அவள் கிளாஸிக்ஸ்: புத்தாண்டு உறுதிமொழி

* என்னதான் டென்ஷன் ஆனாலும் குழந்தைகள் மீது
பாயமாட்டேன். தவிர்க்க முடியாமல் திட்டினாலும்,
`சனியனே, எழவு’ போன்ற வார்த்தைகள் சொல்ல
மாட்டேன்.

* தெரிந்தவர்கள் வந்தால் குழந்தைகளைத் தனியறைக்குத்
துரத்தாமல் இருக்கச் சொல்லி, பேசவைத்து, கூச்சத்தைப்
போக்குவேன்.

* குழந்தைக்கு தினம் ஒரு சின்ன கதை அல்லது சம்பவம்
சொல்வேன்.

* வீட்டிலேயே அடைந்து கிடக்கும் பெரியவரை மாதம்
ஒருமுறை உறவினர் வீடு, பீச், கோயில் எங்காவது
அழைத்துப்போவேன்.

* பயனற்ற, காலாவதியான மருந்து, மாத்திரைகளை
உடனுக்குடன் ஒழிப்பேன்.

* தினமும் நம்மோடு பழகும் ஒவ்வொரு வரிடமும் உள்ள
ஏதாவது ஒரு நல்ல அம்சத்தை வாய்விட்டுப் பாராட்டுவேன்.

* தலைமுறை இடைவெளியில் சிக்காமல் என்னைவிட
வயது குறைந்தவர்களுடன் நட்பு ஏற்படுத்திக்கொள்வேன்.

* புதிதாக வரும் கலைஞர்கள் பெயர்களைத் தெரிந்து
கொள்வேன்.
புதுப் பாடல்களையும் தினம் ஒன்றிரண்டு கேட்பேன்.

* தினமும் ஏதாவது ஒரு காய் அல்லது பழம் பச்சையாக
சாப்பிடுவேன். உணவில் ஏதேனும் ஒரு கீரை சேர்த்துக்
கொள்வேன்.

* அழைப்பிதழ் கொடுத்த நிகழ்ச்சியில் கலந்துகொள்ள
முடியாவிட்டாலும் வாழ்த்தாவது அனுப்புவேன்.

* அலுவலகம், திருமணம், விருந்து, சினிமா, நண்பர் வீடு...
எங்கு போவதாக இருந்தாலும் நேரம் தவறாமல் செல்வேன்.

* எந்த வேலை என்றாலும் பெண்டிங் வைக்காமல்
உடனுக்குடன் முடித்துவிட வேண்டும் என்று அடிக்கடி
எனக்கு நானே சொல்லிச் செயல்படுத்துவேன்.

* ஒவ்வொரு நாளும் உறங்கச் செல்வதற்கு முன் அன்றைய
செலவுகளை - ஒரு ரூபாய் என்றாலும் - விடாமல்,
கணக்கெழுதி வைப்பேன். மாதத்தின் கடைசி நாள் அதைப்
பிரித்து எழுதி எந்தெந்த செலவுகள் தண்டம் என்று
பார்ப்பேன்.

* வாரம் ஐந்து நாளாவது அதிகாலையில் எழுந்து,
45 நிமிடமாவது வாக் போவேன்.

* வார விடுமுறை நாளில் ஆண்/பெண் வேறுபாடு
இல்லாமல் குழந்தைகளுக்கு சமையலில் ஈடுபாடு வர
உற்சாகப் படுத்துவேன்.

* வாரம் ஒருநாள் வாகனம் ஓட்டமாட்டேன்.
இயன்ற வரை யாரையும் ஓவர்டேக் பண்ண மாட்டேன்.
அவசியம் ஏற்பட் டால் தவிர, ஹாரன் அடிக்க மாட்டேன்.

* பொருட்களை எடுத்து பயன்படுத்தியதும், அதற்குரிய
இடத்தில் திரும்ப வைப்பேன்.
-
-------------------------------------
அனாமிகா
நன்றி-அவள் விகடன்