மாலத்தீவில் அவசர நிலை பிரகடனம்

by **ayyasamy ram** Tue Feb 06, 2018 7:13 am

௦
மாலே: மாலத்தில் 15 நாட்களுக்கு அவசர நிலை பிரகடனப்படுத்தப்பட்டுள்ளதாக அதிபர் அப்துல்லா யாமீன் அறிவித்துள்ளார்.

அண்டை நாடான மாலத்தீவுகள், சுற்றுலாவுக்கு பெயர் பெற்றது.
அதேபோல், அரசியல் குழப்பங்களும் அங்கு அடிக்கடி நிகழ்கின்றன.
பி.பி.எம்., எனப்படும் மாலத்தீவுகள் முற்போக்கு கட்சியின்
தலைவரான, அப்துல்லா யாமீன் அப்துல்லா கயூம், அதிபராக உள்ளார்.

சமீபத்தில் அந்த கட்சியைச் சேர்ந்த, 12 பேர், அதிபருக்கு எதிராக
போர்க் கொடி துாக்கினர். அதனால், எதிர்க்கட்சிகளின் பலம்
அதிகரித்தது. ஆட்சிக் கவிழ்ப்பைதடுப்பதற்காக, இந்த 12 பேரையும்
தகுதி நீக்கம் செய்தார் யாமீன்.
இதையடுத்து மாலத்தீவுகளில் அரசியல் குழப்பம் ஏற்பட்டது.

இந்நிலையில், தன் கட்சியைச் சேர்ந்த, ஒன்பது அதிருப்தியாளர்களை
கைது செய்ய, அதிபர் உத்தரவிட்டார். அரசுக்கு எதிராக போராட்டத்தில்
ஈடுபட்ட எதிர்க்கட்சி தலைவர்கள், எம்.பி.,க்களையும் கைது செய்தார்.
பார்லிமென்ட் தற்காலிகமாக மூடப்பட்டு, ராணுவத்தின் கட்டுப்பாட்டில்
உள்ளது.

கைது செய்யப்பட்டவர்களை விடுதலை செய்யும்படியும்,
12 எம்.பி.,க்கள் மீதான தகுதி நீக்க உத்தரவை திரும்பப் பெற வேண்டும்
என்றும், அந்த நாட்டு உச்ச நீதிமன்றம் சமீபத்தில் தீர்ப்பு அளித்தது.
ஆனால், அதை நிறைவேற்ற, அதிபர் யாமீன் மறுத்துவிட்டார்.

அதனால், அரசுக்கு எதிராக எதிர்க்கட்சிகளின் போராட்டம்
தீவிரமடைந்துள்ளது. அதிபரின் நடவடிக்கைகளுக்கு பல்வேறு நாடுகளும்
கண்டனம் தெரிவித்துள்ளன. கடுமையான இந்த அரசியல் சூழ்நிலையில்,
தன் உத்தரவை நிறைவேற்றாத அதிபருக்கு எதிரான வழக்கை,
அந்த நாட்டு உச்சநீதிமன்றம் விசாரித்து வருகிறது.

நிலைமை மோசமாக உள்ள நிலையில், அந்த நாட்டின் அட்டர்னி ஜெனரல்,
முகமது அனில், நேற்று ஒரு அறிவிப்பு வெளியிட்டுள்ளார். அதில் அவர்
கூறியதாவது:

அதிபருக்கு எதிராக உச்ச நீதிமன்றம் தீர்ப்பு அளித்தால், அது சட்ட
விரோதமாகும்; அரசியலமைப்பு சட்டத்துக்கு எதிரானதாகும்.
அதனால், அதிபரை கைது செய்ய உச்ச நீதிமன்றம் உத்தரவிட்டாலும்,
அதை நிறைவேற்றக் கூடாது என போலீஸ் மற்றும் ராணுவத்துக்கு
உத்தரவிடப்பட்டுள்ளது. இவ்வாறு அவர் கூறினார்.

இந்நிலையில் உச்சநீதிமன்றம் அதிபருக்கு எதிராக இன்று உத்தரவிட்டது.
இதனையடுத்து அதிபர் யாமீன் மாலத்தீவில் 15 நாட்களுக்கு அவசர நிலை
பிரகடனப்படுத்த அதிரடி உத்தரவு பிறப்பித்துள்ளார்.
அசம்பாவிதங்களை தடுக்க இந்த நடவடிக்கை எடுக்கப்பட்டுள்ளதாக
அவர் தெரிவித்தார்.

இந்தியர்களுக்கு அறிவுறுத்தல்

மாலத்தீவில் அவசரநிலை பிரகடனம் ஆனதையடுத்து அங்குள்ள
இந்தியர்கள், தேவையற்ற பயணிப்பதை தவிர்க்க வேண்டும் எனவும்,
அந்நாட்டில் பொது இடங்களில் நடக்கும் கூட்டங்களில் கலந்து
கொள்வதை தவிர்க்க வேண்டும் எனவும் இந்திய வெளியுறவுத்துறை
வலியுறுத்தியுள்ளது.
-
--------------------------------------
தினமலர்