கடற்காற்று தாமதமாவதால் தமிழகத்தில் வெப்பம் நீடிக்கும்

சென்னை:
கடற்காற்று உருவாவதில் தாமதம் ஏற்படுவதாலும்,
மேகங்கள் குறைந்து காணப்படுவதாலும் தமிழகத்தில்
வெப்பத்தின் தாக்கம் நீடிக்கும் என்று வானிலை ஆய்வு
மையம் தெரிவித்துள்ளது.

கேரளத்தில் தென்மேற்கு பருவமழை தொடங்கியுள்ளதால்,
தமிழகத்தில் மேற்கு தொடர்ச்சி மலைப் பகுதிகளில் சில
நாள்கள் மழை பெய்து வந்தது. வெப்பச் சலனத்தின் காரணமாக
சென்னை மற்றும் அதனைச் சுற்றியுள்ள பகுதிகளிலும் மழை
பெய்து வந்தது.

எனினும், தமிழகத்தில் வெப்பத்தின் தாக்கம் மீண்டும்
அதிகரிக்கத் தொடங்கியுள்ளது. பகல் நேரங்களில் அனல் காற்று
வீசுகிறது.

இது தொடர்பாக வானிலை ஆய்வு மைய அதிகாரிகள் கூறியது:

மேற்கு திசையில் இருந்து தரைக்காற்று வீசுவதாலும்,
கடற்காற்று நிலப்பகுதிக்குள் நுழைவுதற்கு தாமதம்
ஏற்படுவதாலும் வெப்பத்தின் தாக்கம் அதிகரித்துக்
காணப்படுகிறது.

மேலும் மேகங்கள் அதிக அளவில் உருவாகாமல் இருப்பதும்
வெப்பத்தின் தாக்கத்துக்குக் காரணம். இன்னும் ஒரு சில
நாள்களுக்கு தமிழகத்தில் இதே நிலை நீடிக்கும்.

தென்மேற்கு பருவமழையின் காரணமாக கேரள மாநிலத்தில்
அதிக மழை பெய்யும் பட்சத்தில் அதன் எல்லையில் இருக்கும்
தேனி, நீலகிரி, கோவை, கன்னியாகுமரி ஆகிய மாவட்டங்களில்
மழை பெய்ய வாய்ப்புள்ளது.

தமிழகத்தின் பிற இடங்களில் வெப்பச் சலனத்தின் காரணமாக
ஓரிரு இடங்களில் மழை பெய்ய வாய்ப்புள்ளது. சென்னையைப்
பொருத்தவரை வானம் மேகமூட்டத்துடன் காணப்படும்.
ஒரு சில இடங்களில் லேசான மழைத் தூரலுக்கு வாய்ப்புள்ளது
என்று அவர்கள் தெரிவித்தனர்.

8 இடங்களில் சதம்: இந்நிலையில் செவ்வாய்க்கிழமை மாலை
நிலவரப்படி தமிழகம், புதுவையில் 8 இடங்களில் வெயில்
100 டிகிரி ஃபாரன்ஹீட்டுக்கும் அதிகமாக பதிவாகியுள்ளது.
அதிகபட்சமாக மதுரையில் 104 டிகிரி பதிவானது.

வெயில் நிலவரம் (ஃபாரன்ஹீட்டில்)

மதுரை - 104

புதுச்சேரி - 102

சென்னை, கடலூர், பரங்கிப்பேட்டை, தூத்துக்குடி - 101

நாகப்பட்டினம், திருச்சி - 100

காரைக்கால், வேலூர் - 99