ஆப்பிள் ஸ்மார்ட் வாட்ச் வாங்க போட்டா போட்டி

by **சிவா** Sat Apr 25, 2015 10:40 pm

ஐபோன் உள்ளிட்ட எலக்ட்ரானிக் பொருட்கள் வர்த்தகத்தில் முன்னணியில் உள்ள ஆப்பிள் நிறுவனம் புதிதாக ஸ்மார்ட் வாட்ச்சை கடந்த மாதம் அறிமுகம் செய்தது. இந்த வாட்ச் நேற்று முதல் பல நாடுகளில் அதிகார பூர்வமாக விற்பனைக்கு வந்து உள்ளது.முன்னதாக கடந்த மார்ச் 9-ந்தேதி சான் பிரான்சிஸ்கோ நகரில் இந்த வாட்ச்சின் அறிமுக விழா நடைபெற்றது.

முதல் நாளிலேயே நூற்றுக்கணக்கானோர் வரிசையில் நின்று வாங்கினர். ஸ்போர்ட்ஸ், எடிசன் என மாடலுக்கு ஏற்ப வாட்ச் விலை மாடலுக்கு ஏற்ப இந்திய மதிப்பில் ரூ.37 ஆயிரம் முதல்ரூ.18 லட்சம் வரை இருக்கும் என்று ஆப்பிள் வாட்ச்களை விற்பனை செய்யும் ஆன்லைன் நிறுவனம் ஒன்று தெரிவித்துள்ளது. இதன்மூலம் இந்தியாவில் முன்கூட்டியே ஆர்டர் செய்வோருக்கு மே 4 முதல் 15ம் தேதிக்குள் வாட்ச் கிடைக்கும் என்று எதிர்பார்க்கப்படுகிறது. ஊதா, நீலம் மற்றும் வெள்ளை ஆகிய ரிஸ்ட்பாண்ட்களுடன் ஆப்பிள் வாட்ச் வரவுள்ளது. மேலும் கையால் செய்யப்பட்ட கோல்ட் பக்கிளும் கூடுதல் கவர்ச்சி.

வாட்ச்சில் உள்ள சிறப்பு அம்சங்கள் சில:

* ஆப்பிள் ஸ்மார்ட் வாட்ச் துல்லியமான நேரத்தை மட்டுமின்றி, நீங்கள் ஷெட்யூல் செய்த நிகழ்ச்சி, வேலைகளை நினைவூட்டும்.

* இந்த வாட்ச் ஐஃபோன் 5, 5c,5s,மற்றும் 6 பிளஸ் ஆகியவற்றுடன் வேலை செய்யுமாறு வடிவமைக்கப்பட்டுள்ளது.

* அடிப்படை வசதிகளான காலண்டர், ஸ்டாப் வாட்ச், அலாரம், தட்பவெப்பம், சூரிய உதயம், அஸ்தமனம், மட்டுமின்றி பங்குச்சந்தை விவரங்களையும் அறிந்து கொள்ளலாம். குறுந்தகவல், மெயில்களை பார்க்கலாம்.

* ஹார்ட் அட்டாக் வரப்போகிறதா? முன்பே கணித்து எச்சரிக்கும்.

* உடற்பயிற்சியில் ஈடுபடும்போது எவ்வளவு நேரம், கலோரி எரித்தது எவ்வளவு, இன்னும் எவ்வளவு நேரம் பயிற்சி தேவை என அத்தனை அட்வைசையும் வழங்கும்.

* ஆப்பிள் வாட்ச் வைத்துள்ள மற்றொரு நண்பருக்கு அல்லது காதலிக்கு டயலில் அவரது பெயரை தேர்வு செய்து விரலால் தட்டி ரகசிய சமிக்‌ஞை தரலாம். டயலில் வரைந்து ஷேர் செய்யலாம்.

* ஆப்பிள் வாட்ச் ஒரு வாக்கி-டாக்கியாக, டிராயிங் பேடாக, நாடித் துடிப்பு அறிய உதவும் கருவியாகவும் கலோரி கணக்கீடு செய்யும் கருவியாகவும், ஆக்டிவிட்டி டிராக்கராக பல பயன்பாடுகள் கொண்டது. ஆப்ஸ்களை செயல்படுத்துவதோடு, டிக்டேஷன் எடுத்துக் கொள்கிறது, மேலும் ஐபோனுடன் இணைந்து செயல்படுகிறது.

* ஒரே இடத்தில் அமர்ந்திருந்தாலும் எச்சரிக்கை செய்யும். நிற்பது, நடப்பது உள்ளிட்ட உங்கள் செயல்பாடுகளை கண்காணித்து ஒவ்வொரு நாள் முடிவிலும் ரிப்போர்ட் தரும்.

* ஆப்பிள் வாட்ச் சபையர் கண்ணாடி முகப்புடன் தட்டையான திரை அமைப்பு கொண்டது. மேலும் சிறப்பாக ‘டிஜிட்டல் கிரவுன்’ என்ற திருகுக் கட்டுப்பாடு கொண்ட ஒன்றின் மூலம் பல்வேறு செயல்பாடுகளை ஸ்க்ரோல் செய்து அணுகுமாறு வடிவமைக்கப்பட்டுள்ளது.

* முக்கியமாக ஆப்பிள் பே (apple pay) என்ற புதிய வசதியும் அறிமுகப்படுத்தப்பட்டுள்ளது. ஆப்பிள் பே மூலம், வாடிக்கையாளர்கள் தங்களது கிரெடிட், டெபிட் கார்டுகளை, தங்கள் ஐபோன்களில் பதிவு செய்து கொண்டால், அதை வைத்தே பண பரிமாற்றங்களை விரைவாகவும், பாதுகாப்போடும் செய்ய முடியும்