‘அண்ணன்... அன்பு அண்ணன்!’ -உருகும் மித்தாலி

by **ayyasamy ram** Sat Nov 04, 2017 11:02 pm

-
வாழ்வில் தனக்கு எங்கும், எப்போதும் ஆதரவாக இருப்பவர்
தன் அண்ணன் மிதுன் ராஜ் என்கிறார், மித்தாலி.

குறிப்பாக, ஒரு வளர்ந்துவரும் கிரிக்கெட் வீராங்கனையாக தனது
ஆரம்பகாலங்களில் அண்ணன் தனக்குப் பெரிதும் உறுதுணையாக
இருந்ததாகக் கூறுகிறார்.

2002-ம் ஆண்டுவாக்கில் தன்னுடைய ஆட்டத்தில் சரிவு ஏற்பட்ட
போது, தனது இயல்பான நிலைக்குத் திரும்ப ஊக்கமாக இருந்தவர்
அண்ணன்தான் என்று மித்தாலி சொல்கிறார்.

“நான் அப்போது மும்பையிலும், அண்ணன் விசாகப்பட்டினத்திலும்
இருந்தோம். செல்போன் பரவலாக புழக்கத்துக்கு வராத அக்கால
கட்டத்தில் அவர் தினமும் என்னைத் தரைவழி தொலைபேசியில்
அழைத்துப் பேசுவார்,

மின்னஞ்சல்கள் அனுப்புவார். எதைப் பற்றியும் கவலைப்படாமல்
எனது ஆட்டத்தில் கவனம் செலுத்தும்படி ஊக்குவிப்பார். மற்ற
விஷயங்கள் எதைப் பற்றியும் நீ கவலைப்பட வேண்டாம்.
அதையெல்லாம் நான் பார்த்துக்கொள்கிறேன் என்பார்.

நான் எப்போதும் உனக்குப் பின்பலமாக இருப்பேன் என்றும்
சொல்வார்” என்று உணர்ச்சிவசப்பட்டவராகக் கூறுகிறார், மித்தாலி.

அவரின் அதே கருத்துகளை மிதுனும் பிரதி பலிக்கிறார். பழங்குடியின
மக்களுக்கு உதவும் ஒரு தன்னார்வத் தொண்டு நிறுவனத்தில்
பணிபுரியும் மிதுன், தங்களுக்கு இடையிலான சகோதர உறவு
வார்த்தைகளுக்கு அப்பாற்பட்டது என்கிறார்.

“மித்தாலி, அம்மா- அப்பாவுடன் விவாதிக்கத் தயங்கும் விஷயங்களைக்
கூட என்னிடம் கூறுவாள். அவள் எனக்குத் தங்கையாக அமைந்ததே
எனக்குக் கிடைத்த பெரும் பரிசு என்பேன்” என்று பூரிக்கிறார்.

“ஐதராபாத்தில் எங்கள் வீட்டில் உள்ள மித்தாலியின் அறைக்குள்
நான் நுழையும்போதெல்லாம் என் முகத்தில் புன்னகை விரியும்.
நான் அவளுக்கு இதுவரை அளித்த ஒவ்வொரு பரிசுப்பொருளையும்
கொண்டு அவள் அந்த அறையை அவ்வளவு அழகாக
அலங்கரித்திருப்பதுதான் காரணம்!” -மிதுனின் முகத்தில் மகிழ்ச்சி
மிதக்கிறது.
-
------------------------------
தினத்தந்தி