உச்ச நீதிமன்றத்தில் தமிழக அரசு "கேவியட்' மனு

ஜல்லிக்கட்டு விவகாரத்தில் தமிழக அரசின் அவசரச் சட்டத்தை
எதிர்த்து யாராவது வழக்குத் தொடுத்தால் அதை விசாரிக்கும்
போது தமிழக அரசின் கருத்தை அறியாமல் எந்த உத்தரவும்
பிறப்பிக்கக் கூடாது என்று கோரி உச்ச நீதிமன்றத்தில் மாநில
அரசு "கேவியட்' மனு தாக்கல் செய்துள்ளது.

தமிழகத்தில் ஜல்லிக்கட்டுப் போட்டியை நடத்தும் பொருட்டு
அவசரச் சட்டம் பிறப்பிக்கப்பட்டுள்ளது. குடியரசுத் தலைவரின்
அனுமதியின் பேரில் வழங்கப்பட்ட மத்திய அரசின் மிருக வதைத்
தடுப்புச் சட்டத்துக்கான மாநில அரசின் சட்டத் திருத்தத்திற்கு
தமிழக ஆளுநர் சனிக்கிழமை ஒப்புதல் அளித்தார்.

இதைத் தொடர்ந்து, அவசரச் சட்டம் அமலுக்கு வந்துள்ளது.
இதையடுத்து, தமிழகத்தில் ஜல்லிக்கட்டு நடத்துவதற்கான
ஏற்பாடுகள் பல இடங்களிலும் நடைபெற்று வருகின்றன.

இதற்கிடையே, ஜல்லிக்கட்டு விவகாரத்தில் நிரந்தரத் தீர்வு காணப்பட
வேண்டும் என்று தமிழகத்தின் சென்னை உள்பட பல்வேறு
பகுதிகளிலும் மாணவர்களும், இளைஞர்களும் தொடர் போராட்டத்தில்
ஈடுபட்டுள்ளனர்.

இந்நிலையில், தமிழக அரசு பிறப்பித்துள்ள அவசரச் சட்டத்தை
எதிர்த்து "பீட்டா' போன்ற விலங்குகள் நல அமைப்புகள் உச்ச
நீதிமன்றத்தை நாடக்கூடும் என்று எதிர்பார்க்கப்படுகிறது.
இதன் காரணமாக உச்ச நீதிமன்றத்தில் தமிழக அரசு சார்பில்
சனிக்கிழமை கேவியட் மனு தாக்கல் செய்யப்பட்டது.

அதில், ஜல்லிக்கட்டு விவகாரத்தில் தமிழக அரசு பிறப்பித்துள்ள
அவசரச் சட்டத்துக்கு எதிராக யாரேனும் வழக்குத் தொடுத்தால்
தமிழக அரசின் கருத்தை கேட்டறியாமல் உத்தரவு ஏதும் பிறப்பிக்க
கூடாது என்று கோரப்பட்டுள்ளது.

இத்தகவலை தமிழக அரசின் வழக்குரைஞர் யோகேஷ் கண்ணா
உறுதிப்படுத்தினார்.
-
-----------------------------------
தினமணி