வெளிநாடுகள் அளிக்கும் உதவியை ஏற்பதில்லை என இந்திய அரசு தெளிவாக தெரிவித்துவிட்டது: தாய்லாந்து தூதர் தகவல்

புதுடெல்லி,

மழை வெள்ளத்தால் பாதிக்கப்பட்ட கேரளாவுக்கு மத்திய அரசு முதல்கட்ட நிவாரண உதவியாக ரூ.600 கோடி கொடுத்துள்ளது. மீட்பு பணிகள், நோய் தடுப்பு பணிகள், சீரமைப்பு பணிகளை தீவிரப்படுத்தியுள்ள மத்திய அரசு கேரளாவுக்கு சுமார் 90 ஆயிரம் டன் உணவு தானியங்கள், 100 டன் பருப்பு வகைகளை இலவசமாக கொடுத்து அனைத்து விதமான உதவிகளையும் செய்துள்ளது.

மத்திய அரசு உத்தரவு காரணமாக ராணுவத்தின் அனைத்து பிரிவுகளும் சீரமைப்பு பணியில் ஈடுபட்டுள்ளதால் கேரளா கொஞ்சம், கொஞ்சமாக இயல்பு நிலைக்கு திரும்பி வருகிறது. உள் கட்டமைப்பை சீராக்க மத்திய அரசு உடனடியாக ரூ.2,600 கோடி தரவேண்டும் என்று கேரளா தொடர்ந்து வலியுறுத்தி வருகிறது. கூடுதல் நிதி திரட்ட லாட்டரி சீட்டு நடத்தவும் திட்டமிட்டுள்ளது.

இந்த நிலையில் ஐக்கிய அரபு எமிரெட்ஸ் நாடு கேரளாவுக்கு ரூ.700 கோடி நிவாரண நிதி வழங்க தயார் என்று அறிவித்தது. ஐக்கிய அரபு எமிரெட்சில் வாழும் சுமார் 28 லட்சம் கேரள மாநிலத்தவர்களுக்கு உதவும் வகையில் இந்த நிதியை தர தயாராக இருப்பதாக அபுதாபி இளவரசர் கூறியதாக தகவல் வெளியானது. மாலத்தீவு, கத்தார், சீனா மற்றும் ஐ.நா. சபையில் இருந்தும் நிதி உதவி தர இருப்பதாக மத்திய அரசிடம் தகவல் தெரிவிக்கப்பட்டுள்ளது.

ஐக்கிய அரபு எமிரேட்ஸ் உள்பட வெளிநாடுகளின் நிதி உதவியை இந்தியா ஏற்காது என்று தெரியவந்துள்ளது. வெளிநாட்டு நிதி உதவிகளை ஏற்பது இல்லை என்று கடந்த சில ஆண்டுகளுக்கு முன்பே இந்தியா கொள்கை முடிவு எடுத்து இருப்பதால் அதை பின்பற்ற மத்திய அரசு முடிவு செய்து இருப்பதாக கூறப்படுகிறது. இந்த நிலையில், வெளிநாட்டு உதவிகளை ஏற்பதில்லை என்று இந்தியா திட்டவட்டமாக தெரிவித்துவிட்டதாக தாய்லாந்து தூதர் தெரிவித்துள்ளார்.

தாய்லாந்து தூதர் தனது டுவிட்டரில் இது குறித்து கூறியிருப்பதாவது:- “ கேரளா வெள்ள நிவாரணத்துக்கு வெளிநாடுகள் வழங்கும் நிதியை ஏற்க மாட்டோம் என்று இந்தியா அலுவல்பூர்வமற்ற முறையில் எங்களிடம் தெரிவித்து விட்டது” என்று தெரிவித்துள்ளார். தாய்லாந்து தூதர் வெளியிட்டுள்ள டுவிட் மூலம், ஐக்கிய அரபு அமீரகம் வழங்குவதாக அறிவித்த ரூ.700 கோடியை இந்தியா பெறாது என கூறப்படுகிறது.

இதற்கிடையே, தனியார் ஆங்கில தொலைக்காட்சி ஒன்றுக்கு பேட்டி அளித்த கேரள மந்திரி இசாக், மத்திய அரசின் முடிவுக்கு அதிருப்தி தெரிவித்துள்ளார். இசாக் கூறும் போது, நாங்கள் 2000 கோடி கேட்ட நிலையில், 600 கோடி மட்டுமே மத்திய அரசு நிதி உதவி செய்துள்ளது. அரசாங்கமோ தனிநபர்களோ முன்வந்து வழங்கும் உதவியை ஏன் பெற மறுக்கிறார்கள் என்று எனக்கு தெரியவில்லை. கேரளாவுக்கும் ஐக்கிய அரபு அமீரகத்துக்கும் இடையே நீண்ட கால உறவு உள்ளது. இன்னும் சொல்லப்போனால், ஐக்கிய அரபு அமீரகத்தில் உள்ள பெரும்பாலான மக்கள் கேரளாவைச்சேர்ந்தவர்களே” என்றார்.
-
தினத்தந்தி