கப்பலில் உலகை சுற்றும் இந்திய கடற்படை வீராங்கனையர்

-
பனாஜி : இந்திய கடற்படையின் ஆறு வீராங்கனையர் உலகம் சுற்றும் பயணத்தை நேற்று(செப்.,10) துவக்கினர்.

கோவா தலைநகர் பனாஜியில் உள்ள இந்திய கடற்படை தளத்திலிருந்து கடற்படை வீராங்கனையர் ஆறு பேர் இந்தியாவில் தயாரிக்கப்பட்ட 'ஐ.என்.எஸ்.வி., தாரிணி' கப்பலில் உலகம் சுற்றும் பயணத்தை நேற்று துவக்கினர்.


எளிதில் கிடைக்காது:

இந்த பயணத்தை துவக்கி வைத்து ராணுவ அமைச்சர், நிர்மலா சீதாராமன் பேசியதாவது: இந்திய வரலாற்றில் இது ஒரு சிறப்பான நாள்; இதுபோன்ற நிகழ்ச்சிகள் ஐந்தாண்டுக்கு ஒரு முறையோ, 10 ஆண்டுக்கு ஒரு முறையோ நடப்பதில்லை. இந்திய கடற்படை வரலாற்றில், இதுவரை நினைத்து பார்க்காத வகையில், கடற்படை வீராங்கனையர், உலகம் சுற்றும் பயணத்தை துவக்கியுள்ளனர்.


இந்த வாய்ப்பு, யாருக்கும் எளிதில் கிடைத்து விடாது. இந்த வீராங்கனையரையும், அவர்களை ஊக்குவித்தவர்களையும், பயிற்சியளித்தவர்களையும் பாராட்டுகிறேன். இவர்கள், தங்கள் பயணத்தை வெற்றிகரமாக முடித்து திரும்ப வாழ்த்துகிறேன். இவ்வாறு நிர்மலா சீதாராமன் பேசினார்.

பின், நிருபர்களிடம், நிர்மலா சீதாராமன் கூறுகையில், ''முப்படைகளிலும் சேர பெண்கள் ஆர்வம் காட்டுகின்றனர். தங்களின் திறமை மீது அவர்களுக்கு நம்பிக்கை உள்ளது. அவர்களுக்கு தேவையான உதவியை அரசு செய்யும்,'' என்றார்.



165 நாள் பயணம்

உலகம் சுற்றும் கப்பல் பயணத்தில், இந்திய கடற்படையை சேர்ந்த, ஆறு வீராங்கனையர் இடம்பெற்றுள்ளனர். இந்த குழுவுக்கு, லெப்டினென்ட் கமாண்டர், வர்த்திகா ஜோஷி தலைமை வகிக்கிறார். லெப்டினென்ட் கமாண்டர்கள், பிரதிபா ஜம்வல், பி.சுவாதி, விஜயா தேவி, பயல் குப்தா, ஐஸ்வர்யா ஆகியோர், இடம் பெற்றுள்ளனர்.

இவர்கள், 165 நாள் பயணம் மேற்கொள்ள உள்ளனர். பயணத்தின் போது, ஆஸ்திரேலியாவில், பிரீமான்டில், நியூசிலாந்தின், லைடெல்டன், பால்க் தீவின், போர்ட் ஸ்டான்லி, தென் ஆப்பிரிக்காவின், கேப் டவுன் ஆகிய துறைமுகங்களில், இந்த கப்பல் நிறுத்தப்படும்.
-
தினமலர்