மின்னஞ்சல் அனுப்பிய பெண் யார்? (ஒருபக்கக் கதை)

by **Dr.S.Soundarapandian** Sun Aug 20, 2017 11:49 am

மின்னஞ்சல் அனுப்பிய பெண் யார்? (ஒருபக்கக் கதை)

அவளுக்கு வயது 32 ! அவள் பெயர் குமுதா!திருமணம் ஆகவில்லை ! ஓர் ஆய்வு அறிஞரிடம் (அவருக்கு வயது 65)ஆய்வு மாணவியாகச் சேர்ந்தாள் ; ஆய்வு அறிஞரும் அம் மாணவிக்கு வெகு சிறப்பாக வழிகாட்டினார்; ஆய்வு முடியும் வேளையில், ஆய்வு அறிஞர் , எதற்கும் இருக்கட்டுமே என்று , தனது விசிட்டிங் கார்டை அம் மாணவிக்குக் கொடுத்து , “இதில் எனது blogspot முகவரி உள்ளது; எனது நூற்கள் பற்றிய விவரங்கள் இதில் உள்ளன; நேரம் கிடைத்தால் பாருங்கள்!” என்றார். ஒருவாரம் கழித்து , அவரின் மின்னஞ்சலுக்கு , ‘மீனா’ என்ற வேறொரு பெண் முகவரியிலிருந்து ஆய்வாளருக்கு ஒரு தகவல் வந்தது! “வாழ்க்கை என்றால் என்ன? விளக்கம் தாருங்கள்!” என்று மீனா கேட்டிருந்தாள்! ஆய்வாளர் பல புத்தகங்களும் கட்டுரைகளும் பல நாட்களாக எழுதிவருவதால் , ‘யரோ நமது ஆய்வு மனப்பான்மை தெரிந்து , கேட்டிருக்கிறார்போலும் ’என்று நினைத்து , “ குருவி முட்டையிலிருந்து வெளியே வரும்போது அதன் ‘ வாழ்க்கை’ தொடங்குகிறது ! தாய்க்குருவி உணவு ஊட்டும்போது குருவியின் வாழ்க்கை வேகமெடுக்கிறது!குருவிக்கு இறக்கை முளைக்கும்போது அதன் தனி வாழ்க்கை தொடங்குகிறது !” என்றெல்லாம் கூறி ‘வாழ்க்கை’ பற்றி விளக்கிப் பதில் எழுதினார் ! கூடவே , ‘உங்களைப் பற்றிய அறிமுகம்?’ என்று ஒரு வினாவையும் அனுப்பினார்! அப்படி ஏன் அவர் கேட்டார் என்பது அவருக்குத் தெரியாத புதிர்! ‘அவள் யார்?’ என்பதற்கு அவருக்கு விடை அப்போது தேவைப்பட்டது! ‘தேவை’ என்பது இப்படித்தான் இயற்கையாகவே உருவாகிறதுபோலும் ! அவள் அதற்கு , ’இன்ன பள்ளியில் தமிழாசிரியை நான்’ என்று இரத்தினச் சுருக்கமாகப் பதில் மின்னஞ்சல் அனுப்பினாள்! அது ஆய்வாளருக்குத் திருப்தி தரவில்லை! ‘அவள் யாராக இருக்கும் ’ என்ற வினா ஆய்வாளரின் மண்டையைக் குடைந்தது; பிறகு அதை மறந்துவிட்டார்! திடீரென ஒரு நாள் அவருக்கு உதித்தது! ’நாம் நம் மாணவி குமுதாவுக்குக் கொடுத்த விசிட்டிங் கார்டில் எனது மின்னஞ்சல் முகவரியும் இருந்தது!; ஆகவே நம் மாணவிதான் அதனை அனுப்பியிருக்கவேண்டும் , பெரும்பாலும் !’- இந்த நினைப்புதான் வந்தது !

இன்றுவரை அதில் அவருக்குத் திருப்தி ஏற்படவே இல்லை! ‘மின்னஞ்சல் அனுப்பியது யாராக இருக்கக் கூடும்?’ என்ற சிந்தனை அவரின் மண்டையில் ஓர் ஓரத்தில் உட்கார்ந்துகொண்டுதான் இருக்கிறது!