தீபாவளியன்று மதுரை மீனாட்சியம்மனுக்கு வைரக் கிரீடம், தங்கக் கவசம் சாத்துப்படி

-

மதுரை மீனாட்சி சுந்தரேசுவரர் கோயிலில் செவ்வாய்க்கிழமை
(நவ. 6) தீபாவளியன்று அம்மனுக்கு வைரக் கிரீடமும்,
தங்கக் கவசமும் சாற்றப்படும். சுவாமிக்கு வைர நெற்றிப்
பட்டையும் சாத்துப்படியாகிறது.

இதுகுறித்து கோயில் இணை ஆணையர் என். நடராஜன்
விடுத்துள்ள செய்திக்குறிப்பு:

தீபாவளியை முன்னிட்டு செவ்வாய்க்கிழமை (நவ.6) காலை,
மாலை இரு வேளைகளிலும் மீனாட்சியம்மனுக்கு வைரக்
கிரீடம், தங்கக் கவசம் சாத்துப்படியாகிறது.
சுந்தரேசுவரருக்கு வைர நெற்றிப் பட்டையும் சாத்தப்படுகிறது.

மேலும், வரும் 8-ஆம் தேதி முதல் (வியாழக்கிழமை) 13-ஆம்
தேதி வரை (செவ்வாய்க்கிழமை) கோலாட்ட உற்சவம்
நடைபெறுகிறது. உற்சவ நாள்களில் தினமும் மாலை
6 மணிக்கு ஆடி வீதியில் மீனாட்சியம்மன் எழுந்தருளி
அருள்பாலிப்பார். பின்னர் கொலுச்சாவடியில் எழுந்தருள்வார்.

நவம்பர் 12-ஆம் தேதி திங்கள்கிழமை மாலை 6 மணிக்கு
மீனாட்சியம்மன் வெள்ளிக் கோ ரதத்தில் எழுந்தருளி
நான்கு சித்திரை வீதிகளிலும் வலம் வருவார்.

நவம்பர் 13-ஆம் தேதி செவ்வாய்க்கிழமை மாலை 7 மணிக்கு
மீனாட்சி சுந்தரேசுவரர் பஞ்ச மூர்த்திகளுடன் வெள்ளி ரிஷப
வாகனத்தில் ஆடி வீதியில் வலம் வந்து அருள்பாலிப்பார்.

கந்தசஷ்டி விழா:

மீனாட்சி சுந்தரேசுவரர் கோயிலில் கந்தசஷ்டி விழா
நவம்பர் 8ஆம் தேதி வியாழக்கிழமை தொடங்கி 13-ஆம் தேதி
வரை நடைபெறுகிறது. இதையடுத்து நவம்பர் 14ஆம் தேதி
சனிக்கிழமை காலை 7 மணிக்கு கூடல்குமாரருக்கு வெள்ளிக்
கவசம் (பாவாடை) சாத்துப்படி நடைபெறும். மேலும் சிறப்பு
அபிஷேகமும், அலங்காரமும், சண்முகார்ச்சனையும்
நடைபெறுகிறது.

உபய நிகழ்ச்சிகள் ரத்து:

நவம்பர் 6-ஆம் தேதி முதல் 14-ஆம் தேதி வரையில் விழாக்கள்
நடைபெறுவதால், உபயதாரர்கள் சார்பில் உபய
திருக்கல்யாணம், தங்க ரத உலா ஆகிய சேவைகள் நடத்தப்பட
மாட்டாது என்றும்
செய்திக்குறிப்பில் தெரிவிக்கப்பட்டுள்ளது.
-

தினமணி