கல்விக்காக ஓர் நடனம்!

-
ஏழைக் குழந்தைகளுக்கு சிறந்த கல்வி - தங்குமிடம்
என்பது ஸ்வாமி தயானந்த சரஸ்வதியின் கனவு.
அவரின் கனவை நனவாக்கி வருகிறது
"எய்ம் ஃபார் சேவா' எனும் கல்வி அறக்கட்டளை.
-
கிராமப்புறம் மற்றும் மலைவாழ் குழந்தைகளின்
கல்விக்காக சேவை செய்து வரும் இந்த அமைப்பு
இந்தியா முழுவதும் நூறு இடங்களில் உண்டு,
உறைவிடப்பள்ளியை நடத்தி வருகிறது. அவர்களின்
கல்வி உதவிக்காக ஆண்டுதோறும் நடன நிகழ்ச்சி
ஒன்றை நடத்தி, நிதி திரட்டி வருகிறது.
-
அந்தவகையில் சமீபத்தில் சென்னை மியூசிக் அகாதெமியில்
பரதம், குச்சிப்புடி, ஒடிசி ஆகிய நடனங்களில் பெயர்பெற்ற
இந்தியன் கிளாசிக்கல் நடன கலைஞரான சர்மிளா பிஸ்வாஸின்
நடனத்தை ஏற்பாடு செய்திருந்தனர். இந்நிகழ்ச்சி குறித்து
சர்மிளா பிஸ்வாஸ் கூறியது:
-
"எய்ம் ஃபார் சேவா அமைப்பை பொருத்தவரை முழுக்க முழுக்க
வறுமைக்கோட்டிற்கு கீழே வாழும் கிராமப்புற குழந்தைகள்
மற்றும் மலைவாழ் குழந்தைகளுக்கான கல்விக்காக உருவாக்கப்
பட்டது. இந்த அமைப்பு மூலம் கடந்த ஐந்தாண்டுகளில் 6000க்கும்
மேற்பட்ட குழந்தைகள் பயனடைந்துள்ளார்கள் என்று அறிந்த
போது வியப்பாக இருந்தது.
-
அந்த குழந்தைகளின் கல்வி உதவிக்காக நடன நிகழ்ச்சி நடத்த
என்னை அழைத்திருந்தார்கள்.
-
நான் எனது குழுக்களுடன் "அந்தர் யாத்ரா' எனும் தலைப்பில்
நடன நிகழ்ச்சியை நடத்தினோம். பொதுவாக ஒவ்வொரு
கலைஞர்களுமே தங்களின் ஒவ்வொரு நடனத்திற்கும்
பாவங்களை
வெளிப்படுத்த ஒரு புதிய உத்தியை கையாளுவார்கள்.
-
இந்த வகையில் தற்போது இந்த குழந்தைகளுக்காக நாங்கள்
பின்னல் கோலாட்டம் நடத்தினோம். மற்ற நடனங்களில் இருந்து
பின்னல் கோலாட்டம் வித்தியாசமாக இருக்கும். மிகவும் ரசிக்கும்
படி இருக்கும். இதில் பொம்மைகளை பயன்படுத்துவோம்.
அதனால் குழந்தைகள் அதை விரும்பி பார்ப்பார்கள்.
-
இந்த நடனத்தைப் பொருத்தவரை பாரம்பரியத்தில் இருந்து
எடுத்திருந்தாலும் அதில் தற்போதைய காலகட்டத்திற்கு ஏற்ப
எங்களது நவீன யுக்தியை புகுத்தினோம். வறுமையில் வாடும்
இளம்தலைமுறையினரின் கல்விக்காக இப்படியொரு நடன
நிகழ்ச்சி நடத்தியது மனதிற்கு மிகவும் நிறைவாக இருக்கிறது.
-
பரதநாட்டியம், குச்சிப்புடி, ஒடிசி ஆகிய நடனங்களில் உங்கள்
மனதைத் தொடும் நடனம் எது?
-
நான் ஒடிஷாவைச் சேர்ந்தவள் அதனால் ஒடிசி நடனத்தைப்
பொருத்தவரை பெரிய அளவில் எனக்கு சிரமம் இருந்ததில்லை.
பரதமும், குச்சிப்புடியும் நான் மிகவும் விரும்பி கற்றுக் கொண்ட
நடனங்கள். அதனால் மூன்று நடனங்களுமே என் மனதைத்
தொட்ட நடனங்கள்தான். எந்த நடனத்திற்காக அரிதாரம்
பூசுகின்றேனோ அதற்கான முழு அர்ப்பணிப்புடன் ஆடுவேன்.
அந்தளவிற்கு நடனத்தின் மீது எனக்கு ஆர்வம்'' என்றார்.
-
---------------------------------------

- ஸ்ரீதேவி
தினமணி