கேரளாவில் திருநங்கையர் இயக்கும் 'ஜி - டாக்சி' சேவை அறிமுகம்

by **ayyasamy ram** Mon Feb 01, 2016 6:13 am

திருவனந்தபுரம்: நாட்டிலேயே முதல் முறையாக, திருநங்கையரால் நடத்தப்படும், 'ஜி - டாக்சி' சேவையை துவக்க, கேரள அரசு திட்டமிட்டுள்ளது.

கேரளாவில், பெண்களால், பெண்களுக்காக இயக்கப்படும், 'ஷி - டாக்சி' சேவைக்கு, மக்கள் மத்தியில் சிறப்பான வரவேற்பு கிடைத்துள்ளது. அதை பின்பற்றி, திருநங்கையரை, சமூக நீரோட்டத்தில் இணைக்கும் திட்டமாக, ஜி - டாக்சி எனப்படும், வாடகைக் கார் சேவையை துவக்க திட்டமிடப்பட்டுள்ளது. கேரள அரசின் சமூக நீதித்துறை உருவாக்கிய இந்த திட்டத்தின்படி, கார்களின் உரிமையாளராகவும், கார்களை இயக்குபவராகவும் திருநங்கையர் இருப்பர். வரும், மார்ச் மாதம் முதல், ஜி - டாக்சி சேவை துவங்கும் என எதிர் பார்க்கப்படுகிறது.

இதுகுறித்து, மாநில சமூக நீதித்துறை அமைச்சர் முனீர் கூறுகையில், ''கடந்த நவம்பரில், திருநங்கையர் தொடர்பான கேரள அரசின் கொள்கைத் திட்டம் வெளியிடப்பட்டது. அதன் ஒரு அங்கமாக, ஜி - டாக்சி செயல்படுத்தப்படுகிறது,'' என்றார்.

சமத்துவ 'டாக்சி'

* கேரள அரசின் முந்தைய திட்டமான ஷி - டாக்சி, பெண்களால், பெண்களுக்காக இயக்கப்பட்டது

* திருநங்கையரை பொருளாதார ரீதியில் மேம்படுத்த, தற்போது துவக்கப்படும் ஜி - டாக்சியில், பாலின பாகுபாடின்றி யாரும் பயணிக்கலாம். எனவே இது, 'சமத்துவ டாக்சி' திட்டமாக, கருதப்படுகிறது

* ஷி - டாக்சி திட்டத்தை செயல்படுத்திய, 'ஜெண்டர் பார்க்' நிறுவனத்திடம், ஜி - டாக்சி திட்ட பொறுப்பு ஒப்படைக்கப்பட்டுள்ளது

* ஜி - டாக்சியில், ஜி.பி.எஸ்., உள்ளிட்ட பல்வேறு வசதிகள் இருக்கும்

* கேரளாவில், 25 ஆயிரம் திருநங்கையர் உள்ளனர்.
-
dinamalar