குட்டி கதை =புத்தாண்டுப் பரிசு

malar manickam

செப்டம்பர் 12, 2016 05:45 முப

புத்தாண்டுக்கு முந்தைய நாள் இரவு, சம்பளம் வாங்கிய கையோடு வீட்டுக்குள் வந்தார் அப்பா. அவரது அன்பு மகள் ஜெனி தூங்காமல் அவருக்காகக் காத்திருந்தாள். இருவரும் உணவு உண்டபிறகு தொலைக்காட்சி பார்த்துக் கொண்டிருந்தனர்.
அந்நேரம், ""அப்பா... அப்பா... இந்தப் புது வருடத்துக்கு எனக்கு ஏதும் பரிசு இல்லையா?'' என்று கேட்டாள் ஜெனி.

""ம்ம்...ம்... கண்டிப்பா உண்டுடா செல்லம், உனக்கு என்ன வேணும் சொல்லு?'' கேட்டார் அப்பா.

அப்பாவின் கைகளைப் பிடித்தவாறே, ""எனக்குப் புது ஷூ வாங்கித்தாங்கப்பா, அதுவும் பாட்டா ஷூ வேணும்...'' என்றாள் ஜெனி.

""நாளைக்கு வாங்கித் தர்றேன். இப்ப போய் தூங்கும்மா...'' என்றார் அப்பா.

ஜெனி கேட்டபடியே, புத்தாண்டு அன்று காலை புது ஷூ வாங்கிக் கொடுத்தார் அப்பா. மிகுந்த மகிழ்ச்சியோடு, புத்தாண்டுப் பரிசைப் பெற்றுக் கொண்டாள் ஜெனி.
சிறிது நேரம் கழித்து, அந்தப் புது ஷூவை பரிசுப் பொருளாக வண்ணத்தாளை வைத்துக் கட்டிக் கொண்டிருந்தாள் ஜெனி. இதைக் கவனித்த அப்பா, ""யாருக்கு இந்தப்பரிசைக் கொடுக்கப் போற ஜெனி?'' என்று கேட்டார்.

""அது வந்துப்பா.... அடுத்த தெருவுல இருக்கிற ராணிக்குத் தரப் போறேன். பாவம்ப்பா அந்தப் பொண்ணு! அவகிட்ட ஒரே ஒரு ஷூதான் இருக்கு. அதவும் கிழிஞ்சிருக்குப்பா... தன்னோட கிழிஞ்ச ஷூவை யாராவது பார்த்துவிடுவாங்கன்னு, ராணி மறைச்சு மறைச்சு கஷ்டப்படுறதைப் பல நேரம் கவனிச்சிருக்கேன். அதனாலதான் புத்தாண்டுப் பரிசா புது ஷூ கொடுக்கலாம்னு முடிவு பண்ணியிருக்கேன்'' என்று தயக்கத்தோடு சொன்னாள் ஜெனி.

""ரொம்ப நல்ல காரியம் ஜெனி. கண்டிப்பாக செய். ஆனா, என்கிட்டே பரிசு உனக்குன்னு ஏன் பொய் சொல்லிக் கேட்டே?'' என்று அப்பா செல்லக் கோபத்துடன் கோட்டார்.

""அப்பா, ஒருவேளை நான் சொல்லியிருந்தா, நீங்க அடுத்த பொண்ணுக்குத்தானே என்று மலிவான விலையில் வாங்கி வரக்கூடும். அதனாலதான் எனக்கு வேணும்னு பொய் சொன்னேன்...'' என்று தைரியமாகச் சொன்னாள் ஜெனி. என்ன சொல்வதென்று தெரியாமல் திகைத்துப் போனார் அப்பா!

புத்தாண்டுக்காகத் தயார் செய்திருந்த உணவுப்பண்டங்களை ஒரு கை பார்த்தபின், தன்னுடைய புத்தாண்டுப் பரிசை ராணியிடம் கொடுப்பதற்காக கிளம்பிச் சென்றாள் ஜெனி. ஆனால் போன சில நிமிடங்களிலேயே திரும்பி வந்தாள்.


இதைக் கவனித்த அப்பா, ""என்ன ஜெனி, ராணி வீட்டுல இல்லையா? அதுக்குள்ளேயே வந்திட்டியே?'' என்றார் அப்பா.

""நான் ராணிகிட்டே பரிசு கொடுக்கலைப்பா. அவுங்க வீட்டுக் கதவுகிட்ட வெச்சிட்டு ஓடி வந்துட்டேன்...'' என்றாள் ஜெனி.

""ஏன், ராணி கூட சண்டையா? இல்லை கொடுத்தா வாங்க மாட்டாளா?'' என்று அப்பா கேட்க,

""நான் ஒருவேளை அந்தப் பரிசைக் கொடுத்தா ராணி வாங்கிக் கொள்வாள். ஆனால் அதுக்குப் பிறகு என்னைப் பார்க்கும்போதெல்லாம் நன்றியுணர்ச்சியோடு பார்ப்பாள். இயல்பாப் பழகமாட்டா, ஒரு உதவியாளனாகத்தான் என்னைப் பார்ப்பாள். கடவுள் உண்டியலில் போடும் காசுக்கு விளம்பரம் தேவையா?'' என்றாள் பிஞ்சுக் குரலில் ஜெனி.

பிறருக்கு உதவ வேண்டுமென்று எண்ணும் தனது பதின்மூன்று வயது மகளைப் பார்த்து நெகிழ்ந்து போனார் அப்பா!

சிறுகதைகள்
பொதுவான கதைகள்
பூங்கோதை செல்வன்
பூங்கோதை செல்வன் செப்டம்பர் 12, 2016 08:30 முப
பிறருக்கு உதவ வேண்டும் என்ற எண்ணம் மட்டுமன்றி அதை விளம்பரமின்றி பண்ணனும் என்ற அழகிய எண்ணம் ஒவ்வொருவருக்குள்ளும் வளரனும். அருமையான கருத்தைக் கதையாக்கி கொடுத்திருக்கிறீங்க. மிக அருமை. பகிர்ந்து கொண்டமைக்கு நன்றி. தொடருங்கள்.
கணேசன்
கணேசன் செப்டம்பர் 12, 2016 11:06 முப
சூப்பர் கதை .எல்லா குழைந்தைகழும் படிக்கனும்

செல்வா ,
படித்த ,ரசித்த கதையை மற்றவர்கள் படிக்க பதிவு செய்து உள்ளீர் .
அதை ஒட்டிய விமரிசனங்கள் ,வேண்டாத மற்ற விஷயங்கள் வேண்டாமே !

அறிமுகப் பகுதிக்கு சென்று உங்களை அறிமுகப்படுத்திக் கொள்ளுங்கள் .

ரமணியன்