பாகிஸ்தானில் அரசியல் நெருக்கடி முற்றுகிறது எதிர்க்கட்சி தலைவர்கள் கைது

வெளிநாடு சென்றுள்ள பாகிஸ்தான் அதிபர் நாடு திரும்ப ராணுவம் தடை

அரசியல் நெருக்கடி முற்றுகிறது எதிர்க்கட்சி தலைவர்கள் கைது



இஸ்லாமாபாத், மார்ச், 12: வெளிநாடு சென்றுள்ள பாகிஸ்தான் அதிபர் சர்தாரி நாடு திரும்பக் கூடாது என்று அந்த நாட்டு ராணுவம் தடை விதித்துள்ளது. அரசுக்கு எதிராக இன்று நடக்க இருந்த எதிர்க்கட்சிகள் பேரணிக்கு பிரதமர் கிலானி தடை விதித்தார்.

முன்னாள் பிரதமர் நவாஸ் ஷெரீப், அவருடைய கட்சி தலைவர்கள், எம்.பி.க்கள், வக்கீல்களை கைது செய்து சிறையில் அடைத்தார். இதனால், பாகிஸ்தானில் அரசியல் நெருக்கடி முற்றுகிறது.

முஷாரப்பால் பதவி நீக்கம் செய்யப்பட்ட உச்ச நீதிமன்ற தலைமை நீதிபதி சவுத்ரி உள்ளிட்ட நீதிபதிகளை மீண்டும் பதவியில் அமர்த்தும்படி

வலியுறுத்தி, கராச்சியில் இருந்து தலைநகர் இஸ்லாமாபாத்துக்கு இன்று பேரணி நடத்தப் போவதாகவும், 16ம் தேதி நாடாளுமன்றம் முன்பு தர்ணா நடத்தப்படும் என்றும் ஷெரீப் அறிவித்தார்.

இதனால், சட்டம் & ஒழுங்கு பிரச்னை ஏற்படும் சூழல் உருவானதால் பேரணிக்கு அரசு தடை விதித்தது.

சட்டம் & ஒழுங்கு பிரச்னை ஏற்பட்டால் ராணுவ ஆட்சியை அமல்படுத்த வேண்டிய சூழ்நிலை ஏற்படும் என்று கிலானிக்கு ராணுவ தளபதி கயானி எச்சரிக்கை விடுத்தார்.

மேலும், கிலானியை நேற்று சந்தித்து உள்நாட்டு பாதுகாப்பு பற்றி கயானி ஆலோசனை நடத்தினார்.அதைத் தொடர்ந்து, நவாஸ் ஷெரீப்பும் அவருடைய கட்சியை சேர்ந்த முன்னணி தலைவர்களும் கைது செய்யப்பட்டனர். ஷெரீப் வீட்டுக் காவலில் வைக்கப்பட்டார்.

அதிபர் சர்தாரி, ஈரான் தலைநகர் டெஹரானில் நடக்கும் பொருளாதார மாநாட்டில் பங்கேற்க சென்றுள்ளார். அவர் நாடு திரும்பக் கூடாது என்று ராணுவம் தடை விதித்துள்ளதாக செய்திகள் வெளியாகி உள்ளன. பாகிஸ்தான் அரசு இதை மறுத்துள்ளது.

அதே நேரம், மீண்டும் அதிபர் பதவியை ஏற்க தயார் என்று முன்னாள் அதிபர் முஷாரப் அறிவித்துள்ளார். இந்த சம்பவங்களால் பாகிஸ்தானில் குழப்பம் நிலவுகிறது.

அரசியல் நெருக்கடியை காரணம் காட்டி, ஆட்சியை கயானி கைப்பற்றலாம் என்று அரசியல் பார்வையாளர்கள் கருதுகின்றனர்.