வசந்தகால பண்டிகை ஹோலி !

ஹோலி பண்டிகை இன்று உலகெங்கும் உற்சாகமாக கொண்டாடப்படுகிறது. ஹோலி அல்லது ரங்க பஞ்சமி என்பது இந்துக்களின் வசந்தகால பண்டிகையாகும். துல்ஹேதி, துலாந்தி, துலேந்தி என்ற பெயர்களால் ஹோலி அழைக்கப்படுகிறது. இந்தியா, நேபாளம், வங்கதேசம், தென்ஆப்ரிக்கா, இங்கிலாந்து மொரீஷியஸ் உள்பட இந்துக்கள் அதிகம் வசிக்கும் நாடுகளில் கோடைகாலத்தை வரவேற்கும் வகையில், பங்குனி மாதம் பவுர்ணமி நாளில் ஹோலி பண்டிகை கோலாகலமாக கொண்டாடப்படுகிறது.



கிருஷ்ணபகவான் குழந்தை பருவத்தில், கோபியர்களுடன் விளையாடியதை குறிப்பதுதான் ஹோலி பண்டிகை. கிருஷ்ணரின் லீலைகள், குறும்புகள், பாடல்களாக பாடப்பட்டு வண்ண நீரை குழாய்களில் நிரப்பி பீச்சியடித்தும், வண்ணப் பொடிகளை ஒருவர் மீது மற்றொருவர் தூவியும் சிறுவர்கள், பெண்கள் உள்பட அனைவரும் விளையாடி மகிழ்வார்கள். கிருஷ்ண பகவான் வளர்ந்த இடமான பிருந்தாவன் மற்றும் மதுராவில் (உத்தர பிரதேசம்) இந்த பண்டிகை 16 நாட்கள் கொண்டாடப்படுகிறது.

பிரம்மாவிடம் சாகா வரம் பெற்ற இரணியன் என்ற அரக்கன் தன்னை எல்லோரும் கடவுள் என நினைத்து வழிபட வேண்டும் என்று நினைத்தான்.

இரணியன் மகன் பிரகலாதன் மகாவிஷ்ணுவை மட்டும் கடவுளாக வணங்கி வந்தான். ஆத்திரம் அடைந்த இரணியன், மகன் என்றும் பாராமல் பிரகலாதனை துன்புறுத்தி அழிக்க நினைத்தான். மகனை கொல்ல தன் சகோதரி ஹோலிகாவின் உதவியை நாடினான். ஹோலிகா நெருப்பினால் அழியாத தன்மை படைத்தவள். தனது மகன் பிரகலாதனை மடியில் அமர்த்திக்கொண்டு ஹோலிகாவை நெருப்பின் நடுவில் உட்காரும்படி கூறினான் இரணியன்.

மகாவிஷ்ணுவை மனதில் நினைத்து ஹோலிகாவின் மடியில் அமர்ந்த பிரகலாதன், கடவுள் அருளால் நெருப்பில் இருந்து மீண்டான். ஆனால், ஹோலிகா நெருப்பில் எரிந்து சாம்பலானாள் என்கிறது புராண கதை. இதை குறிக்கும் வகையில் ஹோலி பண்டிகையின் முதல்நாள் இரவு வெட்ட வெளியில் தீயை மூட்டி அதன் ஒளியில் எல்லோரும் சந்தோஷமாக விளையாடி மகிழ்கிறார்கள்.

இது ஹோலிகா தகனம் (ஹோலிகாவை எரித்தல்) அல்லது சோட்டி ஹோலி என்று அழைக்கப்படுகிறது. ஆந்திராவில் இதை காம தகனம் என்கிறார்கள்.



உலகின் ஒரே இந்து நாடான நேபாளத்தில் 80 சதவீதம் பேர் இந்துக்கள். இங்கு ஹோலி பண்டிகை தேசிய விடுமுறை நாளாக அறிவிக்கப்பட்டுள்ளது. பஞ்சாபில் இதை ஹோலா மொஹல்லா என்ற பெயரில் கொண்டாடுகிறார்கள். உத்தரபிரதேசம் பர்சானாவில் ஹோலியின் போது பெண்கள், ஆண்களை தடியால் அடித்து விரட்டுவது தனித்தன்மை வாய்ந்த ஒன்றாகும். சுல்தான்பூரில் வேடிக்கை விழாவாக ஹோலி கொண்டாடப்படுகிறது.

இந்தியாவின் வடகிழக்கு பகுதியில் உள்ள மணிப்பூர்வாசிகள் ஹோலி பண்டிகையை 6 நாட்கள் கொண்டாடுகிறார்கள். குஜராத், ஒடிசா, காஷ்மீரில் மக்கள் மட்டுமின்றி பாதுகாப்பு படை அதிகாரிகளும் ஹோலியை கொண்டாடி மகிழ்கிறார்கள். குளிர்காலம் முடிந்து வசந்த காலத்தை வரவேற்கும் விதமாக இப்பண்டிகை நாடு முழுக்க கொண்டாடப்படுகிறது. நம் வாழ்வு வண்ணமயமாகட்டும்.. வசந்தம் வீசட்டும் என்ற நம்பிக்கையுடன் நாமும் வண்ணமயமாக ஹோலியை கொண்டாடுவோம்.

- சௌ.விமலேஷ்

முதல் நாள் இரவு நெருப்பு கொளுத்தி , அதை சுற்றிலும் ஆண்களும் பெண்களும் ஆடுவார்கள்..மறுநாள் காலை தான் 'ஹோலி' விளையாடுவார்கள்