குரு பார்க்க கோடி நன்மை

by **ayyasamy ram** Sun Sep 23, 2018 12:01 pm

-
மேகம் மறைத்த வான் வளத்தை
வீட்டுக்கு அழைப்பது எவர் கருணை!
சோகம்விலக்கும் கானக் குயிலிசை
மக்களிடம் சேர்ப்பது எவர் கருணை!

வேகம், விவேகம் கலந்த மதிநுட்பம்
விஞ்ஞானம் பேசுவது எவர் கருணை!
தாகம் தீர்க்கும் ஆறும், அருவியும்
திசைகள் இணைப்பது எவர் கருணை!

ஏகாந்த அமைதி, ஞானம் சிலர்
வாய்க்கப்பெறுவது எவர் கருணை!
அளவிலா செல்வம், அடுக்கடுக்காய் வெற்றி
ஆனந்தத்தில் திளைப்பது எவர் கருணை!

குறைவிலா துணிமணிகள், பொன்ஆபரணம்
விரும்பி வந்தடைவது எவர் கருணை!
குறித்தகாலத்தில் குமரப்பருவத்தில்
குமரியுடன் இல்லறம்சேர்வது எவர் கருணை!

குடத்து விளக்காய் நின்ற பெருமையை
குன்றில் கொடியேற்றுவது எவர் கருணை!
குருபார்வை ஜாதகத்தில் வந்தால் போதும்
குருடனும் விழிபெற்று நாடாள்வான்!

ஆங்கிரச முனியின் மகன் பிருகஸ்பதி
அளவிலா யாகம் செய்து தேவகுருவானாய்!
ஆலோசனையில் அமைச்சன், குணத்தில் அந்தணன்
அதிகாரத்தில் அரசன், நிறத்தில் பொன்னன்!

அறிவுரையில் ஆசான், ஞானத்தில் மறையோன்!
தடைகளைப் பொடியாக்கும் தாராபதி பார்வை!
தகரம் தங்கமாகும், தரணி வசப்படும்!
தெய்வீகப்பார்வை தரிசனம் பெற்று வாழ்வில்
வளமும், நலமும் சேர்ப்போம்!
தெய்வமந்திரி என்றும் நமை ஆள்வான்!

குருவின் அருள் சேர்க்கும் தட்சணாமூர்த்தி
குருவாய் போதித்த கண்ணன், முருகன்
மவுனகுருவாய் வெற்றிதரும் கணபதியை
நாளும் பணிந்து திரவியம் பெறுவோம்!

மும்மூர்த்தி அவதாரம் தத்ராத்ரேயரின்
மூலமந்திரம் தியானித்து மனம் தெளிவோம்!
ஒளிமயமான வாழ்வருளும் ஒளிமேனியன்
ஓரப்பார்வை இடர்நீக்கும் வரம்!

ராஜகிரக பெயர்ச்சி
அனுகூலம் தரும்
ராஜயோகம் வாசல் தேடி வரும்!
குருபார்க்க கோடி நன்மை உணர்வோம்!
திருக்கோயில் சென்று
திருவருள் பெறுவோம்!
–
—————————
– விஷ்ணுதாசன்
ஆன்மிகம்- குங்குமம்

by **சிவா** Sun Sep 23, 2018 1:16 pm

ஒருவரது ஜாதகத்தில் குரு பகவான் எந்த இடத்தில் இருந்தால் என்ன பலன்?

* குரு பகவான் 1-ம் இடத்தில் இருந்தால் நீண்ட ஆயுள், நிறைந்த செல்வம் கிடைக்கும்.

* குரு பகவான் 2-ல் இருந்தால் பேச்சாற்றல், அரசு வேலை கிடைக்கும்.

* குரு பகவான் 3-ல் இருந்தால் சகோதர அனுகூலம் உடன் பிறப்புகளால் உதவிக் கிடைக்கும்.

* குரு பகவான் 4-ல் இருந்தால் தாய் அனுகூலம், வீடு வாகன யோகம் கிடைக்கும்.

* குரு பகவான் 5-ல் இருந்தால் புத்திர தோஷம், பெண் குழந்தைகள் தோஷம் நீங்கும்.

* குரு பகவான் 6-ல் இருந்தால் போராட்டமில்லாத வாழ்வு மலரும்.

* குரு பகவான் 7-ல் இருந்தால் நல்ல வாழ்க்கைத் துணை அமையும்.

* குரு பகவான் 8-ல் இருந்தால் நீண்ட ஆயுள் உண்டு.

* குரு பகவான் 9-ல் இருந்தால் அள்ளிக் கொடுப்பார்.

* குரு பகவான் 10-ல் வந்தால் பதவி மாற்றம் உறுதியாகும்.

* குரு பகவான் 11-ல் இருந்தால் செல்வாக்கு, செல்வ நிலையில் உயர்வு உண்டு.

* குரு பகவான் 12-ல் இருந்தால் சுபவிரயம், மங்கள ஓசை, பயணங்கள், பெரிய மனிதர்களின் தொடர்புகள் கிடைக்கும்.

குரு பார்க்க கோடி நன்மை

குரு பார்க்க கோடி நன்மை

Re: குரு பார்க்க கோடி நன்மை