சொத்து விவரம் தாக்கல்: மத்திய அரசு ஊழியர்களின் குடும்பத்தினருக்கு விதிவிலக்கு

by **ayyasamy ram** Mon 1 Aug 2016 - 8:02

லோக்பால், லோக் ஆயுக்தா சட்டத்தின்படி மத்திய அரசு ஊழியர்கள், தொண்டு நிறுவன நிர்வாகிகள் ஆகியோருக்கு தங்களது மனைவி, வாரிசுகளின் சொத்துப் பட்டியல் உள்ளிட்ட விவரங்களைத் தாக்கல் செய்வதில் இருந்து விதிவிலக்கு அளிக்கப்பட்டுள்ளது.

2013-ஆம் ஆண்டு லோக்பால், லோக் ஆயுக்தா சட்டத்தின்படி, மத்திய அரசு ஊழியர்கள், தங்களது மனைவி, வாரிசுகள் ஆகியோரின் சொத்துப் பட்டியல், ஆண்டு வருமானம், பொறுப்புகள் உள்ளிட்ட விவரங்களை தாக்கல் செய்ய வேண்டும். இந்நிலையில், மத்திய அரசிடம் இருந்து ரூ.1 கோடி அளவுக்கு மானியங்கள், வெளிநாட்டில் இருந்து ரூ.10 லட்சம் நன்கொடை பெறும் தொண்டு நிறுவனங்கள், அதன் நிர்வாகிகள் ஆகியோரும் லோக்பால், லோக் ஆயுக்தா சட்ட வரம்புக்குள் மத்திய அரசால் அண்மையில் கொண்டு வரப்பட்டனர். இதையடுத்து தொண்டு நிறுவன நிர்வாகிகளின் மனைவி, வாரிசுகள் ஆகியோரது சொத்துப் பட்டியல், ஆண்டு வருமானம், பொறுப்புகள் உள்ளிட்ட விவரங்களையும் தாக்கல் செய்ய வேண்டிய நிலை ஏற்பட்டுள்ளது.

இந்நிலையில், நாடாளுமன்றத்தில் 2016-ஆம் ஆண்டு லோக்பால் சட்டத் திருத்த மசோதா கடந்த வியாழக்கிழமை நிறைவேற்றப்பட்டது. இந்த சட்டத் திருத்த மசோதாவில், மத்திய அரசு ஊழியர்கள், தொண்டு நிறுவன நிர்வாகிகள் ஆகியோரின் மனைவி, வாரிசுகள் ஆகியோரின் சொத்துப் பட்டியல் உள்ளிட்ட விவரங்கள் தாக்கல் செய்யப்பட வேண்டும் என்று இடம்பெற்றிருந்த ஷரத்து நீக்கப்பட்டு விட்டது. இதன்மூலம், அவர்களுக்கு தங்களது சொத்துப் பட்டியல், ஆண்டு வருமானம், பொறுப்புகள் உள்ளிட்டவைகளை தாக்கல் செய்வதில் இருந்து விதிவிலக்கு அளிக்கப்பட்டுள்ளது.

முன்னதாக, புதிய சட்டத் திருத்த மசோதா நாடாளுமன்றத்தில் நிறைவேற்றப்பட்டதைத் தொடர்ந்து மத்திய அரசு பிறப்பித்த உத்தரவில், மத்திய அரசு ஊழியர்கள், தொண்டு நிறுவனங்கள், அதன் நிர்வாகிகள் ஆகியோர் தங்களது சொத்து பட்டியல் உள்ளிட்ட விவரங்களைத் தாக்கல் செய்வதற்கான காலக்கெடு டிசம்பர் மாதம் 31-ஆம் தேதி வரை நீட்டிக்கப்பட்டது என்பது குறிப்பிடத்தக்கது.
-
தினமணி