ஐஎஸ் இயக்கத்தில் தென் இந்திய இளைஞர்கள்: என்ஐஏ தலைவர் பரபரப்பு தகவல்

தினகரன்
Monday, 28 Dec, 8.06 pm
ஐஎஸ் இயக்கத்தில் தென் இந்திய இளைஞர்கள்: என்ஐஏ தலைவர் பரபரப்பு தகவல்

லக்னோ: ஐஎஸ் தீவிரவாதத்திற்கு தென் இந்தியாவில் உள்ள இளைஞர்கள்தான் அதிகம் ஈர்க்கப்படுகின்றனர் என என்ஐஏ தலைவர் தெரிவித்துள்ளார். தேசிய புலனாய்வு பிரிவு தலைவர் சரத் குமார் லக்னோவில் நடைபெற்ற புதிய அலுவலக கட்டட திறப்பு விழாவில் கலந்து கொண்டார். அப்போது அவர் பேசுகையில், ஐஎஸ் தீவிரவாதம் ஒரு போதும் இந்தியாவில் கால் ஊன்ற முடியாது. அவர்கள் இன்டர்நெட் மூலமாகவும், சமூக வலைத்தளங்கள் மூலமாகவும் இளைஞர்களை ஈர்த்து வருகின்றனர். ஒப்பீட்டளவில் பீகார், உத்தரபிரதேசம் போன்ற மாநிலங்களில் அதன் தாக்கம் குறைவாக உள்ளது. ஆனால் தென் இந்திய இளைஞர்கள் மத்தியில் ஐஎஸ் மீதான ஈர்ப்பு அதிகம் உள்ளது. ஐஎஸ் தீவிரவாதத்திற்கு எதிரான பிரசாரத்தை மத்திய அரசு தொடங்கியுள்ளது. பொருளாதாரம் மற்றும் சமூக, அரசியல் காரணங்களும் இளைஞர்கள் ஐஎஸ் தீவிரவாதத்தால் ஈர்க்கப்படுவதற்கு ஒரு காரணமாகும். எல்லை பகுதிகளில் இது போன்ற அமைப்புகளால் புழக்கத்திற்கு விடப்படும் கள்ள நோட்டு பிரச்னை நாம் சந்திக்க வேண்டிய மற்றொரு மிகப் பெரிய சவால். மேற்கு வங்கத்தில் உள்ள மால்டாதான் கள்ள நோட்டு புழக்கத்தின் கூடாரமாக திகழ்ந்து வருகிறது. சுமார் ரூ.25 ஆயிரம் கோடி வரை கள்ள நோட்டுகள் இங்கிருந்து நாடு முழுவதும் புழக்கத்திற்கு கொண்டு செல்லப்படுகிறது. மோடி பதவியேற்ற பிறகு நக்சலைட்டுகள் பிரச்னை கணிசமான அளவுக்கு குறைந்துள்ளது. நக்சலைட்டுகளுக்கு எதிராக பாதுகாப்பு படைகள் ஒவ்வொரு மூலை முடுக்கிலும் தீவிர கண்காணிப்பு பணிகளில் ஈடுபடுத்தப்பட்டுள்ளனர் என்றார்.
நன்றி-டெய்லிஹண்ட்