சுழலும் வளையங்களுடன் கற்சங்கிலி: கலக்குகிறார் சிற்பி

கல்லை சிற்பமாக்குவது சாதாரண விஷயமல்ல.
கல்லை தேர்வு செய்வதில் இருந்து, சிற்பம் வடிக்கும் வரை,
பல சாஸ்திரங்களை கடைபிடிக்க வேண்டும்.

சிறிய சேதம் ஏற்பட்டாலும் சிற்பத்தை எறிந்துவிட
வேண்டியது தான். கல்லை உயிரோட்டத்துடன்
தத்துரூபமாக வடிக்க வேண்டும்.

கலை நுணுக்கம்
-
தமிழக கோவில் கற்சிற்பங்களை பார்த்து, இன்றும்
அதிசயிக்கின்றனர் வெளிநாட்டினர். ஒவ்வொன்றும்
ஒரு கதை சொல்லும்.

சில கலைநுணுக்கம் நம்மை ஆச்சரியப்படுத்தும்.
அந்த வரிசையில் கற்சங்கிலியை கூறலாம்.

இரும்பு சங்கிலியை போன்று வளையங்கள் கோர்த்திருக்கும்.
வளையங்களை தனித்தனியாக சுத்தலாம்.
இந்த சிலைகளை, ஆவுடையார்கோவில் ஆத்மநாதர் கோவிலில்
பார்க்கலாம்.

அசத்தல்

இந்த சிலைகளை தற்போது, கலைநயத்தோடு கற்சங்கிலியை
செய்து அசத்தி வருகிறார், பிள்ளையார்பட்டி
அழகுநாச்சியம்மன் சிற்பக் கலைக் கூட, சிற்பி ஜி.கருப்பையா,48.

இரண்டரை அடி நீளம், ஒரு அடி அகலம் உள்ள கல்லில்,
ஐந்து வளையங்கள் உடைய சங்கிலியை உருவாக்குகிறார்.

மேலும், சிங்கம் வாய்க்குள் வெளியில் எடுக்க முடியாத
கல் உருண்டை செய்யும் முயற்சியிலும் ஈடுபட்டுள்ளார்.
கருப்பையா கூறியதாவது:

பரம்பரையாக கோவில்களுக்கான கற்சிற்பங்களை
வடிக்கிறோம். பழமையான சில கோவில்களில் கற்சங்கிலி
காணப்படும்.

சிறுவயதிலே, காஞ்சிபுரத்தில் பயிற்சி பெற்றேன்.
22 ஆண்டுகளாக சிற்பங்களை வடிக்கிறேன்.
என் தாத்தா கற்சங்கிலி, சிங்கம் வாய்க்குள் கல் உருண்டை
போன்றவை செய்வது குறித்து குறிப்பு எழுதி வைத்துள்ளார்.

அதை படித்து கற்றுகொண்டேன். ஐந்து வளையங்கள்
சங்கிலி செய்ய, இரண்டு மாதங்கள் பிடித்தது.
ஒரே கல்லில், 20 வளையங்கள் வரை செய்ய முடியும்.

இக்கலை அழியாமல் இருக்க, சிற்ப நுணுக்கத்தை
என் மகனுக்கும் சொல்லி கொடுக்க உள்ளேன்.
இவ்வாறு அவர் கூறினார்.
-
--------------------------
- நமது நிருபர் -
தினமலர்

அருமையான வேலைப்பாடு கடின உழைப்பு நிச்சயம் பாராட்டியே ஆக வேண்டும்.
வாழ்த்துக்கள்.