அரபி மொழியில் திருக்குறள்!

by **ayyasamy ram** Mon Jun 29, 2015 3:54 am

சென்னை பல்கலைக் கழக அரபுத் துறை உதவிப் பேராசிரியர்
முனைவர் ஜாஹிர் ஹுசைன், திருக்குறளை முதன் முறையாக
அரபி மொழியில் மொழி பெயர்த்து அதை இன்னொரு
தளத்துக்குக் கொண்டு சென்றிருக்கிறார்.
-
திருக்குறள் போலவே சுருக்கமாகப் பேசுகிறார் குமரி மாவட்டம்
தக்கலையைச் சேர்ந்த இந்த அரபுப் பேராசிரியர்.
-
எப்படித் தொடங்கியது இந்த முயற்சி?
-
தமிழக அரசின் திட்டம் இது. தமிழக அரசு திருக்குறளை அரபி
மொழியில் கொண்டு வரும் பணியை உலகத் தமிழாராய்ச்சி
நிறுவனத்திடம் ஓப்படைத்தது. அந்த நிறுவனம் பணியை
எனக்குக் கொடுத்தது.
-
பணியை முடிக்க எடுத்துக் கொண்ட காலம்?
-
இரண்டு ஆண்டுகள். பல்கலைக் கழகத்தில் எனது துறையில்
இருக்கும் ஆராய்ச்சி மாணவர்கள் இருவர் எனக்கு உதவியாக
இருந்தார்கள். திரக்குறளுக்கு இருபதுக்கும் மேற்பட்ட உரைகள்
இருக்கின்றன. ஆனால் எனக்குச் சந்தேகம் ஏற்பட்ட போது
நான் தெளிவு பெற்றது டாக்டர் மு.வ. உரையின் மூலம்தான்.
-
மேலும் கவிக்கோ அப்துல் ரஷ்மான், பல்கலைக் கழக தமிழ்ப்
பேராசிரியர் மணிகண்டன் ஆகியோரும் எனது சந்தேகங்களைத்
தீர்த்து வைத்தார்கள். குறளை மட்டுமே அரபியில் உயிர்ப்புடன்
புதுக் கவிதை வடிவில் மொழிபெயர்த்திருக்கிறேன்.
-
அதற்கு அரபியில் உரை எழுதவில்லை. ஆனால் என் அரபு
மொழிபெயர்ப்பு மிக எளிதாக இருக்கிறபடியால் அரபு மொழி
தெரிந்த எல்லோருமே படித்துப் பொருள் விளங்கிக் கொள்ள
முடியும்.
-
அரபி மொழி செம்மொழி அந்தஸ்து கொண்டது; இலக்கிய
வளம் கொண்டது. அந்த மொழி அறிஞர்கள் திருக்குறள்
மொழிபெயர்ப்பைக் குறித்து என்ன சொல்கிறார்கள்?
-
இதுகுறித்து அறிமுக விழா ஒன்று சௌதி அரேபியாவில் உள்ள
தாமில் நடந்தது. சௌதி அரசின் கலை கலாசார மையமும்,
உலக சமூக நல அமைப்பும் இணைந்து நடத்திய அரபிக்
கவிஞர்கள் மாநாட்டில் அரபி திருக்குறளை அறிமுகம் செய்தேன்.
-
அரபிக் கவிஞர்களும், அறிஞர்களும் மொழி பெயர்ப்பை மிகவும்
பாராட்டினார்கள். ஒரு அரபி கவிஞர் நாற்பது குறளை அரபியில்
சொல்லி விளக்கினார். நான் திருவள்ளுவர் மற்றும் திருக்குறள்
குறித்த பொதுவான செய்திகளைச் சொல்லி தமிழில் அந்த
நாற்பது குறளையும் சொல்லி விளக்கினேன். கூடியிருந்த அரபுக்
கவிஞர்களும் அறிஞர்களும் நன்றாக ரசித்தார்கள்.
-
அரபி என்பது முஸ்லிம்களுக்கு வழிபாட்டு மொழி; இஸ்லாம்
ஒரு கண்டிப்பான மதம். திருக்குறள் போன்ற இஸ்லாமிய
மதக்கோட்பாடுகளுக்குள் பொருந்தி வருகிறதா?
-
எல்லா மதங்களுக்கும் பொருந்தி வரும் வகையில் உலகப்
பொதுமறையாக அதைப் படைத்திருக்கிறார் வள்ளுவர்.
குறளின் மூலமாக வள்ளுவர் சொல்லும் பல கருத்துக்கள்
புனித குர்ஆனோடு உடன்பட்டுப் போகிற வகையில் இருப்பது
குறிப்பிடத்தக்கது. வள்ளுவர் சொல்லியிருக்கிற புலால் மறுத்தல்
மட்டுமே இஸ்லாத்துக்குக் கொஞ்சம் நெருடலான அம்சம்.
-
பல தமிழறிஞர்களை இது குறித்து கலந்து பேசினேன். "புலால்
மறுத்தல்' என்பது துறவிகளுக்காகச் சொல்லப்பட்ட விஷயம்
என்று அவர்கள் விளக்கம் சொன்னார்கள். மற்றபடி
இஸ்லாத்துக்கு குறளோடு எந்த நெருடலும் இல்லை.
முதல் குறளில் "ஆதிபகவன்' என்பதை "இறைவன்' என்றே
மொழிபெயர்த்தேன்.
-
அரபி மொழி திருக்குறள் விற்பனைக்கு எப்போது வரும்?
-
அதை தமிழக அரசு முடிவு செய்யும். உலகில் 25 நாடுகளில்
அரபி தாய்மொழியாகப் பேசப்படுகிறது. இதுவரை 35 மொழிகளில்
குறள் மொழிபெயர்க்கப்பட்டிருக்கிறது. இந்த அரபி மொழி
பெயர்ப்பின் மூலம் திருக்குறள் இன்னும் புதுத் தளங்களுக்குச்
செல்லும் வாய்ப்பு அதிகரித்திருக்கிறது. உலகம் முழுக்க பல
பல்கலைக் கழகங்களில் அரபித் துறை இருக்கிறது.
-
இந்த மொழி பெயர்ப்பின் மூலம் அங்கேயெல்லாம் திருக்குறள்
ஆராய்ச்சிக்கான கதவு திறந்திருக்கிறது.
-
----------------------------------------------------

- ப்ரியன்
கல்கி