ரசாயன வாயு கசிவு: டெல்லியில் பள்ளி மாணவர்களுக்கு மயக்கம்

by **ayyasamy ram** Sat May 06, 2017 1:41 pm

-
மருத்துவமனையில் சிகிச்சை பெற்றுவரும் பள்ளி மாணவர்கள்.
---
டெல்லியின் துக்லகாபாத் பகுதியில் இன்று (சனிக்கிழமை)
காலை ஏற்பட்ட ரசாயன வாயு கசிவு காரணமாக
அப்பகுதியில் அமைந்துள்ள பள்ளி மாணவர்கள்
120 பேருக்கு திடீர் மயக்கம், கண் எரிச்சல் போன்ற
உபாதைகள் ஏற்பட்டது.

போலீஸ் தரப்பில், "தென் கிழக்கு டெல்லியில் துக்லகாபாத்
பகுதியில் ராணி ஜான்சி சர்வோதய கன்யா வித்யாலா
பள்ளி உள்ளது. காலை வழக்கம் போல் பள்ளிக்கு மாணவர்கள்
வந்தனர்.

பள்ளி வளாகத்துக்கு அருகே உள்ள கன்டெய்னர் கிடங்கில்
இருந்த ஒரு கன்டெய்னரில் இருந்து ரசாயன வாயு கசிவு
ஏற்பட்டது. இதனால் பள்ளி மாணவர்களுக்கு கண் எரிச்சல்,
மயக்கம் போன்ற உபாதைகள் ஏற்பட்டது.

மாணவர்கள் உடனடியாக அருகிலிருந்த மருத்துவமனைக்கு
கொண்டு செல்லப்பட்டனர். அங்கு அவர்களுக்கு முதலுதவி
சிகிச்சை அளிக்கப்பட்டது. தற்போது மாணவர்கள் உடல்
நலன் சீராக இருப்பதாக மருத்துவர்கள் கூறினர்.

சிலர் மருத்துவமனையில் இருந்து வீட்டுக்கு அனுப்பி
வைக்கப்பட்டனர்" எனத் தெரிவிக்கப்பட்டது.

இருப்பினும் பள்ளிக்கு விடுமுறை அளிக்கப்பட்டுள்ளதாக
அப்பள்ளியின் ஆசிரியர் ஒருவர் தெரிவித்தார்.

இது தொடர்பாக டெல்லி துணை முதல்வர் மனிஷ் சிசோதியா
தனது ட்விட்டர் பக்கத்தில், "பள்ளியின் அருகே இருந்த
கிடங்கு ஒன்றில் நிறுத்திவைக்கப்பட்டிருந்த கன்டெய்னரில்
இருந்து ரசாயன வாயுக் கசிவு ஏற்பட்டது.
இதில் 100-க்கும் மேற்பட்ட மாணவர்கள் பாதிக்கப்பட்டனர்.
30 பேர் மயக்கமடைந்தனர்.

உயிர்ச்சேதம் ஏதும் ஏற்படவில்லை. மயங்கிவிழுந்த
மாணவர்களின் உடல் நிலையில் முன்னேற்றம் ஏற்பட்டுள்ளது"
எனத் தெரிவித்திருந்தார்.
-
------------------------------------
தி இந்து