ஜெ.,க்கு என்ன நடந்தது?: சசிகலா வாக்குமூலம்

by SK Wed Mar 21, 2018 2:29 pm

சென்னை : ஜெயலலிதா மரணம் தொடர்பாக, விசாரிக்கும் ஓய்வுபெற்ற நீதிபதி ஆறுமுகசாமி தலைமையிலான விசாரணை கமிஷனிடம், சசிகலாவின் வாக்குமூலம், 55 பக்க பிரமாண பத்திரமாக மார்ச் 12 அன்று தாக்கல் செய்யப்பட்டுள்ளது. அதில், 2016 ம் ஆண்டு செப்.,22 அன்று மறைந்த முன்னாள் முதல்வர் ஜெயலலிதா அப்பல்லோ மருத்துவமனைக்கு கொண்டு செல்லப் பட்டதற்கு முன் என்ன நடந்தது, மருத்துவமவையில் ஜெ.,வை யார் யாரெல்லாம் சந்தித்தார்கள் என சசிகலா குறிப்பிட்டுள்ளார்.

வாக்குமூலத்தில் சசிகலா கூறியிருப்பதாவது, செப்.,22 இரவு 9.30 மணியளவில் கழிவறையில் ஜெயலலிதா அரை மயக்கமடைந்தார். அவரை படுக்கைக்கு அழைத்து வந்து, டாக்டர் சிவக்குமாரை வரவழைத்தேன். 2 பாதுகாப்பு அதிகாரிகள் மற்றும் டிரைவரையும் உடனடியாக அழைத்தேன்.

சிவக்குமார், அப்பல்லோ விஜய் குமார் ரெட்டிக்கு போன் செய்ததும் 2 ஆம்புலன்ஸ்கள் வரவழைக்கப்பட்டன. அடுத்த 10 முதல் 15 நிமிடத்தில் ஆம்புலன்ஸ் வந்ததும், ஜெ., ஆம்புலன்சில் ஏற்றப்பட்டார். அப்போது நினைவுடன் இருந்த ஜெ., தன்னை எங்கு கொண்டு செல்வதாக கேட்டார். அவரை மருத்துவமனைக்கு கொண்டு செல்வதற்காக கன்ட்ரோல் ரூமிற்கு தகவல் தெரிவிக்கப்பட்டு, போக்குவரத்து சரி செய்யப்பட்டது. எந்த மருத்துவமனைக்கு கொண்டு செல்ல வேண்டும் என்பதையும் ஜெ., சொன்னார்.

முன்னதாக செப்.,22 அன்று சிவக்குமார் 2 முறை ஜெ.,வை பரிசோதித்தார். முன்பே மருத்துவமனைக்கு செல்லலாம் என்றேன். ஆனால் ஜெ., மருத்துவிட்டார். 2014 செப்., மாதம் வழங்கப்பட்ட சொத்து குவிப்பு வழக்கின் தீர்ப்பால் மிகுந்த மனஉளைச்சலில் இருந்தார். அது அவரது உடல்நிலையை பாதித்தது.

by SK Wed Mar 21, 2018 2:30 pm

அதிகப்படியான ரத்த சர்க்கரை காரணமாக, நீண்ட தூர பயணம் செய்ய முடியாததால் தான் ஆர்.கே.நகரை தேர்வு செய்து அவர் தேர்தலில் போட்டியிட்டார். 2016 செப்., முதல் வாரத்திலேயே சர்க்கரையால் ஜெ., உடல்நிலை பாதிக்கப்பட்டது. 2 டாக்டர்கள் அவருக்கு சிகிச்சை அளித்து குறைந்த சக்தி உள்ள ஸ்டிராய்டு மாத்திரைகளை அளித்தனர். அதன் பிறகு தேறி வந்த ஜெ.,க்கு செப்.,19 காய்ச்சல் ஏற்பட்டது. நவம்பர் 2014 முதல் 2016 செப் வரை சென்னை, மும்பை, கோல்கட்டாவின் பல்வேறு மருத்துவமனைகளைச் சேர்ந்த 20 டாக்டர்கள் ஜெ.,க்கு சிகிச்சை அளித்தனர்.

2016 ம் ஆண்டு அக்.,22 அப்போதைய கவர்னர் வித்யாசாகர் ராவ் ஜெ.,வை கண்ணாடி கதவு வழியாக பார்த்தார். ஜெ.,வும் அவரை பார்த்து கையசைத்தார். பின்னர் கவர்னர் என்னை அழைத்து ஜெ., உடல்நிலை பற்றி விசாரித்தார். செப்.,22 முதல் 27 வரை ஓ.பன்னீர்செல்வம், தம்பிதுரை, சுகாதாரத்துறை அமைச்சர் விஜயபாஸ்கர் ஆகியோர் சந்தித்தனர்.

செப்.,27 அன்று தனி பாதுகாப்பு அதிகாரிகள் வீரப்பெருமாள், பெருமாள்சாமி ஆகியோர் ஜெ.,வை சந்தித்தனர். அவர்களிடம், தான் நன்றாக இருப்பதாகவும், சில நாட்கள் டாக்டர்கள் மருத்துவமனையில் இருக்க சொல்லி இருக்கிறார்கள். விரைவில் வீட்டிற்கு செல்வேன். கவலைப்பட வேண்டாம் என்றார்.

நவ.,19 அன்று நிலோபர் உள்ளிட்ட சில அமைச்சர்கள் சந்தித்தனர். செப்.,22 முதல் டிச., 3 வரை பல்வேறு மூத்த அதிகாரிகள் சந்தித்தனர். இதற்கு ஆதாரங்களும், சாட்சிகளும் உள்ளன. 2015, 2016 களில் பல கால கட்டங்களில் ஜெ., கேட்டுக் கொண்டதன் பேரில் சிகிச்சை பெற்றதை வீடியோ எடுத்தேன். அப்பல்லோவில் அவர் சிகிச்சை பெற்ற போதும், அவர் பழச்சாறு அருந்தியதையும் 4 வீடியோ எடுத்தேன். அதுவும் விசாரணை கமிஷன் முன் சமர்ப்பிக்கப்பட்டுள்ளது.

செப்.,27 காவிரி நதிநீர் பங்கீடு விவகாரம் தொடர்பாக தலைமை செயலர் ராம்மோகன ராவ், அட்வகேட் ஜெனரல் முத்துகுமாரசாமி, அரசு ஆலோசகர் ஷீலா பாலகிருஷ்ணன், முதல்வரின் தனிச் செயலாளர்களான வெங்டராமன், ராமலிங்கம் ஆகியோர் சந்தித்து பேசினர். இவ்வாறு சசிகலா குறிப்பிட்டுள்ளார்.

நன்றி
தினமலர்