இதய நோயாளிகளுக்கு பொருத்தப்படும் ஸ்டென்ட்டுகளின் விலையை கட்டுப்படுத்த மத்திய அரசு முடிவு

தினகரன்
Monday, 28 Dec, 11.38 am
புதுடெல்லி: இதய நோயாளிகளுக்கு பொருத்தப்படும் ஸ்டென்ட்டுகளின் விலையை கட்டுக்குள் கொண்டுவர மத்திய அரசு முடிவு செய்துள்ளது. இதயத்திற்கு செல்ல முக்கிய ரத்த குழாய்களில் கொலஸ்டரால் எனப்படும் கரையாத கொழுப்பு படிவதால் அவை சுருங்கி மாரடைப்பு போன்ற உயிருக்கு ஆபத்தான நிலை ஏற்படுகிறது. மாரடைப்பு வந்தவர்கள் அல்லது தமனிகளில் அடைப்பு ஏற்படும் நோயாளிகளுக்கு அறுவை சிகிச்சை அல்லாத அஞ்சியோ பிளாஸ்ட் சிகிச்சை அளிக்கப்படுகிறது. பைபாஸ் அறுவை சிகிச்சை செய்ய பயப்படும் நோயாளிகள் அல்லது அதற்கு முந்தைய நிலையில் உள்ளவர்கள் இந்த சிகிச்சையால் பயன்பெறுகின்றனர். முக்கிய தமனி வழியாக மெல்லிய கம்பி உடலுக்குள் செலுத்தப்பட்டு அடைப்பு இருக்கும் தமனியில் ஸ்டென்ட் எனப்படும் வலை போன்ற சாதனம் பொருத்தப்படுகிறது. இதனால் தமனி விரிவடைந்து ரத்த ஒட்டம் சீராகிறது. ஆஞ்சியோ பிளாஸ்ட் சிகிச்சை சுமார் 40 சதவீதம் அளவிற்கே பலன் இருக்கிறது என கருதப்பட்டாலும் இதை பலர் விரும்பி செய்து கொள்வதால் ஸ்டென்ட்டுகளுக்கு நல்ல கிராக்கி உள்ளது. ஸ்டென்ட்டுகள் வெளிச்சந்தையில் கிடைப்பதில்லை. இதைப்பயன்படுத்தி நோயாளிகளிடம் இருந்து லட்சக்கணக்கான ரூபாய்களை மருத்துவமனைகள் கொள்ளையடிப்பதாக மத்திய சுகாதார அமைச்சகத்திற்கு ஏராளமான புகார்கள் வந்துள்ளதையடுத்து ஸ்டென்ட்டுகளை அத்தியாவசிய மருந்துகளின் பட்டியலில் சேர்க்க முடிவு செய்துளுள்ள மத்திய அரசு அவற்றின் விலையை கட்டுக்குள் கொண்டுவர திட்டமிட்டுள்ளது. அதன்படி உலோகத்தால் ஆன ஸ்டென்ட்டுகளின் விலை ரூ.20,000-க்கும், தமனிகளில் ஒரு அங்கமாகவே சேர்ந்து விடும் ஸ்டென்ட்டுகளின் விலையை ரூ.28,000-ஆக நிர்ணயிக்கப்படுகிறது. இதற்கான அறிவிப்பு விரைவில் வெளியாகிறது. இது அமலுக்கு வந்தால் ஸ்டென்ட்டுகளுக்கு ரூ.1.5 லட்சம் கொள்ளையடிக்கும் மருத்துவமனைகளின் அட்டூழியம் முடிவுக்கு வரும் என எதிர்பார்க்கப்படுகிறது.
நன்றி-டெய்லிஹண்ட்