பிரசாதம் இல்லாதா கோயில் இங்கு உண்டா ?

பிரசாதம் இல்லாதா கோயில் இங்கு உண்டா ?

எத்தனை பெரிய சிந்தனை இது .

இன்னமும் பல கோயில்களில் மனா அமைதியுடன் , அங்கு கிடைக்கும் சுவையான பிரசாதங்கள் மன நிறைவையும் தருகின்றன . இறைவனுக்கு சமர்ப்பித்தவுடன் சாதம் புனித பிரசாதமாக மாறுகிறது பிரசாதம் என்ற பெயரில் பலவித மருத்துமுறைகளும் கலந்து அளிக்கப்படுகிறது .சில கோயில்களில் தேனும் இஞ்சியும் கூட கலந்து அளிக்கப்படுகிறது .


என்ன இருந்தாலும் அனைத்து பிரசாதகளிலும் பிரசித்துப் பெற்றது திருப்பதி லட்டு .அப்போதெல்லாம் மிகப்பெரிதாகவும் பெரிதாகவும் கிடைத்தது .

நான் பள்ளியில் படித்துக்கொண்டிருந்த போது அந்த நெடிய மலையில் நடந்து சென்று ஐந்து ரூபாய்க்கு வாங்கிய லட்டு , இன்னமும் நினைவில் மறையாமல் இருக்கிறது .அந்த சுவையும் ஆலயத்தின் சுழலும் சில என்ற குளிர்ச்சியம் இப்போது எழுதும் போதும் வருகிறது .அத்தகைய லட்டுவின் வரலாற்று பின்னணிப்பற்றி ஒரு சிறந்த கட்டுரை தமிழ் இந்துவில் வந்துள்ளது . இப்படி ஒன்று நானே எழுத வேண்டும் என நீண்ட நாட்களாக நினைத்து வந்தேன் .கட்டுரையை கீழே தந்திருக்கிறேன் .படமும் அதில் வந்ததே ! இந்துவுக்கு நன்றி .

அண்ணாமலை சுகுமாரன்

2/10/17



திருப்பதி ஏழுமலையானின் லட்டு பிரசாதம் உலக பிரசித்தி பெற்றதாகும். இந்த பிரசாதம் பிறந்த கதை மிகவும் சுவாரசியமானது. கடந்த 1940-ம் ஆண்டு முதல்தான் லட்டு பிரசாதம் வழங்கப்படுகிறது. அதற்கு முன்பு ஏழுமலையானின் பிரசாதங்கள் பல வடிவங்கள் எடுத்துள்ளன.

பல்லவர் ஆட்சிக் காலத்தில் (கி.பி.830) ஏழுமலையான் கோயிலில் பக்தர்களுக்கு பிரசாதம் விநியோகிக்கும் திட்டம் அமலுக்கு வந்தது. அந்த காலத்தில் பக்தர்கள் மலையேறி சென்று ஏழுமலையானை தரிசிக்க பல நாட்களாகும். அதன் பின்னர் சில நாட்கள் மலையிலேயே தங்கி தாங்களே உணவை தயாரித்து உண்டு வந்தனர். அப்போது சுவாமியை தரிசனம் செய்த பக்தர்கள் ஊர் திரும்பிச் சென்று வீடு போய் சேரும் வரை அவர்களுக்கு கோயில் பிரசாதம் தேவைப்பட்டது.

இதன் காரணமாக முதன் முதலில் ‘திருப்பொங்கம்’ எனும் பிரசாதம்தான் பக்தர்களுக்கு வழங்கப்பட்டது. இந்த கால கட்டத்தில்தான் சுவாமிக்கு ‘நைவேத்தியம்’ படைக்கும் முறை நிரந்தரமானதாக கல்வெட்டுகள் தெரிவிக்கின்றன. அதன்பின் கி.பி.1445-ல் ‘சுய்யம்’ எனப்படும் பணியாரம் பிரசாதமாக வழங்கப்பட்டது. 1455-ல் அப்பம், 1460-ல் வடை பிரசாதமாக வழங்கப்பட்டது. அதன் பிறகு 1468-ல் அதிரசம், 1547-ல் மனோஹரம் போன்ற பிரசாதங்கள் வழங்கப்பட்டன.

கடந்த 1803-ம் ஆண்டு முதல்தான் மதராஸ் மாகாணம் பிரசாதங்களை பக்தர்களுக்கு விற்பனை செய்யும் முறையை கொண்டு வந்தது. அப்போது முதலில் பூந்திதான் பக்தர்களுக்கு விற்பனை செய்யப்பட்டது. கடந்த 1940-ம் ஆண்டு முதல் பூந்திக்கு பதில் லட்டு விற்பனை தொடங்கியது. தற்போதைய கல்யாண உற்சவ லட்டு அளவில் திருப்பதி ஏழுமலையானின் லட்டு பிரசாதம் விற்பனை செய்யப்பட்டது. இந்த லட்டு ஆரம்பத்தில் எட்டு அணாவிற்கு ஒன்று வீதம் விற்பனை செய்யப்பட்டது. இதனை தொடர்ந்து லட்டு, ரூ.2, ரூ.5, ரூ.10, ரூ.15 எனவும் தற்போது ஒரு லட்டு ரூ.25-க்கும் விற்கப்படுகிறது.

ஆனால் ரூ.2- க்கு லட்டு விற்பனை பல ஆண்டுகளாக நீடித்துள்ளது. கல்யாண உற்சவ லட்டு பிரசாதம், கல்யாண உற்சவத்தில் பங்கேற்கும் பக்தர்களுக்கு மட்டும் விநியோகம் செய்யப்படுகிறது. இதன் விலை ரூ.100. பக்தர்கள் வாங்கும் லட்டு ‘ப்ரோக்தம் லட்டு’ என்றழைக்கப்படுகிறது. இதன் விலை ரூ.25 ஆகும்.