டார்கெட்

by **M.Jagadeesan** Sun May 14, 2017 1:12 pm

நெறியாளர் : " மனம் திறந்து பேசு " என்ற இந்த தொலைக்காட்சி நிகழ்ச்சிக்கு பங்கேற்க வந்துள்ள உங்கள் அனைவரையும் வரவேற்கிறேன் . இன்று நாம் எடுத்துக்கொண்டுள்ள பொருள் " என்னுடைய இலக்கு " என்பதாகும் . ஒவ்வொருவரும் வாழ்க்கையில் ஓர் இலக்கு வைத்திருப்பார்கள் . அதை அடைவதுதான் தன்னுடைய லட்சியம் என்று சொல்வார்கள் .
" சுதந்திரம் எனது பிறப்புரிமை ; அதை அடைந்தே தீருவேன் " என்று திலகர் அவர்கள் முழங்கினார்கள் ; அதாவது அவருடைய இலக்கு , இந்தியாவுக்கு சுதந்திரம் பெற்றுத் தருவதாகும் .

இதுபோல உங்களில் ஒவ்வொருவருக்கும் ஓர் இலக்கு இருக்கலாம் ; அதை நேயர்களுக்குத் தெரிவிப்பதில் மூலமாக , அவர்களுக்கும் அந்த இலக்கை எட்டுவதற்கு நீங்கள் உதவி புரியலாம் . இந்த நிகழ்சசியில் பள்ளி மாணவன் ; மருத்துவர் , ஆசிரியர் , தொழிலதிபர் , அமைச்சர் ஆகிய ஐந்து பேரையும் வரவேற்கிறேன் .

முதலில் பள்ளி மாணவர் தன்னுடைய இலக்கு என்ன என்பதைத் தெரிவிப்பார் .

மாணவன் : ஐயா ! என்னுடைய இலக்கு நன்றாகப் படித்து ஒரு மருத்துவன் ஆகவேண்டும் என்பதுதான் ; ஏழை எளிய மக்களுக்கு என்தொண்டு பயன்படவேண்டும் என்று ஆசைப்படுகிறேன்

நெறியாளர் : நல்லது ! அடுத்து மருத்துவர் ஐயா தனது இலக்கு என்னவென்று தெரிவிப்பார் .

மருத்துவர் : நான் ஒரு கார்டியாலஜிஸ்ட் ; இந்த ஆண்டு முடிவதற்குள் 100 பைபாஸ் சர்ஜரி செய்து முடிக்கவேண்டும் என்பதுதான் எனது இலக்கு .

நெறியாளர் : அடுத்துப் பள்ளித் தலைமை ஆசிரியர் தனது இலக்கு என்னவென்று தெரிவிப்பார் .

தலைமை ஆசிரியர் : எங்கள் பள்ளியில் இதுவரையில் SSLC பொதுத்தேர்வில் 90 % வரை மாணவர்கள் வெற்றி பெற்றிருக்கிறார்கள் , இந்த ஆண்டு 100 % தேர்ச்சி பெறவேண்டும் என்பதுதான் என்னுடைய இலக்கு ; அதற்காக நானும் , ஆசிரியர்களும் கடுமையாக உழைத்துகொண்டு இருக்கிறோம் .

நெறியாளர் : அடுத்து தொழிலதிபர் தன்னுடைய இலக்கைத் தெரிவிப்பார் .

தொழிலதிபர் : நான் ஒரு கார் தொழிற்சாலை நடத்தி வருகிறேன் . இந்த ஆண்டில் 1000 கார்கள் உற்பத்தி செய்யவேண்டும் என்பதுதான் என்னுடைய இலக்கு .

நெறியாளர் : அடுத்து நம்முடைய மாண்புமிகு அமைச்சர் தன்னுடைய இலக்கு என்னவென்று தெரிவிப்பார் .

அமைச்சர் : என்னுடைய இலக்கு பெரிதாக ஒன்றும் இல்லை ; எங்களுடைய பதவிக்காலம் இன்னும் நான்கு ஆண்டுகள் உள்ளன ; அதற்குள் 4000 கோடி சம்பாதிக்கவேண்டும் என்பதுதான் என்னுடைய இலக்கு !

அனைவரும் : என்ன கொடுமை சார் இது