் ஷாஷங் இறங்கியிருக்கிறார். நன்றாக ஆழ்ந்து தூங்குவதற்கான சூழ்நிலைகள் இல்லாதது ஒரு காரணம் என்று அவருக்குத் தெரிய வந்திருக்கிறது.

போதுமான அளவு தூக்கம் இல்லாததால் உடல் பல நோய்களைச் சந்திக்கிறது. குறைவான தூக்கத்தால் உடல் இளைத்து போவது, சர்க்கரை நோய், இதயநோய்கள், மாரடைப்பு, நினைவு இழப்பு உட்பட பல நோய்கள் ஏற்பட வாய்ப்புகள் உள்ளன.

மனிதர்கள் போதுமான அளவு நன்றாகத் தூங்க ஏதாவது செய்ய வேண்டும் என்ற உணர்வினால் தூண்டப்பட்ட ஷாஷங் ஆராய்ச்சிக்குப் பிறகு ஒரு தலையணையை உருவாக்கியிருக்கிறார்.

“அதிக விலை கொடுத்து வாங்கி நாம் பயன்படுத்தும் தலையணைகள் ஆறு மாதம் அல்லது ஓர் ஆண்டுக்குள்ளேயே தலையணை மாதிரி இல்லாமல் தட்டையாக ஆகிவிடுகின்றன.

by **ayyasamy ram** Tue May 07, 2019 7:16 pm

மனிதர்களின் உடல் எடை, தலை அமைப்பு, உடல் அமைப்பு, தூங்கும்விதம் ஆகியவற்றுக்குப் பொருத்தமாக தலையணை இருந்தால்தான் நன்றாகத் தூங்க முடியும். இல்லையென்றால் ஆழ்ந்த உறக்கம் இல்லாமல் போய்விடும்.

எனவே மனிதர்களின் தலை அமைப்பு, உடல் அமைப்பு, உடல் எடை, தூங்கும்விதம் ஆகியவற்றுக்கேற்ப வளைந்து கொடுத்து, வடிவத்தை மாற்றிக் கொள்கிற தலையணையைச் செய்தால் நல்லது என்று நினைத்தேன்.

அதற்காக நிறைய ஆராய்ச்சி செய்து, Cuddl என்ற தலையணையை தயாரித்தேன். இந்த தலையணைக்குள் உதிரியான ஃபோம்கள் வைக்கப்பட்டுள்ளன.

தலையணையின் உள்புறத்தில் ஐந்துவிதமான அடுக்குகள் இருப்பதால் எத்தனை ஆண்டுகளானாலும் இந்த தலையணை தட்டையாகாது.

தலையை வைத்ததும் தூங்குபவரின் உருவ அமைப்புக்கு ஏற்றவிதமாக இந்தத் தலையணை வளைந்து நெளிந்து தன்னை வடிவமைத்துக் கொள்ளும்.

அதனால் ஆழ்ந்த உறக்கம் அவரைத் தொற்றிக் கொள்ளும். தலையணையின் வெளிப்புறம் தூசியாலோ, வியர்வையாலோ பாதிக்கப்படாது” என்கிறார் ஷாஷங்.

ரூ.15 லட்சம் மூலதனத்துடன் தொடங்கப்பட்ட இந்த தலையணை தயாரிக்கும் தொழிலின் வளர்ச்சிக்கு இன்னும் நிறைய மூலதனம் தேவைப்படுகிறதாம்.

தொழிற்சாலை என்று ஏற்படுத்தி, ஓரிடத்தில் தலையணைகளைத் தயாரிக்காமல், பல ஊர்களில், இடங்களில் தலையணைகள் தயாரிக்கப்படுகின்றன.

தயாரிக்கப்பட்ட தலையணைகளை ஆன்லைன் மூலம் விற்பனை செய்கிறார்ஷாஷங்.
ஆனால் ஒவ்வொரு ஊரிலும் உள்ள கடைகளில் நேரடி விற்பனை செய்யவும் திட்டமிட்டிருக்கிறார்.

“இந்த தலையணைகள் ஒரே வடிவத்தில், ஒரே விதமாகவே மொத்தமாகத் தயாரிக்கப்படுகின்றன. ஆனால் இவற்றைப் பயன்படுத்தும் மனிதர்கள் ஒவ்வொருவரும் உடல்ரீதியாகவும், தூங்கும் விதத்திலும் மாறுபடுகிறார்கள்.

எனவே ஒவ்வொரு தனிப்பட்ட மனிதரின் தேவைக்கேற்ற தலையணைகளைத் தயாரித்து தருவதுதான் எனது அடுத்த இலக்கு” என்கிறார் ஷாஷங்.

ந.ஜீவா

நன்றி-தினமணி

by **Dr.S.Soundarapandian** Wed May 08, 2019 11:21 am

by Sponsored content

நல்ல தலையணை… நல்ல தூக்கம்!

நல்ல தலையணை… நல்ல தூக்கம்!

Re: நல்ல தலையணை… நல்ல தூக்கம்!

Re: நல்ல தலையணை… நல்ல தூக்கம்!

Re: நல்ல தலையணை… நல்ல தூக்கம்!