சைக்கிளிலும் குதிரையிலும் வந்த பா ஜ க எம் பி க்கள்

தில்லியில் அமல்படுத்தப்பட்டுள்ள ஒற்றைப் படை,
இரட்டைப் படை வாகனக் கட்டுப்பாட்டுப் பயணத் திட்டத்துக்கு
ஆதரவாக, பாஜக எம்.பி. மனோஜ் திவாரி, நாடாளுமன்றத்துக்கு
புதன்கிழமை சைக்கிளில் வந்தார்.

தில்லியில் வாகனப் போக்குவரத்து நெரிசலைக் கட்டுப்படுத்தவும்,
சுற்றுச்சூழலைப் பாதுகாக்கவும், தில்லி அரசு அண்மையில் வாகனக்
கட்டுப்பாட்டுத் திட்டத்தை அறிமுகப்படுத்தியது.

அதன்படி வாகனங்களின் பதிவு எண் ஒற்றைப் படையாக இருந்தால்
ஒருநாளிலும், இரட்டைப் படையாக இருந்தால் மறு நாளிலும் பயணிக்க
வேண்டும். இதனால் வாகனப் போக்குவரத்து கட்டுப்படுத்தப்படுவதாக
அரசு கருதுகிறது.

இந்நிலையில், இந்தத் திட்டத்துக்கு ஆதரவு தெரிவித்து வடகிழக்கு
தில்லி தொகுதி பாஜக எம்.பி. மனோஜ் திவாரி, நாடாளுமன்றத்துக்கு
புதன்கிழமை சைக்கிளில் வருகை தந்தார்.

அப்போது செய்தியாளர்களிடம் அவர் கூறியதாவது:

என்னிடம் இரட்டைப் படை பதிவு எண் கொண்ட கார் உள்ளதால்,
அரசின் சட்டப்படி இன்று (புதன்) ஒற்றை இலக்க கார்களுக்கு மட்டுமே
அனுமதியுள்ளதால் சைக்கிளில் வந்துள்ளேன். சைக்கிளை
இயக்குவதற்கு கடினமாக இல்லை. அதே நேரத்தில் உடல்நலத்துக்கு
நன்மை பயக்கும்.

நகரில் உள்ள போக்குவரத்து அமைப்பை வலுப்படுத்த வேண்டும்.
வாகனக் கட்டுப்பாட்டுத் திட்டம் மக்களுக்கு சிரமத்தை ஏற்படுத்தக் கூடாது
என்றார் அவர்.

குதிரையில் வந்த அஸ்ஸாம் எம்.பி.: இதனிடையே, தில்லி அரசின் வாகனக்
கட்டுப்பாட்டுத் திட்டத்துக்கு எதிர்ப்பு தெரிவித்து அஸ்ஸாம் மாநிலம்,
தேஜ்பூர் பாஜக எம்.பி. ராம் பிரசாத் சர்மா நாடாளுமன்றத்துக்கு குதிரையில்
வந்தார்.

இதுகுறித்து அவர் கூறுகையில், "என்னிடம் இரட்டைப் படை எண் கொண்ட
கார் உள்ளதால் குதிரையில் வந்தேன். அண்டை மாநிலங்களில் இருந்து
தில்லிக்கு கார்களில் வரும் மக்கள், ஒற்றைப் படை, இரட்டைப் படை
திட்டத்தால் தில்லி நகரத்துக்குள் நுழைய முடியாமல் பாதிக்கப்படுகின்றனர்.

தில்லிக்கு வரும்போது இரண்டு கார்களை எடுத்து வர வேண்டும் என
கேஜரிவால் அரசு எதிர்பார்க்கிறதா?' என்றார் அவர்.
-
========================