மாமன்ற உறுப்பினர்களே மேயரை தேர்வு செய்யும் முறை:சட்டத் திருத்தம் நடைமுறைக்கு வந்தது

by **ayyasamy ram** Thu Jul 07, 2016 2:43 pm

மேயர்களை மாமன்ற உறுப்பினர்களே தேர்வு செய்யும் மறைமுகத் தேர்தல் முறை நடைமுறைக்கு வந்துள்ளது.

இதற்கென சட்டப் பேரவையில் கொண்டு வரப்பட்ட சட்டத் திருத்தத்துக்கு ஆளுநர் கே.ரோசய்யா ஒப்புதல் அளித்து, அரசிதழில் வெளியிடப்பட்டது. இதற்கான மசோதாவை சட்டப் பேரவையில் ஜூன் 23-இல் உள்ளாட்சித் துறை அமைச்சர் எஸ்.பி.வேலுமணி தாக்கல் செய்தார். பேரவையில் நிறைவேறியதைத் தொடர்ந்து, ஆளுநர் கே.ரோசய்யாவின் ஒப்புதலுக்கு அனுப்பப்பட்டது. இதன் பிறகு அரசிதழில் வெளியிடப்பட்டுள்ளது.

மறைமுகத் தேர்தல்: தமிழகத்தில் உள்ளாட்சி அமைப்புகளின் பதவிக் காலம் செப்டம்பர் மாதத்துடன் நிறைவடைகிறது. அதற்கு முன்பாக, இந்த சட்டத் திருத்தம் நடைமுறைக்கு வந்துள்ளது. இதனால், சென்னை, கோவை, மதுரை, திருச்சி உள்ளிட்ட 12 மாநகராட்சிகளின் மேயர்கள் மாமன்ற உறுப்பினர்கள் மூலமாக மறைமுகமாகத் தேர்வு செய்யப்பட உள்ளனர்.

இதனால், மாநகரங்களில் வசிப்போர் மாமன்ற உறுப்பினர்களைத் தேர்வு செய்வதற்கு மட்டும் வாக்களித்தால் போதுமானது.

வார்டுகளில் மாற்றமில்லை: உள்ளாட்சித் தேர்தலில் வார்டுகள், பரப்பளவு, பதவியிடங்களின் எண்ணிக்கை ஆகியவற்றை மாற்றாமல் அப்படியே தொடர்வதற்கான சட்டத் திருத்தமும் பேரவையில் நிறைவேற்றப்பட்டது. இதுவும் தமிழக அரசிதழில் வெளியிடப்பட்டுள்ளதால், அதுவும் நடைமுறைக்கு வந்துள்ளது.

நகராட்சி-பேரூராட்சி: சுமார் 130 நகராட்சிகள், 500-க்கும் மேற்பட்ட பேரூராட்சிகளுக்கான தலைவர்களைத் தேர்ந்தெடுப்பதற்கான மக்கள் நேரடியாகத் தேர்ந்தெடுக்கலாம். இதன்படி, இதனால், இரு பகுதிகளில் வசிக்கும் மக்கள் தலைவர், உறுப்பினர் ஆகிய இரண்டு வாக்குகளைப் பதிவு செய்வர். இருப்பினும், கிராமங்களில் வசிப்போர் ஊராட்சி மன்றத் தலைவர், உறுப்பினர், ஒன்றியக் குழு உறுப்பினர், மாவட்ட ஊராட்சிக் குழு உறுப்பினர் ஆகிய 4 பதவிகளுக்கு வாக்குகளை அளிக்க வேண்டும் என்பது குறிப்பிடத்தக்கது.
-
தினமணி