சவுதியில் இன்று மூவரின் தலையை துண்டித்து மரண தண்டனை நிறைவேற்றம்!

by **krishnaamma** Wed Jun 10, 2015 1:15 am

ரியாத், ஜூன் 9-

சவுதியில் இன்று ஒரு போதைப்பொருள் கடத்தல்காரன் மற்றும் கொலை வழக்கில் கைதான இருவருக்கு தலையை வெட்டி மரண தண்டனை நிறைவேற்றப்பட்டது.

சவுதி அரேபியா நாட்டில் மத துவேஷம், கொலை, கற்பழிப்பு, போதைப்பொருள் கடத்தல் மற்றும் ஆயுதமேந்திய கொள்ளை ஆகிய கொடும் குற்றங்களுக்கு இஸ்லாமிய ஷரீஅத் சட்டங்களின்படி மரண தண்டனை விதிக்கப்படுகிறது.

அவ்வகையில், சவுதிக்குள் போதைப்பொருளை கடத்த முயன்ற வழக்கில் சிரியாவை சேர்ந்த முஹம்மது உசேன் அப்துல் கரிம் ஹல்வானி என்பவருக்கு மரண தண்டனை விதிக்கப்பட்டிருந்தது. இவருக்கு சவுதியில் உள்ள ஜுபைல் நகரில் இன்று தலையை வெட்டி மரண தண்டனை நிறைவேற்றப்பட்டது.

மேலும், கொலை குற்ற வழக்கில் கைதான சவுதி நாட்டை சேர்ந்த உசேன் அல் கதானி மற்றும் ஜிப்ரான் அல் கதானி ஆகியோருக்கும் மரண தண்டனை விதிக்கப்பட்டிருந்தது. அவர்கள் இருவருக்கும் இன்று அசிர் பிராந்தியத்தில் உள்ள அபா நகரில் இன்று தலையை வெட்டி மரண தண்டனை நிறைவேற்றப்பட்டது என உள்ளூர் ஊடகங்கள் செய்தி வெளியிட்டுள்ளன.

இவர்கள் மூன்று பேரையும் சேர்த்து, இந்த ஆண்டின் முதல் ஆறு மாதங்களுக்குள் மட்டும் சவுதியில் 97 பேருக்கு மரண தண்டனை நிறைவேற்றப்பட்டுள்ளது.

கடந்த ஆண்டு முழுவதும் 87 பேருக்கு மரண தண்டனை நிறைவேற்றப்பட்ட நிலையில், இவ்வாண்டின் முதல் ஆறு மாதங்களுக்குள் மட்டும் 97 பேருக்கு மரண தண்டனை நிறைவேற்றப்பட்டுள்ளது, சர்வதேச மனித உரிமை ஆர்வலர்களை கொதிப்படையச் செய்துள்ளது.

மாலைமலர்