வருமான வரி சலுகை எவ்வளவு?

by **ayyasamy ram** Wed Feb 01, 2017 10:43 pm

புதுடில்லி:

மத்திய பட்ஜெட்டில் அறிவிக்கப்பட்டுள்ள வருமான வரி சலுகையின்
மூலம், மூன்று லட்சம் ரூபாய் வரை வருமான வரி செலுத்த வேண்டாம்
என்ற நிலை ஏற்பட்டுள்ளது.

மத்திய பட்ஜெட்டில், 2.5 லட்சம் ரூபாய் முதல், ஐந்து லட்சம் ரூபாய் வரை
ஆண்டு வருமானம் உள்ளவர்களுக்கான வரி, 10 சதவீதத்தில் இருந்து,
5 சதவீதமாக குறைக்கப்பட்டுள்ளது.

இதுதவிர, வருமான வரி சட்டத்தின் 87 ஏ பிரிவின் கீழ், ஐந்து லட்சம்
ரூபாய் வரை ஆண்டு வருமானம் உள்ளவர்களுக்கு ஏற்கனவே
அளிக்கப்பட்டு வந்த வரிசலுகையான, 5,000 ரூபாய் என்பது,
2,500 ரூபாயாக குறைக்கப்பட்டுள்ளது.

80 சி சலுகை

இதன் மூலம், ஆண்டு வருமானம், மூன்று லட்சம் ரூபாய் வரை
உள்ளவர்களுக்கு வரி இருக்காது. மூன்று லட்சம் ரூபாய் முதல்,
3.5 லட்சம் ரூபாய் வரை வருமானம் உள்ளவர்கள், 2,500 ரூபாய்
செலுத்த வேண்டியதாக இருக்கும்.

எனினும், 4.5 லட்சம் ரூபாய் வரை வருமானம் உள்ளவர்கள் வருமான
வரி சட்டத்தின் 80 சி பிரிவின் கீழான வரி சலுகைகளை முழுமையாக
பயன்படுத்தினால், வரி ஏதும் செலுத்த வேண்டாம் என்ற சூழ்நிலை
ஏற்படும்.

கூடுதல் வருமானம் உள்ளவர்களுக்கும் இந்த,
5 சதவீத வரி கட்டமைப்பில் வருவார்கள். எனவே, கூடுதல் வருமானம்
உள்ளவர்களுக்கு, தலா, 12, 500 ரூபாய் வரை வரி குறைய வாய்ப்பு
உள்ளது.

தனிநபர்களின் ஆண்டு வருமானம், 50 லட்சம் ரூபாயில் இருந்து,
ஒரு கோடி ரூபாய் வரை இருந்தால், 10 சதவீதம் கூடுதல் வரி
வசூலிக்கப்படும். தற்போது இந்த பிரிவில் உள்ளவர்களுக்கு கூடுதல்
வரி கிடையாது. எனினும், ஒரு கோடி ரூபாய்க்கு மேல் வருமானம்
உள்ளவர்களுக்கு ஏற்கனவே வசூலிக்கப்படும் கூடுதல் வரியான,
15 சதவீதம் தொடரும் என அறிவிக்கப்பட்டுள்ளது.
-
------------------------------------
-தினமலர்

by **ayyasamy ram** Wed Feb 01, 2017 11:11 pm

சென்னை:
மத்திய அரசின் நிதிநிலை அறிக்கை ஏமாற்றம் அளிப்பதாக, பல்வேறு அரசியல் கட்சித் தலைவர்கள் கூறியுள்ளனர்.

திமுக செயல் தலைவர் மு.க.ஸ்டாலின்:

பல்வேறு முக்கிய விஷயங்களில் தமிழகம்
புறக்கணிக்கப்பட்டுள்ளது. தமிழக மக்களுக்கு மாற்றமும்,
ஏமாற்றமும் உள்ள அறிக்கையாக அமைந்துள்ளது.

விவசாயிகளின் கடனைத் தள்ளுபடி செய்யாதது வருத்தம்
அளிக்கிறது.

சு.திருநாவுக்கரசர்:

மத்திய நிதிநிலை அறிக்கை நோக்கம் இல்லாமல் வார்த்தை
ஜாலங்களால் தயாரிக்கப்பட்ட அறிக்கையாக உள்ளது.
இதன் நாட்டு மக்களும் பயனும் கிடைக்கப்போவதில்லை.

ராமதாஸ்:

அரசியல் கட்சிகள் பெறும் நன்கொடைகளில் வெளிப்படைத்
தன்மையை ஏற்படுத்தும் நோக்குடன் ரூ.2000-க்கு மேல் ரொக்கமாக
நன்கொடை வசூலிக்கக் கூடாது என்பது உள்ளிட்ட விதிமுறைகள்
வகுக்கப்பட்டிருப்பது வரவேற்கத்தக்கதாகும்.

ஒரு சில நன்மைகளையும், ஏராளமான ஏமாற்றங்களையும் கொண்ட
ஆவணமாக அமைந்திருக்கிறது.

ஜி.கே.வாசன்:

விவசாயிகளுக்கும், மாணவர்களுக்கும் பயன் அளிக்காத,
சாமானியர்களின் வாழ்க்கை தரத்தை உயர்த்துவதற்கு
உதவாத நிதிநிலை அறிக்கையாக உள்ளது.

வைகோ:

மத்திய நிதிநிலை அறிக்கையில் கிராமப்புற வளர்ச்சித் திட்டங்களுக்கும்,
போக்குவரத்து வசதிகளைப் பெருக்குவதற்கும் முன்னுரிமை
அளித்திருப்பது வரவேற்கத்தக்கது.

பண மதிப்புக் குறைப்புக்குப் பின்னர் வீட்டுக் கடன் வட்டி
ஏற்கனவே குறைக்கப்பட்டது. இப்போது மேலும் குறைக்கப்பட்டு
இருப்பதன் மூலம், வீட்டு வசதி பெருகும்.

விவசாயிகளுக்கான கடன் உதவி, கடந்த ஆண்டு ரூ. 9 லட்சம் கோடி
என்ற அளவில் இருந்து இந்த ஆண்டு பத்து இலட்சம் கோடியாக
வழங்கப்படுகின்றது.

ஆனால், நதி நீர் இணைப்புப் பற்றிய அறிவிப்பு இல்லை.
பொருளாதாரக் குற்றவாளிகளின் சொத்துகளைப் பறிமுதல்
செய்ய இதுவரை சட்டம் கிடையாது.
அதற்காகப் புதிய சட்டம் கொண்டு வரப்படுவது வரவேற்கத்தக்கது.

ஒட்டுமொத்தத்தில், இது வளர்ச்சிக்கு வழிவகுக்கும் வரவு செலவுத்
திட்டம்.

பழ.நெடுமாறன்:

தமிழகத்துக்குப் பெரிய திட்டங்கள் எதுவும் அறிவிக்கப்படவில்லை.
குறிப்பாக சென்னை-குமரி இரட்டை ரயில் பாதை அமைக்கும் திட்டம்
இன்னமும் முழுமையாக நிறைவேற்றப்படாததற்கு போதுமான நிதி
ஒதுக்கப்படாததும், தென்ன நதிகளை இணைக்கும் திட்டத்திற்கான
அறிவிப்பு எதுவும் வெளியாகாததும் ஏமாற்றம் அளிக்கிறது.

தி.வேல்முருகன்:
ஏழை, எளிய மக்களுக்கான எந்தத் திட்டமும் இல்லை. மக்களுக்கு
ஏமாற்றத்தைத் தரக்கூடியது.
-
தினமணி[/color][/color]